កណ្ដាលៈ លោក ស ខេង ឧបនាយករដ្ឋមន្ត្រី រដ្ឋមន្ដ្រីក្រសួងមហាផ្ទៃឱ្យក្រសួងសង្គមកិច្ច អតីតយុទ្ធជន និងយុវនីតិសម្បទាដឹកនាំអន្តរក្រសួងពាក់ព័ន្ធរៀបចំសេចក្ដីប្រកាសរួម ដើម្បីផ្ទេរអនីតិជនប្រព្រឹត្ដល្មើសពីពន្ធនាគារមកដាក់នៅមណ្ឌលយុវនីតិសម្បទាថ្មីស្ថិតនៅស្រុកកណ្ដាលស្ទឹងឱ្យស្របទៅតាមច្បាប់ ខណៈបច្ចុប្បន្ន អនីតិជនដែលត្រូវបានបានឃុំខ្លួនតាមពន្ធនាគារមានជាង ១ ៤០០ នាក់។
លោក ស ខេង បានថ្លែងក្នុងពេលអញ្ជើញជាអធិបតីនៃពិធីសម្ពោធដាក់ឱ្យប្រើប្រាស់ មណ្ឌលយុវនីតិសម្បទាស្ថិតនៅឃុំបាគូរ ស្រុកកណ្ដាលស្ទឹង ខេត្តកណ្ដាល កាលពីថ្ងៃទី ២៨ ធ្នូ ថា មណ្ឌលនេះ គឺជាសមិទ្ធផលថ្មីមួយទៀតរបស់រាជដ្ឋាភិបាលដែលចាត់ទុកជាសមិទ្ធផលប្រវត្ដិសាស្ដ្រដំបូងបង្អស់នៅព្រះរាជាណាចក្រកម្ពុជា ដែលកន្លងមកមិនទាន់មានមណ្ឌលបែបនេះនៅឡើយទេ។ មណ្ឌលនេះ គឺសំដៅទទួលយកអនីតិជន ដែលមានទំនាស់នឹងច្បាប់ ដើម្បីអប់រំ កែប្រែខ្លួនឱ្យក្លាយជាយុវជនល្អនៅក្នុងសង្គម-កម្ពុជា។ ការបង្កើតមណ្ឌលនេះឡើង សមស្របទៅនឹងស្ថានភាព និងបរិបទជាក់ស្ដែងនៃកម្ពុជា ដោយផ្អែកទៅនឹងច្បាប់ជាតិ និងវិធានជាបទដ្ឋានអប្បបរមានៃអង្គការសហប្រជាជាតិសម្រាប់គ្រប់គ្រងវិស័យយុត្តិធម៌អនីតិជន និងវិធានរបស់អង្គការសហប្រជាជាតិសម្រាប់ការងារអនីតិជនដែលត្រូវបានដកហូតសិទ្ធិសេរីភាព។
លោក ស ខេង បញ្ជាក់ថា៖ «ឥឡូវថ្ងៃនេះយើងយកមកតែ ៥០ នាក់ ដើម្បីជាការសាកល្បង។ ប៉ុន្ដែយើងអត់ទាន់មានលិខិតបទដ្ឋានគតិយុត្ដគ្រប់គ្រាន់ទេ។ បើសិនយើងមិនធ្វើប្រកាសអន្តរក្រសួង គឺក្រសួងសង្គមកិច្ច ក្រសួងយុត្ដិធម៌ ក្រសួងមហាផ្ទៃ និងក្រសួងការងារ ត្រូវរៀបចំជាប្រកាសអន្តរក្រសួងមួយ ដើម្បីគ្រប់គ្រងមណ្ឌលយុវនីតិសម្បទា និងដើម្បីផ្ទេរអនីតិជនពីពន្ធនាគារ»។ ការធ្វើប្រកាសនេះ ក្នុងនោះក្រសួងសង្គមកិច្ចទទួលខុសត្រូវក្នុងការគ្រប់គ្រងមណ្ឌលនេះផ្ទាល់ គ្រប់គ្រងលើការផ្គត់ផ្គង់ លើការចំណាយទាំងអស់។ ក្រសួងយុត្តិធម៌ ទាក់ទងនឹងការផ្ទេរអ្នកទោស និងសេវាច្បាប់ផ្សេងៗ។ ក្រសួងការងារទាក់ទងនឹងការបណ្ដុះបណ្ដាលវិជ្ជាជីវៈ ចំណែកក្រសួងមហាផ្ទៃទាក់ទងនឹងរឿងសន្តិសុខជាដើម។
