សៀមរាបៈ អាជ្ញាធរជាតិអប្សរាប្រកាសប្រាប់សាធារណជន ភ្ញៀវទេសចរជាតិ និងអន្តរជាតិដែលមានបំណងចង់ធ្វើការថតវីដេអូផ្សាយផ្ទាល់ (Live) អំពីប្រវត្តិប្រាសាទនានា ក្នុងរមណីយដ្ឋានអង្គរ និងតំបន់ផ្សេងទៀតស្ថិតក្រោមការគ្រប់គ្រងរបស់អាជ្ញាធរជាតិអប្សរា ត្រូវស្នើសុំការអនុញ្ញាតជាមុន ដើម្បីចៀសវាងកំហុសឆ្គងអចេតនា ដែលធ្វើឱ្យប៉ះពាល់ដល់គុណតម្លៃប្រាសាទខ្មែរ។
លិខិតជូនដំណឹងរបស់អាជ្ញាធរជាតិអប្សរា ស្តីពីការថតវីដេអូផ្សាយបន្តផ្ទាល់ក្នុងរមណីយដ្ឋានអង្គរ កាលពីថ្ងៃទី ២៨ ខែធ្នូ ឱ្យដឹងថា ការរៀបចំឱ្យមានការស្នើសុំមុនធ្វើការផ្សាយបន្តផ្ទាល់ពីប្រវត្តិប្រាសាទនេះ គឺដើម្បីចៀសវាងនូវកំហុសឆ្គងដោយអចេតនា ឬធ្វើឱ្យប៉ះពាល់ដល់គុណតម្លៃរបស់ប្រាសាទខ្មែរ ដែលជាមរតកមិនអាចកាត់ថ្លៃបានរបស់បុព្វបុរសខ្មែរ និងជាបេតិកភណ្ឌពិភពលោក។
អាជ្ញាធរជាតិអប្សរាបញ្ជាក់ថា៖ «មេត្តាដាក់សំណើសុំថតផ្សាយបន្តផ្ទាល់ អំពីប្រាសាទនានា ក្នុងរមណីយដ្ឋានអង្គរ ដែលមានលក្ខណៈផ្សព្វផ្សាយជាសាធារណៈ ដើម្បីជំរុញវិស័យទេសចរណ៍ គឺពុំតម្រូវឱ្យបង់ប្រាក់នោះទេ លើកលែងតែការស្នើសុំថតលក្ខណៈអាជីវកម្មដែលតម្រូវឱ្យអនុវត្តតាមនីតិវិធី និងគោលការណ៍ដែលបានកំណត់»។
អាជ្ញាធរជាតិអប្សរាបានបញ្ជាក់ក្នុងលិខិតជូនដំណឹងថា ចាប់តាំងពីមានវត្តមាននៃជំងឺឆ្លងកូវីដ ១៩ អាជ្ញាធរជាតិអប្សរាបានអនុញ្ញាតដោយឥតគិតថ្លៃ ជូនក្រុមហ៊ុន ឬមគ្គុទ្ទេសក៍ទេសចរ ដែលមានអាជ្ញាប័ណ្ណត្រឹមត្រូវ ពីក្រសួងទេសចរណ៍ធ្វើការថតឡាយវីដេអូតាមទូរស័ព្ទ ដើម្បីបកស្រាយអំពីប្រវត្តិសាស្ត្រប្រាសាទនានា ទៅដល់ភ្ញៀវរបស់ខ្លួនផងដែរ។ ដោយឡែក ក្នុងគោលដៅដើម្បីអាចគ្រប់គ្រងដោយប្រសិទ្ធភាពនូវការប្រកបអាជីវកម្ម ការថតសម្លៀកបំពាក់ប្រពៃណីបុរាណ (Pre-Wedding) ក៏ដូចជាចៀសវាង នូវភាពអនាធិបតេយ្យនានា ក្នុងតំបន់រមណីយដ្ឋានអង្គរ កន្លងមកអាជ្ញាធរជាតិអប្សរាក៏បានតម្រូវឱ្យសាធារណជន ដាក់ពាក្យស្នើសុំការថតសម្លៀកបំពាក់ប្រពៃណីបុរាណ មកអាជ្ញាធរជាតិអប្សរា ដើម្បីពិនិត្យ និងផ្តល់ការអនុញ្ញាតជូនដោយឥតគិតថ្លៃ។ តាមរយៈនេះ អាជ្ញាធរអប្សរាសង្កេតឃើញថា ប្រជាពលរដ្ឋបានចូលរួមអនុវត្តតាមការណែនាំគួរឱ្យកត់សម្គាល់។
លោក ងូវ គឺមស្រេង អ្នកមគ្គុទេ្ទសក៍ទេសចរនៅខេត្តសៀមរាប ថ្លែងនៅថ្ងៃទី ២៩ ធ្នូថា ការចេញលិខិតជូនដំណឹងពីសំណាក់អាជ្ញាធរជាតិអប្សរានេះ អាចបណ្តាលមកពីកន្លងមក មានអ្នកមគ្គុទេ្ទសក៍ទេសចរបានធ្វើវីដេអូផ្សព្វផ្សាយតាមបណ្តាញសង្គមយូធូបទាក់ទាញប្រជាប្រិយភាព ហើយយូធូបនោះទៀតសោត អាចរកចំណូលប្រចាំខែ ប្រចាំឆ្នាំទៀតផង។
