.jpg)
លោក ហ៊ុន សែន និងលោកទៀ បាញ់ ក្នុងពិធីសម្ពោធអគារក្រសួងការពារជាតិនៅថ្ងៃទី ២៩ ធ្នូ។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន ឱ្យបណ្ដាអង្គភាពទាំងអស់ទូទាំងកងយោធពលខេមរភូមិន្ទ សន្សំសំចៃលើការប្រើប្រាស់អគ្គិសនី សម្រាប់ជាផ្នែកមួយ ប្រឆាំងនឹងភាពខ្ជះខ្ជាយ ខ្វះការសន្សំសំចៃ ដែលជាការឆ្លើយតបទៅនឹងការលុបបំណុលជាង ២ លានដុល្លារ ដែលក្រសួងការពារជាតិ បានប្រើប្រាស់អគ្គិសនី ជំពាក់អគ្គិសនីកម្ពុជានាពេលកន្លងមក។
លោកនាយករដ្ឋមន្ដ្រីបានថ្លែង បែបនេះ ក្នុងពេលអញ្ជើញជាអធិបតី ក្នុងពិធីសម្ពោធដាក់ឱ្យប្រើប្រាស់ជាផ្លូវការ នូវអគាររដ្ឋបាល និងសាលប្រជុំទីស្តីការក្រសួងការពារជាតិថ្មី នៅថ្ងៃទី ២៩ ខែ ធ្នូ ឆ្នាំ ២០២១។
លោកបានអបអរសាទរចំពោះសមិទ្ធផលថ្មីនៃអគាររដ្ឋបាល និងសាលប្រជុំ នៃក្រសួងការពារជាតិ ដែលត្រូវបានសាងសង់ថ្មី និងបានសម្ពោធដាក់ឱ្យប្រើប្រាស់នាពេលនេះ។ លោកក៏បានថ្លែងអំណរគុណដល់ភាគីពាក់ព័ន្ធលើការសាងសង់អគារថ្មីរបស់ក្រសួងការពារជាតិនេះក្នុងនោះមានសាធារណរដ្ឋប្រជាមានិតចិន និងសាធារណរដ្ឋសង្គមនិយមវៀតណាម។
តបតាមការស្នើសុំរបស់ លោក ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិនៅក្នុងពិធីនេះ លោក ហ៊ុន សែន បានអំពាវនាវដល់ក្រសួងរ៉ែ និងថាមពល និងអគ្គិសនីកម្ពុជា ក៏ដូចជាក្រសួងសេដ្ឋកិច្ច និងហិរញ្ញវត្ថុពិនិត្យលទ្ធភាពលុបបំណុលអគ្គិសនីជាង ២ លានដុល្លារអាមេរិក ដែលក្រសួងការពារជាតិបានប្រើប្រាស់នាពេលកន្លងមក។
លោកថ្លែងថា៖ «អ៊ីចឹងតែជាង ២ លានដុល្លារទេ សូមឱ្យអគ្គិសនីកម្ពុជាធ្វើការពិនិត្យ។ តើអគ្គិសនីកម្ពុជាអាចនឹងលុបបំណុលបានប៉ុន្មាន? ហើយក្រៅពីនោះក្រសួងសេដ្ឋកិច្ច និងហិរញ្ញវត្ថុ អាចនឹងចេញប៉ុន្មាន? អាចចែកគ្នាចេញ»។
លោកបានបញ្ជាក់ថា ម្ខាងគឺខាងក្រុមហ៊ុនអគ្គិសនីកម្ពុជាដែលជាអ្នកម្ចាស់បំណុល។ អ៊ីចឹងបានថា តើអគ្គិសនីកម្ពុជាអាចមានលទ្ធភាពលុបចោលបំណុលទាំងជាង ៩ ពាន់លានរៀល ស្មើនឹងជាង ២ ពាន់លានដុល្លារនេះ ទាំងស្រុង ឬក៏អាចជួយលុបពាក់កណ្ដាល ឬ ៧០ ភាគរយ ក្រៅពីនោះ បំពេញដោយក្រសួងសេដ្ឋកិច្ច និងហិរញ្ញវត្ថុ។ ប៉ុន្ដែលោកមិនទាន់ឆ្លើយដាច់ណាត់ទេ។
លោកនាយករដ្ឋមន្ដ្រីបញ្ជាក់ថា៖ «តែមានរឿងមួយដែលខ្ញុំត្រូវទាមទារវិញ ខ្ញុំនឹងចេញបទបញ្ជា ដើម្បីឱ្យពិនិត្យអំពីបញ្ហាការរៀបចំដើម្បីនឹងបន្ថែមថវិកា ការប្រើប្រាស់អគ្គិសនីប្រចាំឆ្នាំ ព្រោះតម្រូវការនៅពេលដែលកសាងអគារនេះមួយ តើតម្រូវការនៃការកើនឡើងនៃការប្រើប្រាស់អគ្គិសនីប៉ុនណា។ នេះជាចំណុចរបស់យើង គឺឃើញនៅកន្លែងហ្នឹង»។
