.jpg)
កម្មករនៅរោងចក្រក្នុងក្រុងបាវិតខេត្តស្វាយរៀងដែលសន្លប់ពីឆ្នាំ ២០២០។ រូបថត សហការី
ភ្នំពេញៈ ក្រុមការងារទប់ស្កាត់ករណីសន្លប់ និងបង្ការគ្រោះថ្នាក់ការងាររបស់កម្មករនិយោជិត តាមសហគ្រាស គ្រឹះស្ថាន (ទ.ស.ប.ក) នៃរបបសន្តិសុខសង្គម (ប.ស.ស) រកឃើញមូលហេតុចម្បងៗចំនួន ៧ ចំណុចដែលបណ្តាលឱ្យមានករណីដួលសន្លប់របស់កម្មករនៅតាមបណ្តារោងចក្រ ខណៈក្នុងឆ្នាំ ២០២១ នេះ មានករណីកម្មករនិយោជិតសន្លប់ចំនួន ៣ រោងចក្រ។
ការរកឃើញនេះត្រូវបានប្រកាសនៅក្នុងកិច្ចប្រជុំរបស់ក្រុមការងារ ទ.ស.ប.ក កាលពីរសៀលថ្ងៃទី ២៧ ធ្នូ នាសាលប្រជុំធំនៃ ប.ស.ស ស្នាក់ការកណ្ដាល រាជធានីភ្នំពេញ ដោយមានការចូលរួមពីភាគីពាក់ព័ន្ធ ដែលកិច្ចប្រជុំនេះ គឺជាកិច្ចប្រជុំលើកដំបូងនៅក្នុងឆ្នាំ ២០២១ បន្ទាប់ពីស្ថានភាពនៃជំងឺកូវីដ ១៩ បានធូរស្រាលឡើងវិញ។
លោក ប៉ុក វណ្ណថាត ទីប្រឹក្សាអមក្រសួងការងារ និងបណ្តុះបណ្តាលវិជ្ជាជីវៈ និងជាប្រធានក្រុមការងារទប់ស្កាត់ករណីសន្លប់ និងបង្ការគ្រោះថ្នាក់ការងាររបស់កម្មករនិយោជិត តាមសហគ្រាសគ្រឹះស្ថាននៃ ប.ស.ស បានលើកឡើងថា បើទោះបីជាស្ថិតក្នុងស្ថានភាពដ៏លំបាកនៃការរីករាលដាលនៃជំងឺកូវីដ ១៩ យ៉ាងណាក៏ដោយក្រុមការងារ ទ.ស.ប.ក នៅតែបន្តសកម្មភាពអនុវត្តកិច្ចការងាររបស់ខ្លួន។ នៅក្នុងឆ្នាំ ២០២១ មានករណីកម្មករនិយោជិតសន្លប់ចំនួន ៣ រោងចក្រ មានកម្មករនិយោជិតជាស្ត្រីសរុប ៣៨ នាក់ ហើយភាគច្រើននៃកម្មករនិយោជិតដួលសន្លប់ ដោយផ្តើមចេញពីកម្មករនិយោជិតសន្លប់ម្នាក់ ឬ ២ នាក់ប៉ុណ្ណោះ បន្ទាប់មកមានកម្មករនិយោជិតបានដួលសន្លប់តៗគ្នាជាបន្តបន្ទាប់ ដែលគេហៅថាជាជំងឺស្នេហ៍ហ្វូង។
លោកបានបញ្ជាក់ថា៖ «យោងតាមរបាយការណ៍របស់ក្រុមការងារ ទ.ស.ប.ក បានបង្ហាញឱ្យឃើញថា តាមរយៈការសិក្សាស្រាវជ្រាវទៅលើករណីកម្មករនិយោជិតដួលសន្លប់កន្លងមក ឃើញថា មូលហេតុចម្បងៗដែលបណ្តាលឱ្យមានករណីសន្លប់កើតមានឡើងគឺបណ្តាលមកពី ១- បញ្ហាគីមី ២- បញ្ហារូបសាស្ត្រ ៣- បញ្ហាជីវសាស្ត្រ ៤- បញ្ហាចិត្តសាស្ត្រសង្គម ៥- បញ្ហាមេកានិក ៦- បញ្ហាវិទ្យាសាស្ត្ររៀបចំការងារ និង ៧- បញ្ហាការងារបន្ថែមម៉ោងជាដើម»។
លោក ប៉ុក វណ្ណថាត បានបញ្ជាក់ថា៖ «ក្នុងចំណោមបញ្ហាទាំងអស់ ដែលក្រុមការងារបានស្វែងរកឃើញខាងលើនេះ គឺបញ្ហាចិត្តសាស្ត្រសង្គម បញ្ហារូបសាស្ត្រ និងបញ្ហាជីវសាស្ត្រ មានភាគរយខ្ពស់ជាងគេ»។
