កំពង់ឆ្នាំងៈ មន្ត្រីនគរបាលស្រុករលាប្អៀរបានឱ្យដឹងថា មានករណីគ្រោះអគ្គិភ័យឆាបឆេះស្ថានីយបញ្ចូលហ្គាស ១ កន្លែង កាលពីព្រឹកថ្ងៃទី ២៩ ខែ ធ្នូ ឆ្នាំ ២០២១ នៅក្នុងភូមិព្រៃពួច ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង ខណៈម្ចាស់ទីតាំងមិននៅ ដោយមានតែបុគ្គលិកកម្មករ។
លោក ទឹម ចាន់ធី អធិការស្រុករលាប្អៀរបានប្រាប់ ភ្នំពេញ ប៉ុស្តិ៍ថា គ្រោះអគ្គិភ័យនេះកើតឡើងក្នុងពេលម្ចាស់ស្ថានីយមិននៅដោយមានតែបុគ្គលិកកម្មករ ហើយបានបង្កឱ្យមានការខូចខាតរោងស្ថានីយធ្វើពីឈើប្រក់ស័ង្កសីទំហំ ៨ ម៉ែត្រ × ២៥ ម៉ែត្រ និងសំណង់ស្តាម៉ាតទំហំ ១០ ម៉ែត្រ × ២៥ ម៉ែត្រ រួមទាំងទំនិញ និងសម្ភារមួយចំនួនធំ។
លោកបានបញ្ជាក់ថា៖ «តាមការអះអាងរបស់បុគ្គលិកកម្មករក្នុងស្ថានីយបញ្ចូលហ្គាស និងបុគ្គលិកនៅក្នុងស្តាម៉ាត គ្រោះអគ្គិភ័យនេះ បណ្ដាលមកពីការផ្ទុះឆ្លងចរន្តអគ្គិសនី ចេញពីធុងម៉ូទ័របូមហ្គាស»។
លោក ចាន់ធី បានបន្តថា ទោះជាយ៉ាងណា ក្នុងហេតុការណ៍នេះមិនមានអ្នករងរបួស ឬគ្រោះថ្នាក់ដល់ជីវិតទេ ហើយក៏មិនបានឆេះរាលដាលដល់ផ្ទះពលរដ្ឋនៅជិតនោះដែរ។ ក្នុងប្រតិបត្តិការពន្លត់អគ្គិភ័យនេះសមត្ថកិច្ចបានប្រើប្រាស់កម្លាំងអន្តរាគមន៍សរុប ៥៥ នាក់ ប្រើរថយន្តបាញ់ទឹកចំនួន ១៣ គ្រឿង និងប្រើទឹកអស់ ១០៤ ម៉ែត្រគុប។
ទន្ទឹមនឹងនេះលោកបានអំពាវនាវ ឱ្យមានការប្រុងប្រយ័ត្នខ្ពស់ចំពោះការប្រើប្រាស់នូវឧបករណ៍សម្ភារដែលងាយបង្កជាគ្រោះអគ្គិភ័យ ពិសេសនៅស្ថានីយឬសិប្បកម្មខ្នាតតូច និងមធ្យម គប្បីមានបំពង់ពន្លត់អគ្គិភ័យដែលមានគុណភាពសម្រាប់ជួយបង្ការនៅពេលមានគ្រោះអគ្គិភ័យកើតឡើង។
លោកបានបញ្ជាក់ថា ត្រូវត្រួតពិនិត្យឱ្យបានច្បាស់លាស់នៅមុន និងក្រោយការប្រើប្រាស់នូវប្រព័ន្ធបញ្ជាម៉ាស៊ីននានាក្នុងស្ថានីយហ្គាស ប្រេងឥន្ធនៈ សិប្បកម្ម និងអាជីវកម្មផ្សេងៗដែលពាក់ព័ន្ធនឹងគ្រឿងចំហេះ។ ចំពោះការប្រើប្រាស់ភ្លើងចង្ក្រាន អុស ធ្យូង ទៀន ធូប ក៏ត្រូវពិនិត្យនិងពន្លត់ឱ្យស្រេចផងដែរ ក្រោយពេលដាំស្ល និងមុនពេលចាកចេញពីផ្ទះ៕
វីដេអូ៖