ភ្នំពេញៈ នគរបាល នៃមន្ទីរប្រឆាំងគ្រឿងញៀនបានបញ្ជូនជនសង្ស័យជាជនជាតិចិន ៩ នាក់ ទៅសាលាដំបូងរាជធានីភ្នំពេញនៅថ្ងៃទី ២៩ ធ្នូ បន្ទាប់ពីសមត្ថកិច្ចស្រាវជ្រាវចាប់ខ្លួនកាលពី ៥ ថ្ងៃមុន ករណីជួញដូរគ្រឿងញៀនជិត ៣៥០ គីឡូក្រាម ដែលសមត្ថកិច្ចបងក្រាបបាននៅភូមិសាស្ត្រខណ្ឌ ច្បារអំពៅ និង ខណ្ឌ ៧មករា។ យោងតាមលោក អ៊ីន សុង អ្នកនាំពាក្យមន្ទីរប្រឆាំងគ្រឿងញៀនបានប្រាប់ភ្នំពេញនៅរសៀលថ្ងៃទី ២៩ ធ្នូ។
លោកបញ្ជាក់ថា ក្រុមជនសង្ស័យទាំង៩នាក់ដែលកម្លាំងជំនាញនៃមន្ទីរប្រឆាំងគ្រឿងញៀនឃាត់ខ្លួនកាលពីថ្ងៃទី២៤ ធ្នូ ឆ្នាំ ២០២១។
លោកថ្លែងថា៖«ករណីក្រុមឧក្រិដ្ឋជននេះយើងបានបញ្ជូនទៅតុលាការហើយ។មន្ទីរបញ្ជូនទៅព្រឹកមិញ(ថ្ងៃទី២៩ ធ្នូ)»។
ពាក់ព័ន្ធករណីនេះយោងតាមគេហទំព័ររបស់អគ្គស្នងការដ្ឋាននគរបាលជាតិចុះផ្សាយនៅថ្ងៃទី២៩ ធ្នូ ឆ្នាំ ២០២១ បានសរសេរថា ប្រតិប្តិការនេះបានធ្វើឡើងកាលពីថ្ងៃទី ២៤ ខែធ្នូ ឆ្នាំ២០២១ វេលាម៉ោង១៧និង៥៥នាទី ។ សមត្ថកិច្ចជំនាញនៃមន្ទីរប្រឆាំងគ្រឿងញៀន(ក១) ដឹកនាំដោយលោក អ៊ិន សុង នាយករងមន្ទីរប្រឆាំងគ្រឿងញៀន លោក ម៉ាក់ សេរីវឌ្ឍនា នាយករងមន្ទីរ ប្រឆាំងគ្រឿងញៀន លោកហុង សុវណ្ណារិទ្ធ នាយការិយាល័យ(ក១)។ ប្រតិបត្តិការនេះដែរក៏មានការ ចូលរួមសហការពីកម្លាំងជំនាញនៃនាយកដ្ឋានស៊ើបការណ៍ខាងក្រៅ និងបច្ចេកទេស ព្រមទាំងសមត្ថកិច្ចគយនៅកំពង់ផែព្រះសីហនុ និងកម្លាំងជំនាញស្នងការដ្ឋាននគរបាលរាជធានីភ្នំពេញ។ ឯការសម្របសម្រួលផ្លូវច្បាប់គឺមានលោក ស៊ិត វណ្ណៈ ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញដែលផ្ដើមចេញពីកិច្ចសហប្រតិបត្តិការជាមួយសមត្ថកិច្ចចិន។
គេហទំព័របង្ហាញបន្តទៀតថា ករណីនេះបន្ទាប់ពីសមត្ថកិច្ចកម្ពុជា ទទួលបានព័ត៌មានហើយ ក៏បានបើកការស៊ើបអង្កេតអស់រយៈពេលជាង៤ខែ ទើបឈានទៅបង្ក្រាបព្រមគ្នានេះ។ ស្របពេលគ្នានេះ សមត្ថកិច្ចចិនក៏បានបង្ក្រាបក្រុមឧក្រឹដ្ឋជនពាក់ព័ន្ធ នៅឯប្រទេសចិនផងដែរ។
ដោយឡែកក្នុងប្រតិបត្តិការបង្ក្រាបគ្រឿងញៀននេះសមត្ថកិច្ចបានបង្ក្រាបនៅ២គោលដៅផ្សេងគ្នា គឺទី១នៅចំណុចវីឡាភ្លោះលេខ២១ ផ្លូវលេខ R03 ស្តាផ្លាទីនឹម បុរីប៉េងហូតបឹងស្នោ សង្កាត់និរោធ ខណ្ឌច្បារអំពៅនិងគោលដៅទី២ នៅចំណុច ភោជនីយដ្ឋានអីយិនម៉ាថូវ សង្កាត់បឹងព្រលឹត ខណ្ឌ៧មករា រាជធានីភ្នំពេញ សមត្ថកិច្ចឃាត់ខ្លួនបុរសជនជាតិចិន៩នាក់។
ចំពោះវត្ថុតាងចាប់យកមាន គ្រឿងញៀនប្រភេទ មេតំហ្វេតាមីន(ICE)សរុបរួមទម្ងន់ ៣៤៧ គីឡូក្រាម ៤២៧,៩៩ក្រាមដែលលាក់ក្នុងបំពង់ដែក ៣៦៧ដើម និង៦១កញ្ចប់ធំ ជញ្ជីងថ្លឹងគ្រឿងញៀន ២គ្រឿង និងសម្ភារវេចខ្ចប់មួយចំនួន។
រថយន្ត១គ្រឿង ម៉ាក TOYOTA ALPHARD ពាក់ស្លាក់លេខ ភ្នំពេញ 2BE-2973 ម៉ូតូ១គ្រឿងម៉ាក HONDA PCX ទូរស័ព្ទដៃ ចំនួន ១០គ្រឿង និង ប្រាក់ ៣០០ដុល្លារអាមេរិក។
ពាក់ព័ន្ធនឹងការចោទប្រកាន់ពីតំណាងអយ្យការអមសាលាដំបូងរាជធានីភ្នំពេញលើជនសង្ស័យទាំង៩នាក់យ៉ាងណានោះនៅរសៀលថ្ងៃទី២៩ ធ្នូ ភ្នំពេញប៉ុស្តិ៍បានទាក់ទងទៅលោកប្លង់ សុផល អ្នកនាំពាក្យអយ្យការអមសាលាដំបូងរាជធានីភ្នំពេញតែលោកមិនឆ្លើយតប៕