ភ្នំពេញៈ មន្ត្រីសាលារាជធានី-ភ្នំពេញបានឱ្យដឹងថា បញ្ហាមិនចុះសម្រុងគ្នាលើវិក្កយបត្រថ្លៃទឹករវាងពលរដ្ឋក្នុងភូមិចំនួន ៤ នៅសង្កាត់ព្រែកលៀប ជាមួយរដ្ឋាករទឹកស្វយ័តក្រុងភ្នំពេញ ត្រូវបានដោះស្រាយ ខណៈមន្ត្រីរដ្ឋាករទឹកស្វយ័តក្រុងភ្នំពេញកំពុងបន្តចុះដោះស្រាយជាបន្តបន្ទាប់ចំពោះផ្ទះពលរដ្ឋដែលជួបប្រទះនូវបញ្ហានេះ។
កាលពីថ្មីៗនេះ មានការតវ៉ាពីសំណាក់ពលរដ្ឋរស់នៅក្នុងភូមិកៀនឃ្លាំង ព្រែកលៀប ភូមិខ្ទរ និងភូមិបាក់ខែងក្នុងសង្កាត់ព្រែកលៀប ខណ្ឌជ្រោយចង្វារ ដោយបង្ហាញការមិនសុខចិត្ត ក្រោយទទួលបានវិក្កយបត្រទឹកឃើញមានបរិមាណប្រើប្រាស់ទឹកស្អាតកើនឡើងខ្លាំងពី ២ ទៅ ៥ ដងដោយផ្ទះខ្លះ កើនឡើងដល់ ១ លានរៀល ទៅ ៣ លានរៀល ដែលខុសពីធម្មតាការប្រើប្រាស់មានចន្លោះពី ២០ ម៉ឺនរៀលទៅ ៦០ ម៉ឺនរៀលប៉ុណ្ណោះ។
ក្រោយផ្ទុះការតវ៉ា លោក នួន ផារ័ត្ន អភិបាលរងរាជធានីភ្នំពេញបានដឹកនាំក្រុមការងារ ដោយមានការចូលរួមពីអគ្គនាយកនៃរដ្ឋាករទឹកស្វយ័តក្រុងភ្នំពេញ ចុះទៅសម្របសម្រួលជាមួយពលរដ្ឋជាង ១០០ នាក់ នារសៀលថ្ងៃទី ២៩ ខែធ្នូ ឆ្នាំ ២០២១ បន្ទាប់ពីទទួលបានគោលការណ៍ពីលោក ឃួង ស្រេង អភិបាលរាជធានីភ្នំពេញ។
លោក នួន ផារ័ត្ន បានឱ្យដឹងថា ជាលទ្ធផល បន្ទាប់ពីការសិក្សាអំពីបញ្ហាទាំងនោះ ភាគីទាំងអស់បានព្រមព្រៀងគ្នាលើដំណោះស្រាយរួមមួយដែលក្នុងនោះពលរដ្ឋក៏មានការពេញចិត្តទៅលើការដោះស្រាយរាល់បញ្ហាដែលពួកគេបានជួបប្រទះពាក់ព័ន្ធនឹងការមិនចុះសម្រុងគ្នាលើវិក្កយបត្រថ្លៃទឹកនេះ។
លោកបានបញ្ជាក់ថា៖ «ភាគីទាំងអស់បានព្រមព្រៀងគ្នាលើដំណោះស្រាយរួមមួយ ដែលឈរលើមូលដ្ឋាន ឈ្នះ-ឈ្នះ ទាំងអស់គ្នា ហើយបងប្អូនប្រជាពលរដ្ឋក៏មានសេចក្តីរីករាយចំពោះការដោះស្រាយបញ្ហាដែលបានអូសបន្លាយជាយូរមកហើយនេះ»។
យោងតាមសេចក្តីប្រកាសព័ត៌មានរបស់រដ្ឋាករទឹកស្វយ័តក្រុងភ្នំពេញ កាលពីថ្ងៃទី ២៣ ធ្នូ បានឱ្យដឹងថា ការកើនឡើងបរិមាណប្រើប្រាស់ទឹកស្អាតមិនប្រក្រតីក្នុងតំបន់ទាំងនេះគឺបណ្តាលមកពីភ្នាក់ងារអានលេខនាឡិកាទឹកមានការធ្វេសប្រហែសដោយមិនបានយកចិត្តទុកដាក់បំពេញភារកិច្ចរបស់ខ្លួនឱ្យបានត្រឹមត្រូវតាមគោលការណ៍របស់អង្គភាពជាហេតុធ្វើឱ្យការចេញវិក្កយបត្រចុងក្រោយមានការកើនឡើងខ្ពស់នៃបរិមាណទឹកប្រើប្រាស់។
