ភ្នំពេញៈ លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) រយៈពេល ២ ថ្ងៃនៅថ្ងៃទី ២៧-២៨ ធ្នូ បានដំណើការទៅ ដោយជោគជ័យជាងកាលពីសម័យប្រឡងឆ្នាំមុនៗទៅទៀត។
លោក ហង់ជួន ណារ៉ុន ថ្លែងបែបនេះ ក្នុងពេលបង្ហាញចំណាប់អារម្មណ៍ ស្ដីពីការបូកសរុប ដំណើរការសំណេរ ការប្រឡងសញ្ញាបត្រមធ្យមសិក្សាទុតិយភូមិ ចំណេះទូទៅ សម័យប្រឡង ២៧-២៨ ធ្នូ ២០២១។
លោកថ្លែងថា៖ «បន្ទាប់ពីការការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) រយៈពេល ២ ថ្ងៃ នៅថ្ងៃទី ២៧-២៨ ធ្នូនេះទៅ យើងឃើញថា ដំណើការប្រឡង ដែលរៀបចំឡើង តាមអនុសាសន៍ដ៏ខ្ពង់ខ្ពស់ របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា ដំណើការទៅប្រកបដោយជោគជ័យក្នុងរយៈពេល ២ ថ្ងៃនេះ»។
លោកឱ្យដឹងថា ដើមឡើយការព្រួយបារម្ភកន្លងមករបស់ក្រសួង គឺការព្រួយបារម្ភខ្លាចការប្រឡងនេះ អាចបង្កើតឱ្យមាន បញ្ហាផ្សេងៗ ជាពិសេសភាពរអាក់រអួល ដោយសារកូវីដ ១៩ ប៉ុន្ដែជាលទ្ធផល គឺមិនមានកើតឡើងទេ។
លោកបញ្ជាក់ថា លទ្ធផលនេះ គឺដោយសារតែការដាក់ចេញ នូវវិធានការប្រយុទ្ធប្រឆាំងនូវជំងឺកូវីដ ១៩ ដ៏ត្រឹមត្រូវ ដែល លោក ហ៊ុន សែន បានដាក់ចេញ ជាពិសេសការផ្ដោតលើការចាក់វ៉ាក់សាំង ដល់ប្រជាជនបង្កើតភាពសាំនៅក្នុងសហគមន៍និងវិធានការ៣កុំ៣ការពារ។
វិធានការនេះ បានបង្កលក្ខណៈឱ្យការប្រឡងលើកនេះ ដំណើការដូចមុន។ ជាពិសេសទៅទៀត ស្ថានភាពនៅក្នុងមណ្ឌលប្រឡងមានភាពល្អប្រសើរជាងការប្រឡងកាលពីឆ្នាំមុនៗទៅទៀត។
បើតាមសេចក្ដីប្រកាសព័ត៌មាន របស់ក្រសួងអប់រំ ស្តីពីដំណើរការសំណេរនៃការប្រឡងនេះ បានឱ្យដឹងថា ដំណើរការសំណេរនៃការប្រឡង បានប្រព្រឹត្តទៅរយៈពេល២ថ្ងៃ គឺនៅថ្ងៃទី ២៧-២៨ ខែធ្នូ ឆ្នាំ ២០២១ ដោយមានមណ្ឌលប្រឡងចំនួន ២០៤ ចែកចេញជា ៤ ៦១៦ បន្ទប់ និងមានបេក្ខជនចុះឈ្មោះប្រឡង សរុបចំនួន ១១៤ ១៨៥ នាក់ ស្រី ៦០ ៣៩៧ នាក់ ។
ក្នុងនោះបេក្ខជនចំណេះទូទៅ ចំនួន ១០៤ ២៩៨ នាក់ ស្រី ៥៧ ១២៣ នាក់ និងបេក្ខជនបំពេញវិជ្ជា និងស្វៃរិនចំណេះទូទៅចំនួន ៩ ៨៨៧ នាក់ ស្រី ៣ ២៧៤ នាក់។
បេក្ខជនថ្នាក់វិទ្យាសាស្ត្រចំនួន ៣៩ ៦១០ នាក់ (ស្រី ២៣ ៦៨៣ នាក់) និងថ្នាក់ វិទ្យាសាស្ត្រសង្គមចំនួន ៧៤ ៥៧៥ នាក់ (ស្រី ៣៧ ៧១៤ នាក់)។
ក្នុងដំណើរការប្រឡងរយៈពេលពីរថ្ងៃនេះ បេក្ខជនអវត្តមានសរុប ៤ ៤៣០ នាក់ (ស្រី ១ ៨២៧ នាក់) ត្រូវជា ៣,៨៨ ភាគរយ នៃចំនួនបេក្ខជនចុះឈ្មោះប្រឡងសរុប។
បេក្ខជនមានបញ្ហាសុខភាពចំនួន ៣៦ នាក់ ក្នុងនោះបេក្ខជនមានជំងឺកូវីដ ១៩ ដែលជាកីឡាការិនី ចំនួន ២ នាក់ បេក្ខជនមានកម្ដៅលើសធម្មតា ដែលត្រូវដាក់ឱ្យប្រឡងនៅបន្ទប់ដាច់ដោយឡែកចំនួន ៣ នាក់ និងបេក្ខជនមានបញ្ហាសុខភាពដទៃទៀតចំនួន ៣១ នាក់។
ជារួម បេក្ខជនដែលមានបញ្ហាសុខភាពទាំងអស់ អាចបន្តការប្រឡងរហូតដល់ចប់ ក្រោមការយកចិត្តទុកដាក់ពីគណៈមេប្រយោគ ភ្នាក់ងារសុខាភិបាល និង អាជ្ញាធរពាក់ព័ន្ធ។
ក្រសួងអប់រំបញ្ជាក់ថា តាមការគ្រោងទុក លទ្ធផលនៃការប្រឡងនឹងត្រូវប្រកាសនៅតាមមណ្ឌលប្រឡងក្នុងរាជធានីភ្នំពេញ និងខេត្តកណ្តាល នារសៀលថ្ងៃទី១៨ ខែមករា ឆ្នាំ ២០២២ និងនៅតាមមណ្ឌលប្រឡង ក្នុងខេត្តផ្សេងទៀត នាថ្ងៃទី ១៩ ខែមករា ឆ្នាំ ២០២២ និងផ្សព្វផ្សាយតាមបណ្ដាញទំនាក់ទំនងសង្គមផ្លូវការ របស់ក្រសួងអប់រំ facebook.com/moeys.gov.kh៕