.jpg)
រថយន្តចង្កូតស្តាំកំពុងបើកបរនៅតាមដងផ្លូវក្នុងខេត្តកណ្តាលកាលពីដើមខែកញ្ញាឆ្នាំ ២០២១។ ហេង ជីវ័ន
ភ្នំពេញៈ ក្រសួងសាធារណការ និងដឹកជញ្ជូនប្រកាសមិនអនុញ្ញាតឱ្យកែចង្កូតរថយន្តពីស្តាំមកឆ្វេង នៅតាមយានដ្ឋានដែលគ្មានច្បាប់អនុញ្ញាតឡើយ តែបានណែនាំឱ្យពលរដ្ឋ ត្រូវយករថយន្តចង្កូតស្តាំ ទៅធ្វើការកែចង្កូតពីស្តាំមកឆ្វេងនៅតាមក្រុមហ៊ុនចំនួន ៨ ដែលក្រសួងទទួលស្គាល់។
ការប្រកាសយ៉ាងដូច្នេះ បន្ទាប់ពីបានសង្កេតឃើញថា ថ្មីៗនេះមានម្ចាស់យានដ្ឋានមួយចំនួន ដែលពុំមានច្បាប់អនុញ្ញាតឱ្យធ្វើអាជីវកម្ម បានធ្វើការកែចង្កូតរថយន្តពីស្តាំមកឆ្វេង ដែលសកម្មភាពនេះផ្ទុយនឹងអនុក្រឹត្យចុះថ្ងៃទី ៣ ខែវិច្ឆិកា ឆ្នាំ ២០០៨ ស្តីពីការគ្រប់គ្រងយានដ្ឋាន ជួសជុល និងយានដ្ឋានកែច្នៃដំឡើងយានយន្ត និងប្រកាសចុះថ្ងៃទី ៦ ខែកុម្ភៈ ឆ្នាំ ២០០៩ ស្តីពីសំណុំបែបបទសម្រាប់ដាក់ពាក្យសុំធ្វើអាជីវកម្មយានដ្ឋានជួសជុល និងយានដ្ឋានកែច្នៃដំឡើងយានយន្ត។
ក្រសួងសាធារណការបានសង្កត់ធ្ងន់នៅក្នុងសេចក្តីជូនដំណឹងចុះថ្ងៃទី ២៩ ខែធ្នូ ថា៖ «សកម្មភាពកែចង្កូតរថយន្តពីស្តាំមកឆ្វេង នៅតាមយានដ្ឋានទាំងនោះពុំមានលក្ខណៈបច្ចេកទេសត្រឹមត្រូវដែលអាចបណ្តាលឱ្យរថយន្តបើកបរពុំមានសុវត្ថិភាព និងបង្កគ្រោះថ្នាក់ជាយថាហេតុ នៅពេលធ្វើចរាចរណ៍លើផ្លូវថ្នល់»។
ក្រសួងបញ្ជាក់ថា ហេតុដូចនេះ ក្រសួងសាធារណការ មិនអនុញ្ញាតឱ្យរថយន្តគ្រប់ប្រភេទដែលបានកែចង្កូតពីស្តាំមកឆ្វេង នៅតាមយានដ្ឋានដែលគ្មានច្បាប់អនុញ្ញាតឱ្យធ្វើអាជីវកម្ម ចូលត្រួតពិនិត្យលក្ខណៈបច្ចេកទេស និងចុះបញ្ជីផ្តល់បណ្ណសម្គាល់ និងបំពាក់ស្លាកលេខសម្គាល់យានជំនិះឡើយ។
