.jpg)
ភាគីក្នុងជម្លោះដីធ្លី បានព្រមព្រៀងរៀបចំឯកសារបញ្ចប់ជម្លោះក្នុងស្រុកបន្ទាយស្រី។ រូបថត ឃឹម ហ្វីណង់
សៀមរាបៈ លោក ឃឹម ហ្វីណង់ អភិបាលស្រុកបន្ទាយស្រីបានឱ្យដឹងថា ទំនាស់ដីធ្លីដ៏ធំមួយនៅក្នុងស្រុករវាងក្រុមហ៊ុន បុរីអង្គរលែនម៉ាក្ស និងលោកស្រី លី អ៊ុំអេង ត្រូវបានដោះស្រាយបញ្ចប់ បន្ទាប់ពីវិវាទនេះបានបន្តអូសបន្លាយអស់រយៈពេលជាច្រើនឆ្នាំ ខណៈលោកចង់ឃើញករណីវិវាទដីធ្លីផ្សេងទៀតនៅទូទាំងស្រុក ប្រើប្រាស់រូបមន្តដោះស្រាយប្រហាក់ប្រហែលនេះ ដើម្បីបញ្ចប់ជម្លោះ។
លោកបានសរសេរបែបនេះ នៅលើទំព័រហ្វេសប៊ុករបស់លោក កាលពីថ្ងៃទី ២៨ ធ្នូ យ៉ាងដូច្នេះថា៖ «ទីបំផុត ទំនាស់ដីធ្លីដ៏ធំមួយនៅក្នុងស្រុកបន្ទាយស្រីរវាងក្រុមហ៊ុនបុរីអង្គរលែនម៉ាក្ស និងលោកជំទាវ លី អ៊ុំអេង ដែលបានអូសបន្លាយអស់រយៈពេលជាច្រើនឆ្នាំត្រូវបានបញ្ចប់ដោយការចាប់ដៃគ្នា សម្បទានទៅវិញទៅមក និងទទួលយកដំណោះស្រាយដោយស្នាមញញឹមរៀងៗខ្លួនកាលពីពេលថ្មីៗនេះ»។
លោក ឃឹម ហ្វីណង់ ក៏សាទរដល់ភាគីទាំង ២ ដែលបានបន្ទន់ឥរិយាបថស្រុះស្រួលគ្នាបញ្ចប់ជម្លោះ និងយល់ព្រមដកពាក្យបណ្តឹងទាំងខាងផ្លូវរដ្ឋបាល និងផ្លូវតុលាការ ដោយឈរលើគោលការណ៍ឈ្នះ-ឈ្នះ និងទទួលយកដំណោះស្រាយដែលអាជ្ញាធរបានប្រឹងប្រែងស្វែងរកជូន។
លោកបានបញ្ជាក់ថា៖ «ក្នុងនាមរដ្ឋបាលស្រុក ខ្ញុំសង្ឃឹមយ៉ាងមុតមាំថា ករណីនេះនឹងក្លាយទៅជាបន្ទាត់សម្រាប់ដោះស្រាយករណីដទៃទៀតក្នុងរូបមន្តប្រហាក់ប្រហែលគ្នានេះ ហើយក៏សូមទទូចដល់ភាគីករណីវិវាទដីធ្លីផ្សេងៗទៀតនៅក្នុងស្រុកបន្ទាយស្រី ឱ្យបន្ទន់ជំហរ សម្បទានគ្នា និងចាប់យកការចរចាជាច្រកចេញ ចៀសវាងការខាតបង់ពេលវេលាដើរលើផ្លូវទាល់ច្រក។ ការបញ្ចប់វិវាទក្នុងទម្រង់បែបនេះក៏នឹងអនុញ្ញាតឱ្យបងប្អូនប្រជាពលរដ្ឋអាចប្រើប្រាស់ដីធ្លីរបស់ខ្លួនជាទ្រព្យដ៏មានតម្លៃឱ្យអស់សក្តានុពល និងបើកផ្លូវឱ្យមានការវិនិយោគពីសំណាក់វិស័យឯកជន ដើម្បីជាប្រយោជន៍ដល់សេដ្ឋកិច្ចជាតិផងដែរ»។