លោកឧបនាយករដ្ឋមន្ត្រីបញ្ជាក់ថា៖ «ដូច្នេះត្រូវធ្វើ ហើយខ្ញុំស្នើថា ឯកឧត្ដម វង សូត ជាអ្នកផ្តួចផ្ដើម ព្រាងឡើងនូវប្រកាសអន្តរក្រសួងនឹងភ្លាមជាបន្ទាន់ ព្រោះបើយើងផ្ទេរមកពិតមែនជារឿងផ្ទៃក្នុងរបស់យើង ប៉ុន្ដែវាខុសច្បាប់។ អ៊ីចឹងហើយត្រូវជំរុញអាហ្នឹង។ ឃើញថា ផ្ទេរមកនៅស្ងៀមៗ ផ្ទេរអ្នកទោសពីនោះមកមានបំណងអី គេចោទយើងបាន អាហ្នឹង»។
បើតាមលោក ស ខេង បច្ចុប្បន្នចំនួនអនីតិជន ដែលត្រូវបានឃុំខ្លួននៅពន្ធនាគារទូទាំងប្រទេសមានចំនួនសរុប ១ ៤២២ នាក់។ ក្នុងនោះជនត្រូវចោទ ៤៥០ នាក់ ជនជាប់ចោទមាន ៣១០ នាក់ ពិរុទ្ធជនមាន ៤២១ នាក់ និងទណ្ឌិត ២៤១ នាក់។ ប្រភេទបទល្មើសអនីតិជនទាំងនេះ មានពាក់ព័ន្ធនឹងគ្រឿងញៀន ៤៥២ នាក់ ស្មើនឹង ៣១,៨ ភាគរយ។ ប្លន់និងលួចមានស្ថានទម្ងន់ទោស ១២៥ នាក់ ស្មើនឹង ៨, ៧៩ ភាគរយ។ លួច ១០៩ នាក់ ស្មើនឹង ៧,៦៧ ភាគរយ។ មនុស្សឃាត និងឃាតកម្ម ៣៤ នាក់ ស្មើនឹង ២,៣៩ ភាគរយ។ រំលោភសេពសន្ថវៈ ៣១ នាក់ ស្មើនឹង ២,១៨ ភាគរយ និងផ្សេងៗមានចំនួន ៦៧១ នាក់ ស្មើនឹង ៤៧,៧២ ភាគរយ។
លោកបញ្ជាក់ថា៖ «ដោយឡែកថ្ងៃនេះគឺយើងបានបញ្ជូនមកមណ្ឌលយុវនីតិសម្បទា តែ ៥០ នាក់ទេ ដើម្បីជាការសាកល្បង ដែលក្នុងនោះមានអនីតិជនប្រព្រឹត្ដល្មើសពាក់ព័ន្ធគ្រឿងញៀន ២៦ នាក់ លួច ២២ នាក់ ប៉ុនប៉ងសម្លាប់ ១ នាក់ និងរួមភេទ ១ នាក់។ នេះជាបញ្ហាដែលយើងមានការបារម្ភណាស់ ទាក់ទងនឹងទំពាំងស្នងឫស្សី បើទំពាំងវាពុក ពីឥឡូវទៅហើយ បានអីស្នងកើត។ នេះជាបញ្ហាអនាគតសម្រាប់ប្រទេសយើង»។
លោក វង សូត រដ្ឋមន្ត្រីក្រសួងសង្គមកិច្ច ថ្លែងក្នុងពិធីនេះដែរថា ការកសាងមណ្ឌលយុវនីតិសម្បទាពិតជាមានសារៈសំខាន់ ដែលជាទឡ្ហីករណ៍មួយ បង្ហាញពីការយកចិត្តទុកដាក់របស់ថ្នាក់ដឹកនាំនៃរាជរដ្ឋាភិបាលលើការជំរុញការអនុវត្តច្បាប់ស្តីពីយុត្តិធម៌អនីតិជន តាមរយៈការពង្រឹងប្រសិទ្ធភាពការអប់រំ បណ្ដុះបណ្ដាល និងការស្តារនីតិសម្បទាស្របតាមស្ថានភាពវិវឌ្ឍន៍ជាក់ស្តែងរបស់កម្ពុជា។