កន្លងមកក្រសួងសាធារណការបានទទួលស្គាល់ និងអនុញ្ញាតឱ្យក្រុមហ៊ុនចំនួន ៨ ប៉ុណ្ណោះ ធ្វើអាជីវកម្មកែចង្កូតពីស្តាំមកឆ្វេង ដែលក្រុមហ៊ុនទាំងនោះរួមមាន ១- ក្រុមហ៊ុន Fuji Form Co., Ltd ២- ក្រុមហ៊ុន Lien Thong Investment Group Co.Ltd ៣- ក្រុមហ៊ុន S.T.P International (Cambodia ) Public Co., Ltd ៤-ក្រុមហ៊ុន Seconimex Co., Ltd ៥- ក្រុមហ៊ុន សុវណ្ណយន្ត ( SOVANN YAUN Co., Ltd) ៦- ប៉ាស្ទ័រមានជ័យ ៧- ក្រុមហ៊ុន ភី.អ.វ៉ាយ គ្លូបល ឯ.ក និង ៨ ក្រុមហ៊ុន ប៉ាវ គីមស្រ៊ាង។
លោក ឈួន វ៉ន់ អគ្គនាយកនៃអគ្គនាយកដ្ឋានដឹកជញ្ជូនផ្លូវគោកប្រាប់ភ្នំពេញប៉ុស្តិ៍នៅថ្ងៃទី ៣០ ធ្នូថា ក្រសួងបានប្រកាសអនុញ្ញាតឱ្យបង់ពន្ធ និងអាករនាំចូលចំពោះរថយន្តចង្កូតស្តាំមានស្រាប់ក្នុងស្រុកជាលើកចុងក្រោយ ត្រឹមដំណាច់ខែមិថុនា ឆ្នាំ ២០២២ ខាងមុខ។
ជាមួយនឹងការអនុញ្ញាតនេះលោកបញ្ជាក់ថា៖ «តែរថយន្តទាំងនោះ ត្រូវកែចង្កូតស្តាំមកឆ្វេងដើម្បីឱ្យស្របច្បាប់ចរាចរណ៍ផ្លូវគោករបស់កម្ពុជា។ បន្ទាប់ពីឱសានវាទនោះ រថយន្តចង្កូតស្តាំដែលត្រូវបង្ក្រាបបាននឹងតម្រូវឱ្យដោះបំបែកជាគ្រឿងបន្លាស់ ឬកម្ទេចចោល»។
លោក នួន ប៊ុនថេត នាយកក្រុមហ៊ុន ប៉ាស្ទ័រមានជ័យ ស្ថិតក្នុងសង្កាត់ស្ទឹងមានជ័យ ដែលទទួលបានសិទ្ធិអនុញ្ញាតពីក្រសួង បានប្រាប់ភ្នំពេញប៉ុស្តិ៍នៅថ្ងៃទី ៣០ ធ្នូ ថា ក្នុងពេលបច្ចុប្បន្នមានរថយន្តជាច្រើនបានសម្រុកមកធ្វើការកែចង្កូតពីស្តាំមកឆ្វេង ជាពិសេសគឺរថយន្តដែលជ្រកក្រោមស្លាកលេខ ខ.ម។
នៅពេលម្ចាស់រថយន្តបានមកធ្វើការផ្លាស់ប្តូរចង្កូតនៅកន្លែងដែលមានការទទួលស្គាល់ពីក្រសួង ដូចជាយានដ្ឋានរបស់លោក គឺពួកគេនឹងទទួលបានការធានាគុណភាព ដោយមានទាំងការចេញលិខិតបញ្ជាក់ច្បាស់លាស់ផងដែរ ខណៈការយករថយន្តទៅធ្វើការផ្លាស់ប្តូរចង្កូត ដែលមិនមានការទទួលស្គាល់ពីក្រសួង អាចនឹងមានហានិភ័យ ឬមិនទទួលបានការទទួលស្គាល់ពីក្រសួងដែលបង្កភាពស្មុគស្មាញក្នុងពេលខាងមុខ។
