វ៉ាក់សាំងកូវីដ១៩ ប្រភេទ Pfizer ដែលផ្តល់ដោយប្រទេស អូស្រ្តាលី ដំណាក់កាលទី ២ ចំនួនជាង ១,៥ លានដូស ត្រូវបានដឹកមកដល់កម្ពុជាយប់ថ្ងៃទី២៨ ខែធ្នូ ឆ្នាំ ២០២១ នេះ ហើយវ៉ាក់សាំងនេះ នឹងត្រូវយកទៅចាក់ជូនជាដូសជំរុញ ឬ ដូសទី ៤។ នេះបើតាមការថ្លែងឱ្យដឹងពីលោកស្រី យក់ សម្បត្តិ រដ្ឋលេខាធិការក្រសួង សុខាភិបាល ក្នុងពេលចុះទទួលវ៉ាក់សាំងនាព្រលានយន្តហោះអន្តរជាតិភ្នំពេញ។
លោកស្រីបានឱ្យដឹងថា វ៉ាក់សាំងនេះត្រូវបានផ្តល់ទៅដល់ក្រុមខ្សែជួរមុខដែលមានមន្រ្តីសុខាភិបាល ហើយលោកស្រីស្នើឱ្យប្រជាពលរដ្ឋកុំមានការព្រួយបារម្ភ ដោយរាជរដ្ឋាភិបាលនឹងផ្តល់វ៉ាក់សាំងដូសជំរុញនេះទៅដល់ប្រជាពលរដ្ឋគ្រប់ផ្នែកទាំងអស់ដោយមិនមានការរើសអើងឡើយ។
លោកស្រី យក់ សម្បត្តិ មានប្រសាសន៍ថា៖ «វ៉ាក់សាំងនេះត្រូវរក្សាទុកក្នុងសីតុណ្ហភាពរហូតដល់ដក ៨០ (-80) អង្សារសេ ដែលជាហេតុយើងត្រូវធ្វើការទុកដាក់ដោយប្រយ័ត្នប្រយែង និងយកចិត្តទុកដាក់ជាទីបំផុត។ គណៈកម្មការចំពោះកិច្ចចាក់វ៉ាក់សាំងកូវីដ១៩ ក្នុងក្របខ័ណ្ឌទូទាំងប្រទេសក៏បានប្រជុំពិភាក្សាគ្នារួចហើយដែរពីការបែងចែក ការដឹកជញ្ជូននូវវ៉ាក់សាំង Pfizer នេះ»។
លោកស្រីក៏បានបញ្ជាក់ដែរថា គណៈកម្មការចំពោះកិច្ចកំពុងតែធ្វើការសិក្សាលើការចាក់និងប្រើប្រាស់វ៉ាក់សាំង Pfizer នេះ ហើយលទ្ធផលនៃការប្រើប្រាស់ឬអាចចាក់ខ្វែងគ្នាជាមួយនឹងវ៉ាក់សាំងផ្សេងបានយ៉ាងណានោះ គឺគណៈកម្មការបច្ចេកទេសនឹងធ្វើការប្រកាសនៅ ២ សប្តាហ៍ខាងមុខទៀត។
គួរបញ្ជាក់ផងដែរថា រដ្ឋាភិបាលអូស្រ្តាលី បានផ្តល់វ៉ាក់សាំងប្រភេទ Pfizer ជាជំនួយទ្វេភាគីចំនួនជាង ២,៣លានដូសមកដល់រាជរដ្ឋាភិបាលនិងប្រជាជនកម្ពុជា ដែលការមកដល់លើកទី ១ កាលពីយប់ថ្ងៃទី២៦ ខែធ្នូ ឆ្នាំ ២០២១ ដែលលោកនាយករដ្ឋមន្រ្តី ហ៊ុន សែន បានអញ្ជើញទទួលដោយផ្ទាល់ចំនួន ៧៨៣ ០០០ដូស៕