.jpg)
លោក ប៉ោ ប៊ុនស្រ៊ី (ស្តាំ) ពេលចូលគាល់ព្រះអង្គម្ចាស់ នរោត្តម ចក្រាវុធ ពីថ្ងៃទី ២៨ ធ្នូ។ រូបថត ហ្វេសប៊ុក
ភ្នំពេញៈ បន្ទាប់ពីមានការខ្វែងគំនិតគ្នាកន្លងមក លោក ប៉ោ ប៊ុនស្រ៊ី អតីតអនុប្រធានគណបក្សហ្វ៊ុនស៊ិនប៉ិច និងជាស្ថាបនិកគណបក្សហ្វ៊ុនស៊ិនប៉ិច បានប្រកាសគាំទ្រ ព្រះអង្គម្ចាស់ នរោត្តម ចក្រាវុធ ជាប្រធាន ដើម្បីដឹកនាំ និងដើម្បីតបស្នងព្រះគុណូបការៈរបស់សម្តេចក្រុមព្រះ នរោត្តម រណឫទ្ធិ និងសុំដង្ហែព្រះអង្គម្ចាស់គ្រប់កាលៈទេសៈ មុនពេលចាប់ផ្តើមសមាជគណបក្សនៅដើមឆ្នាំក្រោយ។
លោក ប៉ោ ប៊ុនស្រ៊ី អតីតអនុប្រធានគណបក្សហ្វ៊ុនស៊ិនប៉ិច បានសរសេរនៅក្នុងលិខិតគាំទ្រកាលពីថ្ងៃទី ២៨ ធ្នូថា លោកគាំទ្រព្រះអង្គម្ចាស់ នរោត្តម ចក្រាវុធ ជាព្រះប្រធានគណបក្សហ្វុ៊នស៊ិនប៉ិច ដើម្បីដឹកនាំគណបក្ស និងថែរក្សាកេរដំណែល ដ៏ពិសិដ្ឋរបស់សម្តេចតា ស្របតាមព្រះតម្រិះ ដ៏ថ្លៃថ្លា របស់សម្តេចក្រុមព្រះ នរោត្តម រណឫទ្ធិ។
លោកសរសេរថា៖ «ក្នុងនាមខ្ញុំជាស្ថាបនិកដែលបានដង្ហែ សម្តេចក្រុមព្រះ គ្រប់កាលៈទេសៈកន្លងមក ហើយដើម្បីតបស្នងគុណូបការៈដែលសម្តេចក្រុមព្រះធ្លាប់ផ្តល់មករូបខ្ញុំ ខ្ញុំសូមដង្ហែព្រះអង្គម្ចាស់នរោត្តម ចក្រាវុធ ជាបុត្រាជារៀងរហូតលុះអវសាន្ត»។
លោក ញឿន រ៉ាដែន អ្នកនាំពាក្យគណបក្សហ្វ៊ុនស៊ិនប៉ិច ប្រាប់ ភ្នំពេញ ប៉ុស្តិ៍ នៅថ្ងៃទី ២៩ ធ្នូថា លោក ប៉ោ ប៊ុនស្រ៊ី បានយល់ច្បាស់អំពីការដឹកនាំរបស់ព្រះអង្គម្ចាស់ ចក្រាវុធ ជាពិសេសលោកនៅតែប្តូរផ្តាច់ នឹកគុណដល់សម្តេចក្រុមព្រះនរោត្តម រណឫទ្ធិ ដែលផ្តល់មកដល់រូបគាត់ ជាពិសេស ដើម្បីជាតិទាំងមូល។
លោកបន្តថា លោក ប៉ោ ប៊ុនស្រ៊ី នឹងប្រកាសប្រមូលអ្នករាជានិយម និងអ្នកសីហនុនិយម ដែលបានខ្វែងគំនិតគ្នាកន្លងមកនេះ ដើម្បីឱ្យមករួមរស់ជាមួយគណបក្ស និងគាំទ្រព្រះអង្គម្ចាស់ចក្រាវុធ ធ្វើជាប្រធានដឹកនាំ គណបក្សឱ្យជោគជ័យនៅពេលខាងមុខ។
លោកថ្លែងថា៖ «តាមបទពិសោធ និងប្រវត្តិរូបដែលធ្លាប់ធ្វើជាអនុប្រធានទី២ ព្រឹទ្ធសភាគាត់ជាចាស់ទុំមួយរូប ដែលបានដង្ហែខ្ជាប់ខ្ជួនជាមួយនឹងសម្តេចក្រុមព្រះ គឺគាត់ជាអ្នកប្រមែប្រមូលអ្នកគាំទ្រនៅថ្នាក់មូលដ្ឋានមួយរូបដែរ ហើយអ្វីទាំងអស់នេះ ព្រះអង្គម្ចាស់ចក្រាវុធបានស្វាគមន៍ និងគាត់មានលទ្ធភាពបម្រើគណបក្ស ទៅមុខទៀត ដើម្បីខ្លាំងក្លាបន្ថែមទៀត»។
