.jpg)
ទិដ្ឋភាពវិមានឈ្នះឈ្នះកាលពីខែមិថុនា ឆ្នាំ ២០២១។ ហុង មិនា
ភ្នំពេញៈ រដ្ឋាភិបាលតាមរយៈក្រសួងការពារជាតិនឹងប្រារព្ធពិធីអបអរសាទរខួបទី ២៣ ឆ្នាំនៃទិវានយោបាយឈ្នះ-ឈ្នះនៅថ្ងៃទី ៣០-៣១ ធ្នូឆ្នាំនេះ ដើម្បីបង្ហាញពីសមិទ្ធផលនៃការបង្រួបបង្រួមជាតិដែលបាននាំមកនូវសុខសន្តិភាព និងការឯកភាពទឹកដីពេញលេញជាប្រវត្តិសាស្ត្រ បន្ទាប់ពីបែកបាក់តាំងពីក្រោយចក្រភពអង្គរ។
ក្នុងសន្និសីទសារព័ត៌មានកាលពីថ្ងៃទី ២៧ ខែធ្នូ អគ្គនាយកនៃអគ្គនាយកដ្ឋាននយោបាយ និងកិច្ចការបរទេសក្រសួងការពារជាតិកម្ពុជា លោក ណឹម សុវត្ថិ បានថ្លែងថា ការប្រារព្ធទិវានយោបាយឈ្នះឈ្នះ ឬហៅថាទិវាបញ្ចប់សង្គ្រាមស៊ីវិល ដើម្បីជាការរំឭក និងលើកកម្ពស់ការយល់ដឹងដល់ប្រជាជនពាក់ព័ន្ធនឹងទិវានេះ។
លោកថា៖ «ខ្ញុំជឿជាក់ថាការប្រារព្ធទិវានេះ គឺជាការលើកកម្ពស់ការបង្ហាញឱ្យឃើញជាក់ស្តែងជ្រួតជ្រាប មិនត្រឹមតែសម្រាប់កម្ពុជាសន្តិភាពទេគឺសម្រាប់មនុស្សជាតិទូទៅផងដែរ ដែលយើងបានឃើញកន្លងមកនេះយើងបានចាប់អារម្មណ៍មួយនៅពេលដែលមានការបិទបើកជាមួយបញ្ហាកូវីដ ១៩ នេះ មានការយកចិត្តទុកដាក់ទស្សនកិច្ចពីគណៈប្រតិភូបរទេសនៅកម្ពុជា គឺមានច្រើន»។
លោកបានចាត់ទុកថា ដំណើរទស្សនកិច្ចនេះគឺជាការយកចិត្តទុកដាក់របស់គណៈប្រតិភូបរទេស ដែលចាប់ផ្តើមស្វែងយល់ពីកម្ពុជាដែលបានកសាងសន្តិភាពពេញលេញនាពេលកន្លងមក។ លោកថា ទិវានេះនឹងក្លាយជាមរតក សម្រាប់មនុស្សជំនាន់ក្រោយឱ្យយល់កាន់តែច្បាស់ និងខិតខំការពារថែរក្សា សុខសន្តិភាព សុខដុមរមនារបស់ប្រជាជន។
លោកបានបញ្ជាក់ផងដែរថា ការបញ្ចប់សង្គ្រាមដោយនយោបាយឈ្នះ-ឈ្នះ គឺជាទស្សនវិជ្ជាសនិ្តភាព និងមានការប្តេជ្ញាចិត្តខាងនយោបាយដ៏មុតមាំរបស់លោកនាយករដ្ឋមន្ត្រី ហ៊ុន សែន ។
លោកថា៖ «នយោបាយឈ្នះឈ្នះមានឫសគល់ពិតប្រាកដជាក់ស្តែង ជាសច្ចភាពប្រវត្តិសាស្ត្រ ហើយការដឹកនាំប្រកបដោយមគ្គុទ្ទេសក៍របស់សម្តេចតេជោ នៅតែជាកម្រិតអស្ចារ្យសម្រាប់ប្រវត្តិសាស្ត្រជាតិយើងហើយក៏រួមចំណែកជាមួយដំណើរនៃការស្វះស្វែងរកការបញ្ចប់សង្គ្រាម»។
លោក ណឹម សុវត្ថិ ឱ្យដឹងដែរថា ការប្រារព្ធពិធីនេះនឹងធ្វើឡើងក្រោមអធិបតីភាព ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងារសាងសង់វិមានឈ្នះឈ្នះ លោក ទៀ បាញ់ តំណាងលោកនាយករដ្ឋមន្ត្រី ហ៊ុន សែន។
