.jpg)
បុរសម្នាក់ម៉ូតូ ១ គ្រឿង ជិះឆ្លងកាត់អង្គភាពប្រឆាំងអំពើពុករលួយ នាពេលកន្លងទៅ។ ហុង មិនា
ក្រចេះៈ អង្គភាពប្រឆាំងអំពើពុករលួយ (ACU) បានប្រគល់ប្រាក់ ប្រមាណ ៧៤ ម៉ឺនដុល្លារ ជូនបេក្ខជនដែលជ្រើសរើសឱ្យចូលក្របខ័ណ្ឌក្នុងចំណោម ១២៩ នាក់ ក្រោយពីបានដកហូតយកមកវិញពីមន្ត្រីមន្ទីរសុខាភិបាលខេត្តក្រចេះ ២ រូប ដែលទារពីបេក្ខជនក្នុងចំណោមទាំងនោះ។
មន្ត្រីមន្ទីរសុខាភិបាលខេត្តក្រចេះ ២ រូបនេះ បានទារ និងទទួលប្រាក់ពីបេក្ខជនក្នុងចំណោមនោះប្រមាណ ៧៤ ម៉ឺនដុល្លារ ហើយស្ថាប័នអយ្យការអមសាលាដំបូងខេត្តក្រចេះ បានធ្វើការចោទប្រកាន់ពីបទ វីតិក្រម ពាក់ព័ន្ធសំណុំរឿងក្តីពុករលួយ ដែលកំពុងស្ថិតក្នុងនីតិវិធីនៃការស៊ើបអង្កេតរបស់ចៅក្រមស៊ើបសួរនៃសាលាដំបូងខេត្តនេះ។
យោងតាមក្រមព្រហ្មទណ្ឌមាត្រា ៥៩២ និងមាត្រា ៥៩៣ បានចែងថា បទល្មើសវីតិក្រម គឺជាអំពើរបស់អ្នករាជការសាធារណៈ ឬពលរដ្ឋទទួលអាណត្តិដោយការបោះឆ្នោត ដែលទាមទារ ឬទទួលជាសិទ្ធិ ជាពន្ធ ជាអាករនូវចំនួនទឹកប្រាក់ដែលខ្លួនបានដឹងថា មិនត្រូវបង់ ឬដែលលើសពីចំនួនដែលត្រូវបង់ ហើយបទចោទនេះ អាចនឹងប្រឈមផ្តន្ទាទោសដាក់ពន្ធនាគារពី ២ ទៅ ៥ ឆ្នាំ និងពិន័យជាប្រាក់ចន្លោះពី ៤ លាន ដល់ ១០ លានរៀល។
សេចក្តីជូនដំណឹងរបស់ ACU ចុះថ្ងៃទី ២៧ ធ្នូ បានឱ្យដឹងថា ករណីខេត្តក្រចេះ ឈ្មោះ ទឺ ប៊ុនឡេង ប្រធានការិយាល័យរដ្ឋបាល និងបុគ្គលិក និងឈ្មោះ ជាង សុខអេង អនុប្រធានការិយាល័យ រដ្ឋបាល និងបុគ្គលិកនៃមន្ទីរសុខាភិបាល ខេត្តក្រចេះ គឺពិតជាបានរកឃើញថា បានទារ និងទទួលប្រាក់ពីបេក្ខជនដែលមានលក្ខណសម្បត្តិក្នុងការជ្រើសរើសឱ្យចូលក្របខ័ណ្ឌមន្ត្រីសុខាភិបាលក្រចេះពិតប្រាកដមែន។
លោក ទឺ ប៊ុនឡេង ប្រធានការិយាល័យរដ្ឋបាលមន្ទីរសុខាភិបាលខេត្តក្រចេះ ដែលបានទារ និងទទួលប្រាក់ពីបេក្ខជនដែលមានលក្ខណសម្បត្តិក្នុងការជ្រើសរើសឱ្យចូលក្របខ័ណ្ឌមន្ត្រីសុខាភិបាលក្រចេះ។ រូបថត ហ្វេសប៊ុក
ACU បានបញ្ជាក់ថា ចំនួនទឹកប្រាក់ដែលបានរកឃើញទាំងនេះ គឺបានទារ និងទទួលក្នុងចំណោមបេក្ខជន ១២៩ នាក់ ដោយមានចំនួន ៧៤ ម៉ឺនដុល្លារ។
ACU បានបន្តថា៖ «ដោយបានការអនុញ្ញាតភ្លាមៗពីតុលាការខេត្តក្រចេះ ACU បានប្រគល់លុយជូនដល់ជនរងគ្រោះជាបន្ទាន់ ព្រោះអស់រយៈពេល ៥ ទៅ ៦ ខែ ដែលបង់ការប្រាក់ បន្ទាប់ពីបេក្ខជនភាគច្រើន បានបុលខ្ចីពីធនាគារ និងពីអ្នកចងការប្រាក់ជាបន្ទុកធ្ងន់ធ្ងរណាស់»។
កាលពីថ្ងៃទី ១៨ ខែ សីហា ឆ្នាំ ២០២១ ACU បានបញ្ជូនជនល្មើសទាំង ២ រូបនេះ ទៅតុលាការខេត្តក្រចេះ ដើម្បីមានចំណាត់ការបន្តតាមនីតិវិធីច្បាប់ បន្ទាប់ពីបើកការស៊ើបអង្កេត ដោយយោងតាមពាក្យបណ្តឹងរបស់មន្ត្រីរាជការ ដែលធ្វើការនៅតាមមន្ទីរពេទ្យបង្អែក ស្រុកប្រតិបត្តិ និងមណ្ឌលសុខភាពទាំងអស់នៅក្នុងខេត្តក្រចេះ ដែលបានលាតត្រដាងអំពើពុករលួយរបស់មន្ត្រីទាំង ២ នេះ។