បើតាមលោក ញឿន រ៉ាដែន ស្របពេលជាមួយគ្នានេះ គណបក្សក៏នៅតែប្រកាន់ជំហរ រៀបចំធ្វើសមាជនៅដើមឆ្នាំក្រោយដដែល ដោយសុំការគាំទ្រពីសមាជិក-សមាជិកា និងអ្នកគាំទ្រ ដើម្បីថ្វាយតួនាទីដល់ព្រះអង្គម្ចាស់ នរោត្តម ចក្រាវុធ ជាប្រធានដឹកនាំគណបក្សហ្វ៊ុនស៊ិនប៉ិច ដើម្បីដឹកនាំគណបក្សចូលរួមការបោះឆ្នោតនាពេលខាងមុខៗ។
លោក ផាន់ សិទ្ធី ដែលត្រូវបានគណបក្សហ្វ៊ុនស៊ិនប៉ិចបណ្តេញចេញថ្លែងថា សមាជិក-សមាជិកាទាំងអស់មិនដែលប្រឆាំងនឹង ព្រះអង្គម្ចាស់ នរោត្តម ចក្រាវុធ ធ្វើជាប្រធានគណបក្សហ្វុ៊នស៊ិនប៉ិចទេ ប៉ុន្តែមានចំណុចមួយចំនួនដែលព្រះអង្គម្ចាស់ ចក្រាវុធ បានធ្វើកន្លងមក គឺខុសទំនង ហើយថ្នាក់ដឹកនាំតែងតែថ្វាយយោបល់ ប៉ុន្តែស្តាប់ ឬមិនស្តាប់ អាស្រ័យលើព្រះអង្គម្ចាស់។
បើតាមលោក ផាន់ សិទ្ធី លោក ប៉ោ ប៊ុនស្រ៊ី ក៏ស្ថិតនៅក្នុងគណៈកម្មាធិការនាយកដែរ ប៉ុន្តែឥឡូវនេះ គាត់បានទៅក្រាបបង្គំគាល់ព្រះអង្គម្ចាស់ ចក្រាវុធ ដែលនេះជាសិទ្ធិរបស់គាត់ និងបង្ហាញថា ពួកយើងទាំងអស់គ្នានៅតែគាំទ្រ និងស្រឡាញ់ បុត្ររបស់សម្តេចក្រុមព្រះដដែលទេ។ ប៉ុន្តែសម្រាប់ការជាប់ជាប្រធានគណបក្សវិញ គឺអាស្រ័យទៅលើសមាជគណបក្សដែលត្រូវធ្វើនាពេលខាងមុខ។
លោកថា លោកស្វាគមន៍គ្រប់ពេល ដើម្បីចូលរួមជាមួយនឹងគណបក្សហ្វ៊ុនស៊ិនប៉ិចបើសិនជាព្រះអង្គម្ចាស់ចក្រាវុធកោះហៅរូបលោក និងអ្នកផ្សេងទៀត ទៅប្រជុំ និងរកដំណោះស្រាយដែលស្របតាមព្រះគំនិតរបស់ព្រះអង្គម្ចាស់ចក្រាវុធលើកឡើងពីការបង្រួបបង្រួម និងឯកភាពគ្នានៅក្នុងគណបក្សទើបទទួលបានជោគជ័យ។
លោកបញ្ជាក់ថា៖ «ខ្ញុំបានប្រាប់ហើយ បើសិនជាលោក (ព្រះអង្គម្ចាស់ចក្រាវុធ) មិនហៅខ្ញុំទេ ខ្ញុំអត់អាចទៅកើតទេ។ ខ្ញុំឃើញតែលោកដេញខ្ញុំ ប៉ុន្តែអត់ឃើញលោកហៅ ហើយដេញក៏មិនដេញផ្ទាល់មាត់ទេ គឺដេញសរសេរក្រដាស ហើយក្រដាសនោះបង្ហោះតាមហ្វេសប៊ុកទៀត។ អ៊ីចឹងខ្ញុំអត់អាចទទួលយកបានទេ បើខ្ញុំទៅរកលោក ខ្ញុំគិតថា មិនទៅទេ»៕
វីដេអូ៖
