.jpg)
ជំនួបរវាងលោក ហ៊ុន សែន និងឯកអគ្គរាជទូតជប៉ុនពីថ្ងៃ ២៨ ធ្នូ។ រូបថត AKP
ភ្នំពេញៈ កម្ពុជា និងជប៉ុនបានសម្រេចឯកភាពគ្នារៀបចំខួប ៣០ ឆ្នាំនៃប្រតិបត្តិការរក្សាសន្តិភាព (PKO) នៅឆ្នាំ ២០២២ ដើម្បីពង្រឹងកិច្ចសហប្រតិបត្តិការលើវិស័យការពារជាតិនៃប្រទេសទាំង ២។
ការឯកភាពគ្នានេះ ត្រូវបានធ្វើឡើងនៅក្នុងជំនួបពិភាក្សាការងាររវាងលោកនាយករដ្ឋមន្ត្រី ហ៊ុន សែន និងលោក Masahiro Mikami ឯកអគ្គរាជទូតជប៉ុន ប្រចាំនៅកម្ពុជាកាលពីថ្ងៃទី ២៨ ខែធ្នូ ឆ្នាំ ២០២១។
លោក Masahiro Mikami ថ្លែងនៅក្នុងជំនួបនោះថា ឆ្នាំ ២០២២ គឺជាខួប ៣០ ឆ្នាំនៃប្រតិបត្តិការរក្សាសន្តិភាព (PKO) ជប៉ុននឹងត្រៀមបញ្ជូននាវាស្វ័យការពារជើងទឹកមកចុះចតនៅកម្ពុជាហើយក៏នឹងអញ្ជើញ លោក ហ៊ុន ម៉ាណែត ទៅទស្សនកិច្ចផ្លូវការនៅប្រទេសជប៉ុនផងដែរ។
ចំពោះវិស័យកិច្ចសហប្រតិបត្តិការក្នុងតំបន់ ជាពិសេសកិច្ចសហប្រតិបត្តិការលើវិស័យអាស៊ាន ជប៉ុនបានផ្ដល់រថយន្តមួយចំនួន ជូនដល់ក្រសួងការបរទេស និងផ្តល់នូវសម្ភារមួយចំនួនដែរ ហើយជប៉ុនក៏នឹងត្រៀមផ្ដល់នូវកិច្ចសហប្រតិបត្តិការលើការគាំទ្រដល់កម្ពុជា ធ្វើយ៉ាងណាឱ្យកម្ពុជាទទួលបាននូវភាពជោគជ័យក្នុងនាមជាប្រធានអាស៊ាន នាពេលខាងមុខ។
បើតាមលោក Masahiro Mikami ចំពោះកិច្ចសហប្រតិបត្តិការរវាងកម្ពុជា និងជប៉ុន ដែលក្នុងនោះមានលើវិស័យសុខាភិបាល ដែលជប៉ុនបានផ្ដល់វ៉ាក់សាំង AstraZeneca មកដល់កម្ពុជាចំនួន ៣០ ម៉ឺនដូស និងការត្រៀមផ្ដល់ជំនួយដល់កម្ពុជាជាបន្តទៀតដែលនឹងត្រូវចុះហត្ថលេខានៅពេលខាងមុខ និងរួមជាមួយនឹងការគាំទ្ររបស់ជប៉ុនធ្វើយ៉ាងណាជំរុញកំពង់ផែក្រុងព្រះសីហនុឱ្យទៅជាកំពង់ផែស្នូលរបស់កម្ពុជា។
ជាការឆ្លើយតប លោក ហ៊ុន សែន បានថ្លែងអំណរគុណ ចំពោះរាជរដ្ឋាភិបាល និងប្រជាជនជប៉ុន ដែលបានជួយដល់កម្ពុជានារយៈពេលកន្លងមក ជាពិសេសថ្មីៗនេះ ដែលបានជួយលើការផ្ដល់វ៉ាក់សាំងប្រឆាំងកូវីដ ១៩ មកដល់កម្ពុជា និងបានផ្តល់ជំនួយដទៃទៀតជាបរិក្ខារផ្សេងៗ ដើម្បីប្រយុទ្ធប្រឆាំងជំងឺកូវីដ ១៩។
លោកនាយករដ្ឋមន្ត្រីក៏បានថ្លែងអំណរគុណ ចំពោះការផ្ដល់ជារថយន្ត ការផ្ដល់ជាសម្ភារ កិច្ចសហប្រតិបត្តិការក៏ដូចជាការគាំទ្រដើម្បីធ្វើយ៉ាងណាឱ្យកម្ពុជាទទួលបាននូវភាពជោគជ័យនៃកិច្ចប្រជុំអាស៊ាននាពេលខាងមុខ។
ជាមួយគ្នានេះ លោកនាយករដ្ឋមន្ត្រីបានថ្លែងថា ក្នុងខួប ៣០ ឆ្នាំនៃប្រតិបត្តិការរក្សាសន្តិភាព (PKO) នៅឆ្នាំ ២០២២ ភាគីទាំង ២ គប្បីធ្វើខួបនេះឱ្យក្លាយទៅជាការពង្រឹង និងពង្រីកកិច្ចសហប្រតិបត្តិការរវាងប្រទេសទាំង ២ លើវិស័យការពារជាតិ ហើយលោកបានស្វាគមន៍ចំពោះការអញ្ជើញ លោក ហ៊ុន ម៉ាណែត ទៅធ្វើទស្សនកិច្ចផ្លូវការនៅប្រទេសជប៉ុន និងការចូលចតនៃនាវាស្វ័យការពារជើងទឹកនៅកម្ពុជាផងដែរ៕