លោក អាត់ ធន់ ប្រធានសហភាពការងារកម្ពុជាបានប្រាប់ភ្នំពេញប៉ុស្តិ៍នៅថ្ងៃទី ២៨ ធ្នូថា ជារៀងរាល់ឆ្នាំតាមការអង្កេត គឺមានកម្មករដួលសន្លប់ចន្លោះពី ១ ០០០ ទៅ ១ ៥០០ នាក់។ ប៉ុន្តែតួលេខនៃឆ្នាំចុងក្រោយនេះ គឺឃើញមានការថយចុះគួរឱ្យកត់សម្គាល់។ កត្តាដែលដួលសន្លប់នេះ គឺដូចអ្វីដែលបានរកឃើញអ៊ីចឹងខណៈការចុះអង្កេតដោយផ្ទាល់ គឺនៅតាមសហគ្រាស រោងចក្រ នៅតែមានការខ្វះចន្លោះនៅក្នុងការអនុវត្តវិធានសុខភាពសុវត្ថិភាពនៅកន្លែងធ្វើការ។ លោក អាត់ ធន់ បន្តថា ចំពោះការសាងសង់អគារការងាររបស់សហគ្រាសគ្រឹះស្ថាន គឺនៅតែកើតមាន ការមិនទាន់សាងសង់ត្រូវតាមស្តង់ដា។
លោកបញ្ជាក់ថា៖ «ជាងនេះទៅទៀត យើងក៏ឃើញការធ្វេសប្រហែសរបស់និយោជក ដែលបានសាងសង់ទីតាំងមានទំហំធំ ហើយបិទទ្វារជិតមិនមានខ្យល់ចេញចូលល្អ បណ្តាលឱ្យក្តៅខ្លាំង ក៏នៅតែជាបញ្ហាធំដែរ ស្របពេលនៅតាមបណ្តារោងចក្រទាំងនោះ គឺមានការប្រើប្រាស់សារធាតុគីមី មិនមានស្លាកសញ្ញាច្បាស់លាស់ទៀត»។
នៅពេលក្រុមការងារក្រសួងបានរកឃើញអំពីមូលហេតុទាំងនេះ លោក អាត់ ធន់ រំពឹងថា ក្រសួងនឹងមានវិធានការឱ្យបានល្អប្រសើរចំពោះរោងចក្រសហគ្រាស គ្រឹះស្ថាន ដែលមិនទាន់អនុវត្តបានត្រឹមត្រូវឱ្យអនុវត្តវិធានការឱ្យបានត្រឹមត្រូវវិញ និងចុះត្រួតពិនិត្យរាល់កន្លែងធ្វើការនានា ដើម្បីបង្ការការដួលសន្លប់របស់កម្មករកម្ពុជា។
លោក កាំង ម៉ូនីកា អគ្គលេខាធិការរងនៃសមាគមរោងចក្រកាត់ដេរនៅកម្ពុជា (GMAC) និយាយថា ក្នុងចំណោមកត្តាទាំង ៧ GMAC ឃើញថា កត្តាចម្បងដែលនាំឱ្យមានការសន្លប់ ឬទន់ដៃទន់ជើងនោះ គឺទី ១ កត្តាចិត្តសាស្ត្រសង្គម ដែលកម្មករមានជំងឺតានតឹងអារម្មណ៍ និងការភិតភ័យតៗគ្នា។ ចំពោះកត្តាចម្បងទី ២ គឺកត្តាជីវសាស្ត្រ Biology ដែលការបរិភោគអាហារមិនទៀងទាត់របស់កម្មករ និងការមិនមានចំណេះដឹងគ្រប់គ្រាន់អំពីអាហារូបត្ថម្ភ Nutrition និងបញ្ហាសុខភាពផ្ទាល់ខ្លួនរបស់កម្មករមួយចំនួនមានភាពទន់ខ្សោយ ដែលមិនមែនបង្កឡើងមកពីស្ថានភាពរោងចក្រទាំងស្រុងនោះទេ។
ដូច្នេះលោក កាំង ម៉ូនីកា បញ្ជាក់ថា៖ «GMAC គឺជាសមាជិករបស់ក្រុមការងារទប់ស្កាត់ករណីសន្លប់ និងបង្ការគ្រោះថ្នាក់ការងាររបស់កម្មករនិយោជិត យើងមានផែនការការងារប្រចាំឆ្នាំ ក្នុងនោះមានការផ្តោតជាចម្បងលើការអប់រំផ្សព្វផ្សាយ និងបណ្តុះបណ្តាលដល់ទាំងកម្មករនិយោជិត និងអ្នកគ្រប់គ្រងរោងចក្រ»៕
វីដេអូ៖