លោក គឺមស្រេង ប្រាប់ថា តាមការយល់ឃើញរបស់លោក សម្រាប់ការថតផ្សាយផ្ទាល់និយាយបែបប្រវត្តិប្រាសាទមគ្គុទេ្ទសក៍ទេសចរម្នាក់ៗសុទ្ធតែមានឆ្លងកាត់វគ្គបណ្តុះបណ្តាល និងមានអាជ្ញាប័ណ្ណចេញដោយក្រសួងទេសចរណ៍ ហេតុនេះអ្នកទាំងនោះមានសិទ្ធិធ្វើ ប៉ុន្តែបើក្រសួងវប្បធម៌ ឬមួយអាជ្ញាធរជាតិអប្សរា ចង់បិទព័ត៌មាននោះ កុំឱ្យទូលំទូលាយពេក ដើម្បីទុកឱ្យភ្ញៀវទេសចរមកធ្វើការសិក្សាស្វែងយល់ដោយខ្លួនឯង នោះជាផ្នត់គំនិតផ្សេងមួយទៀត។
លោកបានបញ្ជាក់ថា៖ «ខ្ញុំគិតឃើញថា មិនអាក្រក់ទេ ប៉ុន្តែមនុស្សមានច្រើនផែនផ្នត់គំនិតខុសគ្នាមិនដឹងថា ទស្សនវិស័យ ចក្ខុវិស័យខាងអាជ្ញាធរជាតិអប្សរាមើលឃើញបានទូលំទូលាយជាងយើងវែងឆ្ងាយជាងយើងដូចខ្ញុំលើកឡើងអ៊ីចឹង បិទព័ត៌មានហ្នឹងទៅដើម្បីឱ្យគេបានមកដល់ទីតាំង»។
លោក ឡុង កុសល អ្នកនាំពាក្យអាជ្ញាធរជាតិអប្សរាថ្លែងនៅថ្ងៃទី ២៩ ខែធ្នូថា ការស្នើឱ្យមានការសុំច្បាប់អនុញ្ញាតមុននេះ គឺដើម្បីការពារកុំឱ្យមានការនិយាយពីប្រវត្តិសាស្ត្រប្រាសាទតាមការនឹកឃើញ ឬមិនត្រឹមត្រូវតាមវិជ្ជាជីវៈ ដែលជាហេតុធ្វើឱ្យអ្នកស្តាប់អាចយល់ច្រឡំ និងភ្លេចនូវប្រវត្តិសាស្ត្រពិត។ ចំពោះការផ្សាយផ្ទាល់របស់បងប្អូនប្រជាពលរដ្ឋជាសាធារណជនដែលបង្ហាញពីការទស្សនាប្រាសាទ និងចែករំលែកពីភាពសប្បាយរីករាយ ក្នុងការកម្សាន្តក្នុងតំបន់អង្គរនោះមិនមានបញ្ហាអ្វីឡើយ។
លោកថ្លែងថា៖ «យើងកុំទៅថតឡាយនិយាយពីប្រវត្តិសាស្ត្រប្រាសាទ បើសិនជាយើងមិនបានយល់ច្បាស់អំពីប្រវត្តិប្រាសាទនិយាយទៅធ្វើឱ្យប៉ះពាល់ និងខុសឆ្គងទៅវិញទេ វាមិនដូចអ្នកមគ្គុទេ្ទសក៍ទេ អ៊ីចឹងហើយបានកន្លងមកយើងក៏បានអនុញ្ញាតឱ្យអ្នកមគ្គុទេ្ទសក៍គាត់ធ្វើការផ្សាយចេញដែរ គ្រាន់តែយើងចង់ឱ្យគាត់ផ្តល់ខ្លឹមសារដែលគាត់នឹងឡាយចេញហ្នឹង ឱ្យយើងដឹងមុនថាគាត់ចង់និយាយអំពីអី»។
លោក កុសល លើកឡើងថា អាជ្ញាធរជាតិអប្សរាក៏មានបញ្ហាប្រឈមដែរនៅពេលដែលមានអ្នកទៅថតផ្សាយផ្ទាល់និយាយមិនល្អ និយាយខុសជុំវិញរឿងប្រវត្តិប្រាសាទ ឬធ្វើអ្វីមួយ មិនសមរម្យនៅបរិវេណប្រាសាទ។
លោកថ្លែងថា៖ «ភ្ញៀវទេសចរគាត់ឡើងជាន់លើថ្មប្រាសាទអីហ្នឹងក៏មកខឹងអាជ្ញាធរអប្សរា ថតផ្សាយនិយាយប្រវត្តិប្រាសាទខុសក៏មកខឹងអាជ្ញាធរអប្សរា ចង់និយាយថា អាជ្ញាធរជាតិអប្សរាចាំតែខុស អ៊ីចឹងយើងចង់ឱ្យសាធារណជនបានជ្រាបបានដឹង ហើយចូលរួមទទួលខុសត្រូវជាមួយគ្នាកុំមានអ្វីកើតឡើងបន្ទោសមកអាជ្ញាធរអប្សរា»៕
វីដេអូ៖