លោកបានលើកឡើងថា អគ្គិសនីដែលប្រើប្រាស់ពីមុនត្រឹមតែ ៣០ មេហ្គាវ៉ាត់ប៉ុណ្ណោះ នៅទីក្រុងភ្នំពេញ។ ប៉ុន្ដែឥឡូវនេះ មិនមែន ៣០ មេហ្គាវ៉ាត់ទៀតទេ។ ៣០ មេហ្គាវ៉ាត់កន្លែងខ្លះប្រើប្រាស់ត្រឹមតែ ២០ អគារគឺអស់ ៣០ មេហ្គាវ៉ាត់បាត់ទៅហើយ ដែលនេះជាការរីកចម្រើនរបស់ប្រទេសជាតិ។
លោកនាយករដ្ឋមន្ដ្រីបញ្ជាក់ថា៖ «ប៉ុន្ដែប្រសិនបើយើងដាក់ការសន្សំសំចៃចូលទៅក្នុងកិច្ចការ គ្រប់ស្ថាប័នទាំងអស់ យើងអាចមានចំណែកដើម្បីសន្សំនូវថវិកានោះ។ ភាពខ្ជះខ្ជាយ ខ្វះការសន្សំសំចៃ តាមរយៈការបើកម៉ាស៊ីនត្រជាក់ចោល ហើយការប្រើប្រាស់ម៉ាស៊ីនត្រជាក់ សីតុណ្ហភាពត្រជាក់ពេក ក៏វាស៊ីភ្លើងខ្លាំងដែរ»។ អ៊ីចឹងលោកក៏សូមត្រឡប់មកវិញ ទន្ទឹមនឹងលោកអំពាវនាវប្រាប់ទៅអគ្គិសនីកម្ពុជា និងប្រាប់ទៅក្រសួងសេដ្ឋកិច្ច និងហិរញ្ញវត្ថុទៅលើបញ្ហាការសង ក៏ដូចជាការបន្ថែមឥណទាន សម្រាប់ការទូទាត់នូវថ្លៃភ្លើងសម្រាប់ឆ្នាំបន្ត។
លោកបញ្ជាក់ថា៖ «ខ្ញុំក៏សូមត្រឡប់មកវិញនូវបណ្ដាអង្គភាពទាំងអស់ទូទាំងកងយោធពលខេមរភូមិន្ទ ឱ្យសន្សំសំចៃក្នុងការប្រើប្រាស់អគ្គិសនី ដែលនេះជាផ្នែកមួយ ប្រឆាំងនឹងភាពខ្ជះខ្ជាយ ខ្វះការសន្សំសំចៃ»។
លោក កែវ រតនៈ អគ្គនាយកអគ្គិសនីកម្ពុជា មិនអាចទាក់ទងដើម្បីសុំត្ថាអធិប្បាយលើបញ្ហានេះបានទេ។
បើតាមក្រសួងការពារជាតិ អគាររដ្ឋបាលសាលប្រជុំទីស្តីការក្រសួងការពារជាតិថ្មីនេះ ត្រូវបានសាងសង់នៅលើទីតាំងចាស់ដែលមានទទឹងប្រវែង ២៨ ម៉ែត្រ បណ្តោយប្រវែង ១៩១ ម៉ែត្រ និងកម្ពស់ ៣២ ម៉ែត្រ និងមានចំណតរថយន្ត នៅជាន់ក្រោមដី ១ ជាន់ អាចចតរថយន្តបានចំនួន ១៥០ គ្រឿង។ សរុបផ្ទៃក្រឡាប្រើប្រាស់រួម ទូទាំងអគារមាន ៣០ ៩៧៩ ម៉ែត្រការ៉េ (ស្មើនឹង ១០ដង នៃទំហំអគារចាស់)។ អគាររដ្ឋបាល និងសាលប្រជុំទីស្តីការក្រសួងការពារជាតិថ្មី បានបើកការដ្ឋានសាងសង់ កាលពីថ្ងៃទី ៣០ ខែ មិថុនា ឆ្នាំ ២០១៨ ក្រោមអធិបតីភាពលោក ទៀ បាញ់ហើយតាមគម្រោងផែនការសាងសង់មានរយៈពេល ៣៦ ខែ និងបញ្ចប់ការដ្ឋាននៅថ្ងៃទី ៣០ ខែ មិថុនា ឆ្នាំ ២០២១។ ប៉ុន្ដែដោយសារវិបត្តិជំងឺកូវីដ ១៩ ការសាងសង់ត្រូវបានស្នើសុំពន្យារកិច្ចសន្យារយៈពេល ៤ ខែ ដូច្នេះការសាងសង់ត្រូវពន្យាររហូតដល់ថ្ងៃទី ៣០ ខែ តុលា ឆ្នាំ ២០២១ ទើបបានបញ្ចប់ការសាងសង់៕