លោកបញ្ជាក់ថា៖ «មកទល់ឥឡូវនេះ ខាងភ្ញៀវដែលគាត់មានរថយន្តជ្រកក្រោមស្លាកលេខ ខ.ម ចង្កូតស្តាំហ្នឹងគឺគាត់សម្រុកយកមកកែជាបន្តបន្ទាប់ ដោយសារតែគាត់ត្រូវគោរពទៅតាមរដ្ឋាភិបាលដែលបានកំណត់ឱ្យធ្វើអ៊ីចឹង»។ លោកលើកឡើងថា បើយើងចូលតាមរយៈកន្លែងដែលមានការអនុញ្ញាតត្រឹមត្រូវ យើងមានលិខិតបញ្ជាក់បញ្ហាបច្ចេកទេសជូនគាត់ ហើយសម្ភារដែលយើងបានផ្លាស់ប្តូរឱ្យគាត់គឺមានការធានា បើមានបញ្ហាបច្ចេកទេស ក្រុមហ៊ុនយើងនឹងទទួលខុសត្រូវនៅពេលគេសម្រុកមកធ្វើច្រើនអ៊ីចឹងខាងយើង មិនអាចធ្វើឱ្យបានទាន់ទេព្រោះយើងមានកម្រិតដែរ»។
លោក គឹម បញ្ញា នាយកអង្គការមូលនិធិបង្ការរបួសអាស៊ីបានលើកឡើងថា ការត្រួតពិនិត្យការកែរថយន្តចង្កូតស្តាំមកឆ្វេងនេះ គឺជារឿងដែលចាំបាច់ត្រូវយកចិត្តទុកដាក់ និងត្រូវធ្វើឱ្យបានម៉ឺងម៉ាត់បំផុត ព្រោះបញ្ហានេះអាចនឹងបង្កហានិភ័យខ្ពស់ បើមិនមានការត្រួតពិនិត្យឱ្យបានត្រឹមត្រូវ។
ជាមួយគ្នានេះ លោកក៏ជំរុញឱ្យក្រសួងស្ថាប័នពាក់ព័ន្ធ ចុះប្រមូលព័ត៌មានពីអ្នកបើកបរ និងចុះត្រួតពិនិត្យនៅតាមយានដ្ឋាននានា ដើម្បីចាត់វិធានការចំពោះការកែចង្កូតមិនត្រឹមត្រូវតាមបទដ្ឋានបច្ចេកទេស និងច្បាប់នេះ។
លោកបញ្ជាក់ថា៖ «ខ្ញុំគិតថា ក្នុងពេលបច្ចុប្បន្ននេះ រថយន្តចង្កូតស្តាំ មិនសូវជាមានច្រើនប៉ុន្មានទេ ដោយសារតែមានការកែប្រែជាបណ្តើរៗ និងជាបន្តបន្ទាប់មកហើយ។ បើសិនជាម្ចាស់យានដ្ឋានណាទៀត មានបំណងចង់ផ្តល់សេវាកែចង្កូតនេះ គឺត្រូវតែសុំការអនុញ្ញាតជាមុនហើយក្រសួងនឹងបន្តពិនិត្យទៅលើបទដ្ឋានបច្ចេកទេសរបស់យានដ្ឋានហ្នឹង ដើម្បីធានាដល់សុវត្ថិភាពរបស់អ្នកបើកបរ»។
ទន្ទឹមនឹងនេះលោក គឹម បញ្ញា ក៏បង្ហាញនូវក្តីសង្ឃឹមថា ក្រសួងនឹងមានវិធានការតឹងរ៉ឹងចំពោះរថយន្តដែលមានចង្កូតស្តាំនេះ ដោយបញ្ឈប់ឱ្យមានការនាំចូល កែច្នៃ និងចរាចរណ៍រថយន្តចង្កូតស្តាំនៅក្នុងប្រទេស បន្ទាប់ពីឱសានវាទដែលក្រសួងបានដាក់ចេញត្រូវបានផុតកំណត់ ដើម្បីចៀសវាងជនឆ្លៀតឱកាស នៅតែបន្តសកម្មភាពដដែលមិនចេះចប់មិនចេះហើយ៕
វីដេអូ៖
