.jpg)
ជនសង្ស័យ (កណ្ដាល) ពេលចាប់ខ្លួនពីថ្ងៃទី ២៨ ធ្នូ។ រូបថត ប៉ូលិស
ភ្នំពេញៈ នគរបាលខណ្ឌដង្កោនៅថ្ងៃទី ២៩ ធ្នូ កំពុងរៀបចំសំណុំរឿងបញ្ជូនបុរសជនជាតិចិនម្នាក់ទៅតុលាការ ក្រោយចាប់ខ្លួនពាក់ព័ន្ធចាក់ស្ត្រីជាតិចិនម្នាក់ស្លាប់ នៅក្នុងរោងចក្រកាត់ដេរយីហោហ្គោលឌិន ហ្គ្រេស ស្ថិតនៅភូមិអន្លង់គងថ្មី សង្កាត់ព្រៃស ខណ្ឌដង្កោ កាលពីថ្ងៃទី ២៥ ធ្នូ កន្លងមក។
លោក ជាង ហុកសែ អធិការរងទទួលផែនការងារនគរបាលព្រហ្មទណ្ឌបានឱ្យដឹងនៅថ្ងៃទី ២៩ ធ្នូថា បុរសជាជនសង្ស័យឈ្មោះ សាវ វិន (XIAO WEN) អាយុ ៣៤ ឆ្នាំ ជនជាតិចិនជាប្រធានផ្នែកកាត់ដេរ រីឯស្ត្រីរងគ្រោះឈ្មោះ ឌីន លី (DIN LI) អាយុ ៣៧ ឆ្នាំ ជាអ្នកគ្រប់គ្រងរោងចក្រកាត់ដេរ។ពួកគេស្នាក់នៅក្នុងរោងចក្រយីហោ ហ្គោលឌិន ហ្គ្រេស។
លោកប្រាប់ថា៖ «ជនជាតិចិនម្នាក់នេះ កំពុងស្ថិតនៅអធិការដ្ឋាននគរបាលខណ្ឌដង្កោ យើងកំពុងបន្តនីតិវិធី ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញ»។
តាមកំណត់ហេតុរបស់នគរបាលខណ្ឌដង្កោបង្ហាញថា ករណីឃាតកម្មនេះ បានកើតឡើងកាលពីយប់ថ្ងៃទី ២៥ ធ្នូ ក្នុងភូមិអន្លង់គងថ្មី សង្កាត់ព្រៃស ខណ្ឌដង្កោ រាជធានីភ្នំពេញ។
មុនកើតហេតុ ជនសង្ស័យបានទៅផឹកស៊ីនៅក្រៅរោងចក្រហើយពេលត្រឡប់មករោងចក្រវិញក៏ឈ្លោះគ្នាជាមួយស្ត្រីរងគ្រោះពីរឿងលុយកាក់។
ពេលនោះមានបុរសជនជាតិចិនម្នាក់ ដែលស្នាក់នៅជាប់បន្ទប់គ្នាចេញមកឃាត់ ហើយក៏បំបែកគ្នាទៅ។
ប្រភពដដែលបន្តថា មួយសន្ទុះក្រោយមក ស្រាប់តែជនសង្ស័យកាន់កូនកាំបិត ១ ស្ទុះទៅចាក់ស្ត្រីរងគ្រោះពីក្រោយបណ្តាលឱ្យដួលផ្កាប់មុខលើបេតុង រួចរត់គេចខ្លួនបាត់។ បន្ទាប់មកស្ត្រីរងគ្រោះត្រូវបានដឹកទៅសង្គ្រោះនៅមន្ទីរពេទ្យកាលម៉ែត តែប៉ុន្មានថ្ងៃក្រោយក៏បានស្លាប់។ក្រោយកើតហេតុថៅកែរោងចក្របានដាក់ពាក្យបណ្តឹងមកអធិការដ្ឋាននគរបាលខណ្ឌដង្កោ ដើម្បីឱ្យស្វែងរកចាប់ខ្លួនជនសង្ស័យ។
បើតាមលោក ហុកសែ បន្ទាប់ពីទទួលបានពាក្យបណ្តឹងសមត្ថកិច្ចខណ្ឌបានសុំសហការជាមួយនាយកដ្ឋានព្រហ្មទណ្ឌក្រសួងមហាផ្ទៃ បើកការស្រាវជ្រាវទើបចាប់ខ្លួនជនសង្ស័យបាននៅរសៀលថ្ងៃទី ២៨ ធ្នូ នៅផ្ទះរបស់ប្រពន្ធជនសង្ស័យក្នុងភូមិត្រពាំងស្មាច់ ឃុំអណ្ដូងត្របែក ស្រុករមាសហែក ខេត្តស្វាយរៀង៕
