ភ្នំពេញៈ រដ្ឋបាលជលផលបានឱ្យដឹងថា ការដកហូតដីព្រៃលិចទឹកក្នុងតំបន់ ៣ នៅក្នុងខេត្តទាំង ៦ ជុំវិញបឹងទន្លេសាប មានចំនួនជាង ៥៦ ០០០ ហិកតា ដែលមានប្រជាពលរដ្ឋជាង ១ ម៉ឺនគ្រួសារ បានចូលខ្លួនស្ម័គ្រចិត្តប្រគល់ដីទាំងនេះឱ្យរដ្ឋគ្រប់គ្រងវិញ ខណៈការដាំដុះព្រៃលិចទឹក ឫស្សី និងដើមត្នោតឡើងវិញ ក្នុងតំបន់ទាំងនោះបានជាង ៩ ម៉ឺនដើម និងគ្រាប់។
លោក អ៊ឹង ទ្រី អនុប្រធានរដ្ឋបាលជលផលបានប្រាប់ ភ្នំពេញ ប៉ុស្តិ៍ នៅថ្ងៃទី ២៨ ខែធ្នូថា គិតត្រឹមថ្ងៃទី ២៧ ធ្នូ ក្រុមការងារប្រចាំខេត្តទាំង ៦ បានដកហូតដីព្រៃលិចទឹកនៅក្នុងតំបន់
៣ ជុំវិញបឹងទន្លេសាបបានចំនួន ៥៦ ០១០ ហិកតា ដោយក្នុងនោះមានប្រជាពលរដ្ឋចំនួន ១៣ ២៦៨ គ្រួសារ បានស្ម័គ្រចិត្តចូលខ្លួនមកប្រគល់ដីព្រៃលិចទឹកទាំងនេះត្រឡប់មកឱ្យអាជ្ញាធរខេត្តទាំង ៦ វិញ។
ចំពោះផ្ទៃដីព្រៃលិចទឹកដែលបានដកហូតទាំងនេះគឺខេត្តកំពង់ឆ្នាំង មានចំនួន ៣០ ២១១ ហិកតា ដែលមានប្រជាពលរដ្ឋស្ម័គ្រចិត្តប្រគល់ដីជូនរដ្ឋវិញ ចំនួន ៧ ៤១៤ គ្រួសារ។ ខេត្តកំពង់ធំដកហូតដីព្រៃលិចទឹកបាន ១០ ៩៤៥ ហិកតា ដែលមានប្រជាពលរដ្ឋស្ម័គ្រចិត្តប្រគល់ដីជូនរដ្ឋវិញចំនួន ២ ២៦៣ គ្រួសារ។ ខេត្តសៀមរាបដកហូតបាន ២ ៨៦៥ ហិកតា ដែលមានប្រជាពលរដ្ឋស្ម័គ្រចិត្តប្រគល់ដីជូនរដ្ឋវិញចំនួន ១ ២៣៧ គ្រួសារ។ នេះបើតាមលោក លោក អ៊ឹង ទ្រី។
លោកបានបន្តថា ចំពោះខេត្តបាត់ដំបងដកហូតបាន ៦ ៥៥៦ ហិកតា ដែលមានប្រជាពលរដ្ឋស្ម័គ្រចិត្តប្រគល់ដីជូនរដ្ឋវិញចំនួន ១ ៣៦២ គ្រួសារ។ ខេត្តបន្ទាយមានជ័យដកហូតដីបាន
៤ ២៦៣ ហិកតា ដែលមានប្រជាពលរដ្ឋស្ម័គ្រចិត្តប្រគល់ដីជូនរដ្ឋវិញចំនួន ៦៥១ គ្រួសារ និងខេត្តពោធិ៍សាត់ដកហូតបាន ១ ១៧១ ហិកតា ដែលមានប្រជាពលរដ្ឋស្ម័គ្រចិត្តប្រគល់ដីជូនរដ្ឋវិញចំនួន ៣៤១ គ្រួសារ។
លោកបានបញ្ជាក់ថា៖ «ការងារទាំងអស់នេះ យើងបានធ្វើជាបន្តបន្ទាប់តាំងពីថ្ងៃទី ២៨ វិច្ឆិកា មកដល់ថ្ងៃទី ២៧ ធ្នូ ដោយការដកហូតនេះ គឺមិនមានការប្រទាំងប្រទើសអ្វីនោះទេ ដោយប្រជាជនទាំងអស់ គាត់ស្តាប់នូវសាររបស់សម្តេច ហើយអាជ្ញាធរមូលដ្ឋានយើងក៏បានចុះជាបន្តបន្ទាប់តាមរយៈការស្ម័គ្រចិត្តប្រគល់ត្រឡប់មកវិញតែម្តង»។
ចំពោះការដាំដុះព្រៃលិចទឹកវិញ លោក អ៊ឹង ទ្រី បានឱ្យដឹងដែរថា គិតត្រឹមថ្ងៃទី ២៧ ធ្នូ ឆ្នាំ ២០២១ ខេត្តទាំង ៦ នៅជុំវិញតំបន់បឹងទន្លេសាប បានដាំដុះព្រៃលិចទឹកមានដូចជា ដើមរាំង ដើមរំដេញ ដើមផ្ទោល ដើមសណ្តាន់ ជាដើម បានចំនួន ២៣ ៤៩២ ដើម។ ចំណែកដើមឫស្សីដាំបានចំនួន ៥ ៤១០ គុម្ព ដើមត្នោតចំនួន ២៥៨ ដើម និងគ្រាប់ត្នោតបាន
ចំនួន ៦៧ ២៥៩ គ្រាប់។