អាស្រ័យដោយស្ថានភាព និងតម្រូវការជាក់ស្ដែងក្នុងពេលបច្ចុប្បន្ន ក៏ដូចជាពេលអនាគត ក្រសួងបានស្នើសុំ និងទទួលបានគោលការណ៍ពីរាជរដ្ឋាភិបាល ដើម្បីអភិវឌ្ឍ និងរៀបចំកសាង មណ្ឌលផ្តល់សេវាចាំបាច់មួយចំនួនបន្ថែមទៀតនៅលើផ្ទៃដី បុរី-កុមារ មិត្តភាពកម្ពុជា-បារាំង-ហុងគ្រីចំនួន ១២៥ ២៩០ ម៉ែត្រការ៉េ ស្ថិតនៅឃុំបាគូរ ស្រុកកណ្ដាលស្ទឹងនេះ។
លោកបានបញ្ជាក់ថា៖ «ជារួមមណ្ឌលនេះពុំត្រឹមតែជាកន្លែងទុកដាក់អនីតិជនប្រព្រឹត្តល្មើសនឹងច្បាប់ប៉ុណ្ណោះទេតែជាកន្លែងអប់រំបណ្ដុះបណ្ដាលវិជ្ជាជីវៈដើម្បីឱ្យក្លាយទៅជាធនធានមនុស្សសម្រាប់សង្គមជាតិនាពេលអនាគតស្របតាមឆន្ទៈដ៏មោះមុតរបស់រាជរដ្ឋាភិបាល ជាពិសេសក្នុងការឈានទៅសម្រេចគោលដៅ គ្មាននរណាម្នាក់ ត្រូវបានបំភ្លេចចោល ហើយមណ្ឌលនេះ ជាសមិទ្ធផលមួយថ្មីទៀត លើទឹកដីសន្តិភាព គឺជាចំណងដ៏ថ្លៃថ្លា មិនអាចកាត់ថ្លៃបានរបស់រាជរដ្ឋាភិបាល»។
បើតាមលោក វង សូត មណ្ឌលយុវនីតិសម្បទា នេះមានផ្ទៃដីទំហំ ៤៨ ៨៣០ ម៉ែត្រការ៉េ។ មណ្ឌលនេះបានបើកការដ្ឋានសាងសង់ កាលពីថ្ងៃទី ៣០ ខែមីនា ឆ្នាំ ២០២០។ ដោយចំណាយថវិកាសរុបប្រមាណជិត ៤ លានដុល្លារអាមេរិក។
ក្រសួងសង្គមកិច្ចបានសហការជាមួយក្រសួងពាក់ព័ន្ធរៀបចំរចនាសម្ព័ន្ធគ្រប់គ្រង ដែលជំហានដំបូង មានមន្ត្រីបម្រើការងារសរុបចំនួន ៦៥ នាក់ក្នុងនោះមាន ក្រសួងសង្គមកិច្ចចំនួន ៥០ នាក់ និងក្រសួងមហាផ្ទៃមានចំនួន ១៥ នាក់។
មណ្ឌលនេះមានបន្ទប់សម្រាប់មន្ត្រីបំពេញការងារ និងមន្ដ្រីស្នាក់នៅ បន្ទប់ទទួលភ្ញៀវ បន្ទប់ថែទាំ និងបន្ទប់សម្រាប់អនីតិជនស្នាក់នៅចំនួន ៩២ បន្ទប់ ដែលអាចទទួលអនីតិជនមកស្នាក់នៅរហូតដល់ ១ ១៤០ នាក់។ ប៉ុន្តែសម្រាប់ជំហានសាកល្បងដំបូងនេះ ក្រសួងសង្គមកិច្ចទទួលដាក់អនីតិជនត្រឹមចំនួន ៥០ នាក់សិនប៉ុណ្ណោះ ជំហានបន្ទាប់សម្រាប់ត្រីមាសទី ១ ឆ្នាំ ២០២២ ក្រសួងមានគម្រោងបង្កើនចំនួនអនីតិជនរហូតដល់ ៤០០ នាក់៕
វីដេអូ៖