កាលពីឆ្នាំ ២០១៩ មានករណីជម្លោះដីធ្លីមួយកើតឡើង រហូតឈានដល់មានការប្តឹងផ្តល់គ្នាទៅតុលាការទៅវិញទៅមកដោយលោកស្រី លី អ៊ុំអេង បានអះអាងថា ក្រុមហ៊ុនបុរីអង្គរលែនម៉ាក្ស បានប្រើសែកស្អុយទិញដីរបស់គាត់រាប់រយហិកតា ខណៈក្រុមហ៊ុន បានចោទប្រកាន់ថា លោកស្រី លី អ៊ុំអេង មិនបានគោរពកាតព្វកិច្ចដែលមានចែងនៅក្នុងកិច្ចសន្យា ដែលថា លក់ដីឱ្យក្រុមហ៊ុនត្រូវតែស្របច្បាប់ ដីមិនមានទំនាស់ ដីមិនជាប់តំបន់អប្សរា ដីមិនស្ថិតក្នុងតំបន់ហាមឃាត់ផ្សេងៗ។
យោងតាមលិខិតសម្រុះសម្រួលចុះថ្ងៃទី ១៧ ធ្នូ ដែលមានស្នាមមេដៃលោកស្រី លី អ៊ុំអេង និងលោក ទូស សាភឿន តំណាងក្រុមហ៊ុនបុរីអង្គរលែនម៉ាក្ស បានឱ្យដឹងថា ភាគីទាំង ២ បានយល់ព្រមបញ្ចប់ជម្លោះដោយការបំពេញលក្ខណៈមួយចំនួនឱ្យគ្នាទៅវិញទៅមក ដោយក្នុងនោះក៏ព្រមដកពាក្យបណ្តឹងដែលភាគីទាំង ២ បានប្តឹងគ្នាទៅវិញទៅមកនៅតុលាការផងដែរ។
លោក ទូស សាភឿន តំណាងក្រុមហ៊ុនបុរីអង្គរលែនម៉ាក្ស និងមេធាវីរបស់លោក មិនអាចទាក់ទងសុំការអត្ថាធិប្បាយជុំវិញករណីនេះបានទេ កាលពីម្សិលមិញ ដោយសារតែទូរស័ព្ទចូល មិនមានអ្នកទទួល។
លោក ហ៊ុន ពិសិដ្ឋ មេធាវីការពារក្តីលោកស្រី លី អ៊ុំអេង បានប្រាប់ ភ្នំពេញ ប៉ុស្តិ៍ នៅថ្ងៃទី ២៩ ធ្នូថា ករីណនេះ ចោទប្រកាន់គ្នាលើការទិញលក់ដីចំនួន ២០៥ ហិកតា ស្ថិតនៅក្នុងឃុំខ្នារសណ្តាយ ស្រុកបន្ទាយស្រី ខេត្តសៀមរាប ពិតជាត្រូវបានសម្រុះសម្រួលបញ្ចប់ដោយសន្តិវិធីពិតមែន។ ក្នុងនាមជាមេធាវីតំណាងឱ្យលោកស្រី លី អ៊ុំអេង លោកបន្តថា ការបញ្ចប់ជម្លោះនេះ គឺភាគីទាំងសងខាង បានឯកភាពដោយគ្មានការ-បង្ខិតបង្ខំនោះឡើយ ខណៈកូនក្តីលោក ក៏សង្ឃឹមថា ជម្លោះដីធ្លីផ្សេងៗទៀត ដែលកូនក្តីខ្លួនមាន ក៏នឹងត្រូវបានដោះស្រាយដោយសន្តិវិធីក្នុងពេលខាងមុខដូចគ្នា។
លោក មេធាវី ហ៊ុន ពិសិដ្ឋ បានបញ្ជាក់ទៀតថា៖ «ជាគោលការណ៍ទូទៅ ចំពោះលោកជំទាវ គឺលោកតែងតែចង់បញ្ចប់មិនឱ្យវែងឆ្ងាយដែរចំពោះបញ្ហាវិវាទអីហ្នឹង គឺធ្វើទៅតាមផ្លូវច្បាប់។ មិនអីទេចំពោះករណីនេះ គឺគាត់បញ្ចប់គ្នាដោយសន្តិវិធីទេ និងមាន ការយោគយល់គ្នាទៅវិញទៅមក ដើម្បីឱ្យក្រុមហ៊ុន បន្តការអភិវឌ្ឍទៅ ចំណែកលោកជំទាវ ក៏ទទួលបានប្រាក់ថ្លៃអចលនទ្រព្យ ដើម្បីបន្តអាជីវកម្មរបស់លោកទៀត»៕