លោកបានបញ្ជាក់ថា៖ «មូលហេតុយើងដាំដើមត្នោតនេះ គឺយើងធ្វើការដាំព្រំដីតំបន់ ៣ ដែលយើងបានកំណត់ហើយ គឺយើងយកទៅដាំតែម្តង ព្រោះថា បើយើងដាំជាបង្គោល ក្រែងបង្គោលនេះ ចេះរំកិល ឬក៏ចេះដើរ។ ចំណែកដើមឫស្សី គឺយើងដាំទៅតាមតំបន់ដែលមានស្រាប់ហ្នឹង ហើយនិងព្រៃលិចទឹក យើងដាំជាហូរហែ»។
កាលពីថ្ងៃទី ២៨ ខែវិច្ឆិកា លោកនាយករដ្ឋមន្ត្រី ហ៊ុន សែន បានចេញបទបញ្ជាយ៉ាងម៉ឺងម៉ាត់ឱ្យក្រសួងស្ថាប័នពាក់ព័ន្ធ និងអភិបាលខេត្តជាប់បឹងទន្លេសាបទប់ស្កាត់ និងបង្ក្រាបជាបន្ទាន់ចំពោះការលួចកាប់ទន្ទ្រានព្រៃលិចទឹក និងវាតទីយកដីនៅតាមមាត់បឹងទន្លេសាប។ ការចេញបញ្ជានេះធ្វើឡើង បន្ទាប់ពីរាជបណ្ឌិត្យសភាកម្ពុជា បានចុះស្រាវជ្រាវរកឃើញមានករណីរំលោភយកដីព្រៃលិចទឹករាប់ម៉ឺនហិកតាយ៉ាងអនាធិបតេយ្យ។
ជាមួយនឹងចំណាត់ការនេះ លោក អ៊ី រិន អ្នកនាំពាក្យសាលាដំបូងរាជធានីភ្នំពេញបានប្រាប់ ភ្នំពេញ ប៉ុស្តិ៍ នៅថ្ងៃទី ២៨ ធ្នូថា ចៅក្រមស៊ើបសួរនៃសាលាដំបូងរាជធានីភ្នំពេញ កំពុងបន្តស៊ើប
អង្កេតករណីលោក ស៊ុំ សុជាតិ ស្នងការរងនគរបាលខេត្តកំពង់ឆ្នាំង និងលោក កែវ ណារុន ប្រធានការិយាល័យអន្តរាគមន៍ និងតម្រួតបទបញ្ជានគរបាលខេត្តនេះ បន្ទាប់ពីអយ្យការអមសាលាដំបូងរាជធានីភ្នំពេញបានចោទប្រកាន់ពួកគេក្នុងម្នាក់ ពី ៣ ទៅ ៤ បទល្មើស។
លោកបានបញ្ជាក់ថា៖ «សំណុំរឿងនេះ កំពុងស្ថិតក្នុងដំណាក់កាលស៊ើបអង្កេតរបស់ចៅក្រមស៊ើបសួរ។ ដោយសារតែស្ថិតក្នុងនីតិវិធីនៃការស៊ើបអង្កេត យើងមិនអាចបញ្ជាក់អ្វីបានទេ។ ចៅក្រមកំពុងធ្វើការលើរឿងក្តីនេះ»។
កាលពីថ្ងៃទី ១៩ ធ្នូ អយ្យការអមសាលាដំបូងរាជធានីភ្នំពេញ បានសម្រេចឃុំខ្លួនជនសង្ស័យទាំង ២ នាក់ ក្នុងពន្ធនាគារបណ្ដោះអាសន្ន និងបានចោទប្រកាន់លោក កែវ ណារុន ប្រធានការិយាល័យអន្តរាគមន៍ និងតម្រួតបទបញ្ជានគរបាលខេត្តកំពង់ឆ្នាំង និងលោក ស៊ុំ សុជាតិ ពីបទបំផ្លាញដោយចេតនា និងគៃបំបាត់ដោយទុច្ចរិត បទល្មើសឈូសឆាយ និងហ៊ុមព័ទ្ធដីព្រៃលិចទឹក បទល្មើសមិនប្រកាសទ្រព្យសម្បត្តិ និងបំណុល ខណៈ លោក ស៊ុំ សុជាតិ ត្រូវរងនូវការចោទប្រកាន់នូវបទល្មើស ១ ករណីទៀត គឺបទល្មើសសម្អាតប្រាក់។
លោក ឱម យ៉ិនទៀង ប្រធានអង្គភាពប្រឆាំងអំពើពុករលួយបានរាយការណ៍ជូនក្រុមប្រឹក្សាជាតិប្រឆាំងអំពើពុករលួយ នៅក្នុងកិច្ចប្រជុំកាលពីថ្ងៃទី ២៧ ខែធ្នូថា លោក ស៊ុំ សុជាតិ ស្នងការរងនគរបាលខេត្តកំពង់ឆ្នាំង ត្រូវបានអង្គភាពប្រឆាំងអំពើពុករលួយរកឃើញថា បានកាន់កាប់ និងទន្ទ្រានដីចំនួន ៣៨ ទីតាំង មានទំហំជិត ១ ០០០ ហិកតា។ លោកបន្តថា បុគ្គលរូបនេះ បានធ្វើលិខិតប្រគល់ដីជូនរដ្ឋវិញចំនួន ៦៧៨ ហិកតា ប៉ុន្តែបានលក់ដីព្រៃលិចទឹកតំបន់៣ចំនួន ៨ លើកក្នុងទឹកប្រាក់ជាង ៥១ ម៉ឺនដុល្លារ៕
វីដេអូ៖