បន្ទាប់ពីមើលឃើញនូវភាពមិនប្រក្រតីរបស់ភ្នាក់ងាររូបនោះថ្នាក់ដឹកនាំរដ្ឋាករទឹកស្វយ័តក្រុងភ្នំពេញបានសម្រេចបញ្ឈប់ភ្នាក់ងារនោះចេញពីបញ្ជីអង្គភាពរួចហើយ ខណៈបន្តដោះស្រាយបញ្ហាដែលបានកើតឡើងជាមួយពលរដ្ឋ ដោយបានចាត់ចែងក្រុមការងារចុះត្រួតពិនិត្យ និងអានលេខនាឡិកាទឹកជាក់ស្តែងដែលអតិថិជនបានប្រើប្រាស់រួច និងដោះស្រាយទៅតាមស្ថានភាពជាក់ស្តែងវិញ។
មន្ត្រីរដ្ឋាករទឹកស្វយ័តក្រុងភ្នំពេញដែលសុំមិនបញ្ចេញឈ្មោះបានប្រាប់ភ្នំពេញប៉ុស្តិ៍ថា គិតមកត្រឹមថ្ងៃទី ៣០ ធ្នូគឺមានពលរដ្ឋប្រមាណជាង ១០០ គ្រួសារបានរាយការណ៍ពីភាពមិនប្រក្រតីនៃការកើនឡើងបរិមាណប្រើប្រាស់ទឹកស្អាតនេះ។ លោកបន្តថា ជាមួយនឹងបញ្ហានេះមន្ត្រីរដ្ឋាករទឹកស្វយ័តក្រុងភ្នំពេញក៏បានចុះដោះស្រាយជាបន្តបន្ទាប់ផងដែរដែលតួលេខដែលនៅសេសសល់ គិតមកទល់ពេលនេះ គឺនៅមានចំនួនតិចតួចគ្រួសារប៉ុណ្ណោះ។
លោកបានបញ្ជាក់ថា៖ «ប្រសិនបើក្នុងករណីខាងខ្ញុំពិនិត្យឃើញទៅពិតជាមានបញ្ហាដោយសារបុគ្គលិកខាងខ្ញុំគឺខាងខ្ញុំនឹងរៀបចំឡើងវិញជូន។ ដូចអ្វីដែលថ្នាក់ដឹកនាំបានបកស្រាយក្នុងអង្គប្រជុំគឺនឹងសិក្សានិងកែសម្រួលឡើងវិញក្នុងករណីទីតាំងដែលមានបញ្ហាហើយប្រជាជនដែលបានចូលរួមជាង ១០០ គ្រួសារនោះក៏យល់លម្អិតអស់ដែរ»។
អ្នកស្រី ប៊ី សុខលី ពលរដ្ឋរស់នៅភូមិខ្ទរ សង្កាត់ព្រែកលៀប ដែលជួបប្រទះបញ្ហានេះ បានថ្លែងថា ក្នុងរយៈពេលប្រមាណ ២ ខែម្តងដែលអ្នកស្រីទទួលវិក្កយបត្រទឹកប្រមាណជាង ១០ ម៉ឺនទៅ ២០ ម៉ឺនរៀលប៉ុណ្ណោះ។
ប៉ុន្តែវិក្កយបត្រចុងក្រោយគឺកើនដល់ជាង ៨៩ ម៉ឺនរៀល បូកនឹងតួលេខដែលគេសរសេរថា ជំពាក់ជាង ២០ ម៉ឺនរៀលទៀត សរុបជាង ១ លានរៀល។
យ៉ាងណា អ្នកស្រី ប៊ី សុខលី ថា ក្រោយពីព្រមទទួលយកដំណោះស្រាយ និងការបកស្រាយពីរដ្ឋាករទឹក គ្រួសារអ្នកស្រីក៏ទទួលបានការពិនិត្យ និងកែតម្រូវបរិមាណទឹកស្អាតនេះរួចហើយដែរ និងបានចូលរួមបង់ថ្លៃទឹករួចរាល់ហើយ៕
វីដេអូ៖