ភ្នំពេញៈ ក្រសួងសាធារណការ និងដឹកជញ្ជូន ព្រមានចាត់វិធានការច្បាប់ទៅលើរថយន្តធុនធ្ងន់ដែលនៅតែបន្តដឹកជញ្ជូនលើសទម្ងន់កម្រិតកំណត់ ២០ ភាគរយដោយឃាត់រថយន្តយកទៅរក្សាទុករយៈពេល ១ ឆ្នាំ ដោយគ្មានការលើកលែង។ នេះបើយោងតាមសេចក្តីជូនដំណឹងរបស់ក្រសួងសាធារណការ និងដឹកជញ្ជូន ចុះថ្ងៃទី ២៧ ខែធ្នូ ឆ្នាំ ២០២១។
ការព្រមាននេះធ្វើឡើងក្រោយពីមន្ត្រីមានសមត្ថកិច្ចប្រចាំស្ថានីយជញ្ជីងអចល័ត និងជញ្ជីងចល័ត បានបង្ក្រាប និងស្ទាក់ចាប់បានបទល្មើសថ្មីចំនួន ៧៥ គ្រឿង។
យោងតាមសេចក្តីជូនដំណឹងដដែលនោះបានឱ្យដឹងថា ទោះបីជាគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ បានធ្វើការផ្សព្វផ្សាយ អប់រំណែនាំច្បាប់ និងលិខិតបទដ្ឋានគតិយុត្តអស់រយៈពេលជាច្រើនឆ្នាំ ព្រមទាំងបានចេញសេចក្តីជូនដំណឹងបន្តបន្ទាប់ ក៏នៅតែមានម្ចាស់ក្រុមហ៊ុនដឹកជញ្ជូន ឬម្ចាស់រថយន្តធុនធ្ងន់ និងអ្នកបើកបររថយន្តធុនធ្ងន់មួយចំនួនតូច នៅតែព្រងើយកន្តើយ និងមិនព្រមចូលរួមអនុវត្តតាមបទប្បញ្ញត្តិច្បាប់ និងលិខិតបទដ្ឋានគតិយុត្តជាធរមានឱ្យបានត្រឹមត្រូវនៅឡើយ។
សេចក្តីជូនដំណឹងដដែលបានឱ្យដឹងបន្តថា រហូតមកដល់បច្ចុប្បន្ននេះ នៅតែមានរថយន្ត ដឹកជញ្ជូនលើសទម្ងន់កម្រិតកំណត់ ដែលផ្ទុកទម្ងន់លើសពី ២០ ភាគរយ ធ្វើចរាចរណ៍នៅលើបណ្តាញផ្លូវថ្នល់ ហើយត្រូវបានមន្ត្រីមានសមត្ថកិច្ចប្រចាំស្ថានីយជញ្ជីងអចល័ត និងជញ្ជីងចល័តនៃក្រសួងសាធារណការ និងដឹកជញ្ជូនធ្វើការ បង្ក្រាប និងស្ទាក់ចាប់បានចំនួន ៧៥ គ្រឿង។
សេចក្តីជូនដំណឹងនេះបានព្រមានថា៖ «ក្នុងករណីនៅតែបណ្តែតបណ្តោយឱ្យអ្នកបើកបរ ឬចរាចររថយន្តផ្ទុកទម្ងន់លើស កម្រិតកំណត់ ជាពិសេសការផ្ទុកទម្ងន់លើសពី ២០ (ម្ភៃ) ភាគរយ ឡើងទៅ ធ្វើចរាចរណ៍នៅតាមបណ្ដាញផ្លូវថ្នល់ នឹងត្រូវឃាត់ទុករថយន្តក្នុងរយៈពេល ១ ឆ្នាំ ស្របតាមមាត្រា ៦០ នៃច្បាប់ស្តីពីផ្លូវថ្នល់ ដោយគ្មានការលើកលែងតទៅទៀតឡើយ»។
ក្រសួងសាធារណការក៏បានធ្វើការក្រើនរំឭកសាជាថ្មីទៅកាន់ម្ចាស់ក្រុមហ៊ុនដឹកជញ្ជូន ម្ចាស់រថយន្តធុនធ្ងន់ ម្ចាស់ការដ្ឋានអាជីវកម្មថ្ម ម្ចាស់ដេប៉ូខ្សាច់ ម្ចាស់ការដ្ឋានជីកយកអាចម៍ដី ឬប្រតិបត្តិករដឹកជញ្ជូនធុនធ្ងន់ទាំងអស់ និងស្ថាប័នពាក់ព័ន្ធ ត្រូវចូលរួមអនុវត្តឱ្យបានម៉ឺងម៉ាត់ ដើម្បីពង្រឹងវិធានការអនុវត្តតាមបទប្បញ្ញត្តិច្បាប់ស្តីពីផ្លូវថ្នល់ និងលិខិតបទដ្ឋានគតិយុត្តពាក់ព័ន្ធឱ្យមានប្រសិទ្ធភាពខ្ពស់ និងប្រសិទ្ធផលល្អ។ «គណៈកម្មាធិការ ដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ សង្ឃឹមជឿជាក់ និងសូមអំពាវនាវដល់សមាគមដឹកជញ្ជូនទំនិញផ្លូវគោក សមាគមភ្នាក់ងារបញ្ជូនទំនិញកម្ពុជា ម្ចាស់ក្រុមហ៊ុនដឹកជញ្ជូន ម្ចាស់រថយន្តធុនធ្ងន់ ម្ចាស់ការដ្ឋានអាជីវកម្មថ្ម ម្ចាស់ដេប៉ូខ្សាច់ ម្ចាស់ការដ្ឋាន ជីកយកអាចម៍ដី ឬប្រតិបត្តិករដឹកជញ្ជូនធុនធ្ងន់ទាំងអស់ នឹងចូលរួមអនុវត្តតាមការក្រើនរំឭកសាថ្មីនៃសេចក្តីជូនដំណឹងនេះ ឱ្យបានម៉ឺងម៉ាត់បំផុត មានប្រសិទ្ធភាព និងដោយស្មារតីទទួលខុសត្រូវខ្ពស់»។
លោក គឹម បញ្ញា នាយកអង្គការ មូលនិធិបង្ការរបួសអាស៊ីប្រចាំនៅកម្ពុជាបានលើកឡើងថា វិធានការទាំងនេះគឺមិនមានអ្វីថ្មីនោះទេ គ្រាន់តែពេលកន្លងមក ដោយសារតែមានការអនុគ្រោះក្នុងពេលប្រទេសជួបវិបត្តិកូវីដ ១៩ រដ្ឋាភិបាល ក៏បានសម្រេចបន្ធូរបន្ថយ។ លោក បានបន្តថា ក្រោយពីវិធានការបន្ធូរបន្ថយបានអនុវត្តរួចហើយ ក្នុងពេលនេះ វាដល់ពេលហើយ ដែលក្រសួងត្រូវអនុវត្តវិធានការច្បាប់ដោយគ្មានលើកលែង ចំពោះយានយន្តដែលប្រព្រឹត្តល្មើសច្បាប់ ដើម្បីការពារផលប្រយោជន៍រួម។
លោកថា៖ «ផ្អែកទៅលើស្ថានភាពប្រឈមលើការវាយតម្លៃខាងស្ថាប័នរដ្ឋាភិបាល លោកអាចពិនិត្យមើលវិធានការកាន់តែធ្ងន់ធ្ងរជាងហ្នឹងបន្ថែមទៀត ក្នុងករណីអ្នកដែលបើកបរក្តី ក្រុមហ៊ុនក្តី គាត់មិនមានការរាងចាល។ មានតែការអនុវត្តវិធានការច្បាប់ឱ្យបានតឹងរ៉ឹងឱ្យបានម៉ឺងមាត់ បន្ទាប់ពីយើងបានធ្វើការផ្សព្វផ្សាយបានទូលំទូលាយរួចមកហើយ។ ព្រោះមានតែវិធានការទាំងនេះទេ ទើបមានប្រសិទ្ធភាព ជំរុញការចូលរួមគោរពច្បាប់ពីអ្នកប្រើប្រាស់ ផ្លូវ រួមទាំងរថយន្តដឹកទំនិញដែលអាចនឹងដឹកលើសកម្រិត»។
លោក គឹម បញ្ញា ក៏បានលើកឡើងដែរថា ដើម្បីចៀសវាងពីបទល្មើសទាំងនេះ ក្រុមហ៊ុនត្រូវធ្វើការឃ្លាំមើល និងពិនិត្យរាល់សកម្មភាពនានារបស់អ្នកបើកបររបស់ខ្លួន ខណៈក្រសួងសាធារណការ ក្រៅពីអនុវត្តច្បាប់ និងបន្តអប់រំផ្សព្វផ្សាយអំពីបទល្មើសទាំងនេះ គឺត្រូវពិនិត្យទៅលើទុក្ខលំបាករបស់អ្នកបើកបរ ឬម្ចាស់រថយន្តធំ ដើម្បីយកមកដោះស្រាយក្នុងពេលដែលប្រទេសជាតិកំពុងប្រឈមនឹងវិបត្តិកូវីដ ១៩ ផងដែរ។
កាលពីថ្ងៃទី ៣០ ខែកញ្ញា ឆ្នាំ ២០២១ លោកនាយករដ្ឋមន្ត្រី ហ៊ុន សែន បានប្រកាសលើកលែងបន្ធូរបន្ថយច្បាប់ ដោយបានប្រគល់រថយន្តដែលបានឃាត់ទុកដោយសារបទល្មើសដឹកលើសទម្ងន់កម្រិតកំណត់ចំនួន ២២៩ គ្រឿងទៅឱ្យម្ចាស់វិញក្រោយពីរក្សាទុករយៈពេល ១ ឆ្នាំ ដែលជាការផ្ដល់ឱកាសដល់ម្ចាស់រថយន្តទាំងនោះចូលរួមគោរពប្រតិបត្តិ និងអនុវត្តតាម បទប្បញ្ញត្តិច្បាប់ឱ្យម៉ឺងម៉ាត់ និងត្រឹមត្រូវទាំងអស់គ្នា៕