.jpg)
ជនសង្ស័យក្រោយចាប់ខ្លួនបានកាលពីថ្ងៃទី ២៧ ធ្នូ។ រូបថត ប៉ូលិស
សៀមរាប/ពោធិ៍សាត់ៈ នគរបាលខេត្តសៀមរាបនៅថ្ងៃទី ២៨ ធ្នូ បានប្រគល់បុរសជាជនសង្ស័យម្នាក់ឱ្យនគរបាលខេត្តពោធិ៍សាត់ បន្ទាប់ពីចាប់ខ្លួនបាន ១ ថ្ងៃនៅក្រុងសៀមរាបពាក់ព័ន្ធករណីកាប់បុរសម្នាក់ស្លាប់ក្នុងទំនាស់ពេលផឹកស៊ី នៅភូមិទួលរគាំង ឃុំអូរតាប៉ោង ស្រុកបាកានកាលពីយប់ថ្ងៃទី ២៦ ធ្នូ។
លោកឧត្តមសេនីយ៍ត្រី ភឹង ចន្ថារ៉េត ស្នងការរងទទួលផែនព្រហ្មទណ្ឌខេត្តសៀមរាប ប្រាប់នៅថ្ងៃទី ២៨ ធ្នូថា ជនសង្ស័យឈ្មោះ ញ៉ម អាន អាយុ ៣៧ ឆ្នាំ រស់នៅភូមិទួលរគាំង ឃុំអូរតាប៉ោង ស្រុកបាកាន ខេត្តពោធិ៍សាត់។ ជននេះត្រូវបានសមត្ថកិច្ចរបស់លោកចាប់ខ្លួនបាននៅក្រុងសៀមរាបកាលពីម៉ោងជាង ៧ យប់ថ្ងៃទី ២៧ ធ្នូ នៅភូមិខ្នា សង្កាត់ជ្រាវ ក្រុង-ខេត្ត សៀមរាប និងបានប្រគល់ឱ្យនគរបាលខេត្តពោធិ៍សាត់វិញនៅថ្ងៃទី ២៨ ធ្នូ។
លោកថា៖ «ករណីនេះនគរបាលខេត្តពោធិ៍សាត់សុំសហការជាមួយសមត្ថកិច្ចយើងតាមចាប់ជនសង្ស័យ។ ជនសង្ស័យម្នាក់នេះបានកាប់ជនរងគ្រោះម្នាក់ស្លាប់ ហើយគេចខ្លួនមកផ្ទះបងប្អូននៅខេត្តសៀមរាប»។
ពាក់ព័ន្ធនឹងការចាប់ខ្លួនជនសង្ស័យនេះ លោក ម៉ូ លីដា ស្នងការរងទទួលផែនការងារនគរបាលព្រហ្មទណ្ឌ ខេត្តពោធិ៍សាត់បានឱ្យដឹងនៅថ្ងៃទី ២៨ ធ្នូថា ជនរងគ្រោះឈ្មោះ វាំង សុខហេង ភេទប្រុស អាយុ ២៧ ឆ្នាំ ជាកសិកររស់នៅភូមិទួលរគាំង ឃុំអូរតាប៉ោង។ លោកថា ពេលនេះកំពុងបន្តនីតិវិធីស៊ើបសួរជនសង្ស័យទៀតនៅស្នងការដ្ឋាននគរបាលខេត្តពោធិ៍សាត់មុននឹងបញ្ជូនទៅសាលាដំបូងខេត្តពោធិ៍សាត់។
លោកបានបញ្ជាក់ថា៖ «ករណីនេះកម្លាំងនគរបាលយើងបានសហការជាមួយនគរបាលខេត្តសៀមរាប ហើយបន្ទាប់ពីទទួលយកជនសង្ស័យពីខាងខេត្តសៀមរាបមក យើងកំពុងបន្តនីតិវិធីដើម្បីកសាងសំណុំរឿងបញ្ជូនជនល្មើសទៅតុលាការ»។
លោក តាន់ គឹមជា នាយនគរបាលប៉ុស្តិ៍ឃុំអូរតាប៉ោង បានឱ្យដឹងនៅរសៀលថ្ងៃទី ២៨ ធ្នូថា កាលពីថ្ងៃទី ២៦ ធ្នូ មានបុរសជាអ្នកភូមិម្នាក់ឈ្មោះ ជុំ រ៉ុម បានហៅអ្នកជិតខាងឱ្យជួយច្រកស្រូវទុកក្នុងការុង។
លុះចប់ពីការងារនេះនៅពេលព្រលប់ថ្ងៃដដែល ឈ្មោះ ជុំ រ៉ុម ក៏បានហៅអ្នកជួយធ្វើការងារនោះមកហូបបាយជុំគ្នានៅផ្ទះរបស់គាត់។
លោកបានបន្តថា ពេលជុំគ្នាហូបបាយ និងមានផឹកស្រាផងនោះ ឈ្មោះ វាំង សុខហេង បាននិយាយទៅកាន់ជនសង្ស័យថា មានប្រពន្ធយូរឆ្នាំហើយ អត់មានកូន អ៊ីចឹងអន់ជាងសត្វមាន់ទៅទៀត។ ពេលនោះជនសង្ស័យខឹងក៏រត់ទៅយកកាំបិតពីផ្ទះមកវង់ផឹកស៊ីវិញ តែរកជនរងគ្រោះមិនឃើញ ហើយក៏ដើររកជួបគ្នាតាមផ្លូវក៏កាប់ត្រូវចំស្មាខាងឆ្វេង ១ កាំបិតដួលស្លាប់តែម្តង ហើយភ្លាមៗនោះក៏មានការផ្អើលឆោឡោពីអ្នកភូមិ តែជនល្មើសបានគេចខ្លួនបាត់។
លោក គឹមជា រំឭកប្រាប់ថា៖ «អស់គេ គេទៅផ្ទះ តែចំណែកជនល្មើសទៅដល់ផ្ទះហើយយកកាំបិតផ្គាក់ដើររកជនរងគ្រោះជួបនៅតាមផ្លូវក៏កាប់សម្លាប់តែម្តង។ ពេលនោះម៉ោងជាង ៩ យប់ទៅហើយ ម្យ៉ាងពេលនោះងងឹតទៀត ទើបជនសង្ស័យមានឱកាសរត់រួច»៕