បើតាមលោក ណឹម សុវត្ថិ ទិវានយោបាយឈ្នះឈ្នះនឹងប្រារព្ធឡើងក្នុងបរិវេណវិមានឈ្នះឈ្នះចាប់ពីថ្ងៃទី ៣០ រហូតដល់យប់រំលងអធ្រាត្រថ្ងៃទី ៣១ ខែធ្នូ ឆ្នាំ ២០២១ ដើម្បីអបអរសាទរខួប ២៣ ឆ្នាំ (២៩ ធ្នូ ១៩៩៨-២៩ ធ្នូ ២០២១) នៃទិវានយោបាយឈ្នះឈ្នះដែលបានបញ្ចប់សង្គ្រាមស៊ីវិលនៅកម្ពុជា និងខួបលើកទី ៣ នៃការដាក់ឱ្យដំណើរការជាសាធារណៈវិមានឈ្នះឈ្នះនេះ។
ពិធីនេះនឹងមានការរៀបចំស្តង់តាំងពិព័រណ៍សមិទ្ធផលនានានៅតាមបណ្តាអង្គភាពចំណុះឱ្យក្រសួងការពារជាតិព្រមទាំងមានការបាញ់កាំជ្រួច ការប្រគំតន្ត្រី និងពិធីកម្សាន្តនានាជាច្រើនទៀត ដើម្បីបង្ហាញពីការអបអរសាទរនៃទិវាដ៏សំខាន់សម្រាប់មាតុភូមិកម្ពុជា។
គោលការណ៍នយោបាយឈ្នះ-ឈ្នះគឺការដាក់ចេញនូវគោលការណ៍គន្លឹះសម្រាប់ធានាសុវតិ្ថភាព ៣ យ៉ាង ទី ១- ការធានានូវសុវតិ្ថភាពខាងផ្នែកសន្តិសុខផ្ទាល់ខ្លួនរបស់បុគ្គល និងគ្រួសារដែលស្ម័គ្រចិត្តបញ្ចប់សង្គ្រាម និងការប្រយុទ្ធ ហើយវិលត្រឡប់មករួមរស់នៅក្នុងចរន្តគោលនៃសង្គមជាតិវិញ។
ទី ២- ការធានានូវសុវតិ្ថភាពខាងផ្នែកអាជីពដោយផ្តល់ជូនអ្នកទាំងនោះនូវលទ្ធភាពគ្រប់គ្រាន់ក្នុងការបន្តមុខរបរ និងការរកស៊ីចិញ្ចឹមជីវិតដែលគេធ្លាប់មានកន្លងមក និងទី ៣- ការធានានូវសុវតិ្ថភាពខាងផ្នែកកម្មសិទិ្ធដែលគេធ្លាប់មាន និងកាន់កាប់ក្នុងរយៈពេលកន្លងមក ដោយគ្មានការដកហូត ឬរុះរើឡើយ។
គួររំឭកថា សំណង់វិមានឈ្នះ-ឈ្នះបានចាប់ផ្តើមសាងសង់ឡើងកាលពីខែកុម្ភៈ ឆ្នាំ ២០១៦ លើទំហំដី ៨ ហិកតាស្ថិតនៅសង្កាត់ព្រែកតាសេក ខណ្ឌជ្រោយចង្វារ ប៉ែកខាងជើងរាជធានីភ្នំពេញ។ សំណង់ នេះត្រូវបានចាត់ទុកជាសំណង់និមិត្តរូបនៃសុខសន្តិភាពដែលកម្ពុជាទទួលបាន ក្រោយពីបញ្ចប់សង្គ្រាមស៊ីវិលដ៏រ៉ាំរ៉ៃជាច្រើនទសវត្សរ៍កន្លងមក។ បន្ទាប់ពីបើកសម្ពោធជាផ្លូវការកាលពីចុងខែធ្នូ ឆ្នាំ ២០១៨ វិមានអនុស្សាវរីយ៍ «នយោបាយឈ្នះ-ឈ្នះ» ក៏បានបើកទទួលភ្ញៀវទេសចរឱ្យចូលទស្សនាផងដែរ ដើម្បីបានស្វែងយល់ពីប្រវត្តិសាស្ត្ររបស់កម្ពុជា។
ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជា លោក គិន ភា បានថ្លែងថា ការរៀបចំទិវានយោបាយឈ្ន ឈ្នះ មានសារៈសំខាន់ដើម្បីជាការរំឭកឱ្យប្រជាពលរដ្ឋខ្មែរបានចងចាំតម្លៃនៃសន្តិភាព ស្ថិរភាពនយោបាយ និងការបង្រួបបង្រួមជាតិ។
លោកបានបញ្ជាក់ថា៖ «ទិវានេះក៏ធ្វើឱ្យប្រជាពលរដ្ឋខ្មែរបាននឹកឃើញនូវការខិតខំប្រឹងប្រែងរបស់ថ្នាក់ដឹកនាំ ជាពិសេសសម្តេចតេជោ ហ៊ុន សែន ដែលបានខិតខំប្រឹងប្រែងនាំមកនូវសន្តិភាពពេញលេញសម្រាប់ប្រទេសកម្ពុជា ហើយយើងក៏គួរចងចាំមេរៀនប្រវត្តិសាស្ត្រដែលឈឺចាប់ប្រកបដោយសោកនាដកម្ម និងបញ្ចៀសការដើរជាន់ដានប្រវត្តិសាស្ត្រ»៕