ក្នុងសារលិខិតរបស់មន្ត្រីរាជការនៃមន្ទីរពេទ្យបង្អែកនៅទូទាំងខេត្តក្រចេះ កាលថ្ងៃទី ១៩ ខែ មិថុនា ឆ្នាំ ២០២១ បានសរសេររៀបរាប់ថា មន្ត្រីទាំង ២ រូបនេះ បានទារប្រាក់ពីមន្ត្រីស្ម័គ្រចិត្ត និងមន្ត្រីជាប់កិច្ចសន្យា ក្នុងចំណោម ១២៩ នាក់ ដោយក្នុងម្នាក់ៗចាប់ពី ១០ ០០០ ដុល្លារ ទៅ ១៣ ០០០ ដុល្លារ ជាថ្នូរនឹងការបំពេញបែបបទប្រវត្តិរូបផ្លោះឡើងដោយមិនឆ្លងកាត់ការជ្រើសរើសត្រួតពិនិត្យពីប្រធាន អូឌីត ក្រុង និងស្រុក ដើម្បីបញ្ជូនឈ្មោះទៅក្រសួងសុខាភិបាលឱ្យជាប់ក្របខ័ណ្ឌរដ្ឋ។
លោក ទីវ វុធធេង អនុប្រធានលេខាដ្ឋានរដ្ឋបាលខេត្តក្រចេះ បានប្រាប់ ភ្នំពេញ ប៉ុស្តិ៍ នៅថ្ងៃទី ២៩ ធ្នូថា សំណុំរឿងនេះ គឺកំពុងស្ថិតក្នុងចំណាត់ការរបស់ចៅក្រមស៊ើបសួរនៃសាលាដំបូងខេត្តក្រចេះ និងបានសម្រេចឃុំខ្លួនមន្ត្រីទាំង ២ នេះ នៅពន្ធនាគាខេត្តបណ្តោះអាសន្ន។ យ៉ាងណា លោក ទីវ វុធធេង បានបដិសេធធ្វើការបកស្រាយលម្អិត ដោយសំអាងថា សំណុំរឿងនេះ គឺកំពុងស្ថិតក្នុងនីតិវិធីនៃការស៊ើបអង្កេតរបស់ចៅក្រម ដែលមិនអាចបកស្រាយអ្វីបានច្រើននោះទេ ខណៈជនទាំង ២ នេះ ត្រូវបានអយ្យការអមសាលាដំបូងខេត្តក្រចេះចោទប្រកាន់ពីបទ វីតិក្រម។
លោកបានបញ្ជាក់ថា៖ «សំណុំរឿងនេះ ស្ថិតក្នុងដៃចៅក្រមស៊ើបសួរ គ្រាន់តែដំណើរការដល់ណា ខ្ញុំមិនទាន់ដឹងទេ ព្រោះគេកំពុងស៊ើបអង្កេត។ យើងបានឃុំខ្លួន មន្ត្រីទាំង ២ នោះហើយ ក្រោយអយ្យការសម្រេចចោទប្រកាន់»។
លោក ធីម ហ៊ន មន្ត្រីសម្របសម្រួល អង្គការអាដហុកប្រចាំខេត្តក្រចេះ បានលើកឡើងថា នៅពេលមានរឿងក្តីពាក់ព័ន្ធនឹងអំពើពុករលួយនេះ គឺមន្ត្រីមានសមត្ថកិច្ចក្នុងការបង្ក្រាប និងទប់ស្កាត់បទល្មើសនេះ បានធ្វើការស៊ើបអង្កេត រហូតដល់កំណត់មុខសញ្ញា ដើម្បីយកមកផ្តន្ទាទោសតាមច្បាប់។ លោកចង់ឱ្យស្ថាប័នមានសមត្ថកិច្ចពាក់ព័ន្ធបន្តរួមគ្នា ដើម្បីលុបបំបាក់អំពើពុករលួយនៅក្នុងប្រទេសបន្ថែមទៀត ព្រោះការងារទាំងនេះ ត្រូវការការសហការរួមគ្នា។
លោកបញ្ជាក់ថា៖ «ទាក់ទងនឹងបញ្ហានេះ គឺជាសញ្ញាមួយល្អដែរសម្រាប់មន្ត្រីជំនាញក្នុងការអនុវត្តបង្ក្រាបបទល្មើសពុករលួយ។ គ្រាន់តែថា ក្នុងការអនុវត្តនេះ ក៏ត្រូវការការចូលរួមសហការពីអ្នកពាក់ព័ន្ធមួយចំនួនទៀតដែរ។ អ៊ីចឹងបើក្នុងករណី ឱ្យ ACU ធ្វើតែឯងក៏ពិបាកដែរ លុះត្រាតែមានការចូលរួមពីភាគីពាក់ព័ន្ធផ្សេងៗទៀត ដើម្បីធ្វើការទប់ស្កាត់រហូតដល់មានការបង្ក្រាបបទល្មើសពុករលួយទាំងនេះ»៕
