ព្រះវិហារៈ សកម្មជនព្រៃឈើនៃបណ្តាញសហគមន៍ព្រៃឡង់ ខេត្តព្រះវិហារបានអះអាងថា ក្រុមហ៊ុន MACLE LOGISTICS (CAMBODIA) CO.; LTD និងក្រុមហ៊ុន PNT Co., Ltd កំពុងសហការគ្នា បន្តប្រមូលទិញឈើ ដែលបានមកពីបទល្មើសកាប់បំផ្លាញព្រៃឈើ នៅក្នុងតំបន់ស្នូលនៃដែនជម្រកសត្វព្រៃព្រៃឡង់ជាករណីដែលមន្ត្រីនៃមន្ទីរបរិស្ថានខេត្តព្រះវិហារទទួលស្គាល់ និងកំពុងធ្វើការស៊ើបអង្កេត។
លោកស្រី ថី អ្នកសម្របសម្រួល បណ្តាញសហគមន៍ព្រៃឡង់ខេត្តព្រះវិហារ បានប្រាប់ភ្នំពេញ-ប៉ុស្តិ៍នៅថ្ងៃទី ៣០ ធ្នូថា កាលពីពេលថ្មីៗនេះ ប្រជាពលរដ្ឋដែលជាសមាជិកក្រុមបណ្ដាញសហគមន៍ព្រៃឡង់បានរួមគ្នាចុះល្បាតព្រៃ ដើម្បីស្រាវជ្រាវបទល្មើសព្រៃឈើ និងសត្វព្រៃ ហើយបានប្រទះឃើញក្រុមមនុស្សប្រមាណ ៦០ នាក់ដែលក្នុងនោះមានទាំងមន្ត្រីកងរាជអាវុធហត្ថលើផ្ទៃប្រទេសម្នាក់ឈ្មោះ ចាប សារ៉ន និងមន្ត្រីនគរបាលប៉ុស្តិ៍ច្រាច់ ២ នាក់ ដែលមន្ត្រីកងកម្លាំងទាំងនោះ សុទ្ធសឹងជាមេការ និងជាប្រធានសន្តិសុខនៃក្រុមហ៊ុន MACLE LOGISTICS (CAMBODIA) CO.; LTD និងក្រុមហ៊ុន PNT Co., Ltd កំពុងធ្វើសកម្មភាពកាប់បំផ្លាញព្រៃឈើ និងដឹកជញ្ជូនឈើចេញពីក្នុងតំបន់ស្នូល នៃតំបន់ដែនជម្រកសត្វព្រៃ ព្រៃឡង់។
លោកបញ្ជាក់ថា៖ «យើងសង្ស័យក្រុមមនុស្សទាំងនោះ ត្រូវបានតំណាងក្រុមហ៊ុនទាំង ២ ជួលឱ្យមកកាប់ [ឈើ] ហើយពួកគេជាអ្នកប្រមូលទិញ»។ បើតាមលោក ថី ក្រុមជនប្រព្រឹត្តបទល្មើសទាំងនោះបានកាប់ផ្ដួលរំលំដើមឈើទាល ឡាំបោរ ផ្ដៀក ស្រឡៅ កកោះដួងចែម គគីរ និងដើមត្រាចដែលមានមុខកាត់ពី ០,៤ ដល់ ១,១ ម៉ែត្រ ហើយបានអារច្រៀកជាក្ដារបន្ទះ និងជាឃ្លុម ៤ ជ្រុងទ្រវែង។ ទីតាំងឈើដែលពួកគេបានកាប់បំផ្លាញនោះស្ថិតនៅចំណុច បុស្សរាំង, ជ្រាប់ក្បាលដំរី, ស្រែកណ្ដាល, អូរអាចម៍ដែក, ភូមិចាស់,ភ្នំចោទ, ប្រាសាទគោល, ព្រៃស្រឡៅ,និងចំណុចស្រែតាង៉ុត។
លោកបានបន្ថែមថា៖ «ឈើដែលពួកគេបានកាប់ និងអារច្រៀកដោយខុសច្បាប់ ពីក្នុងតំបន់ស្នូលនៃដែនជម្រកសត្វព្រៃព្រៃឡង់នោះ ត្រូវបានដឹកតាមគោយន្ត និងរថយន្តបង្កុងរាប់សិបគ្រឿងយកមកទម្លាក់ទុកនៅក្នុងបរិវេណដីសម្បទានសេដ្ឋកិច្ចរបស់ក្រុមហ៊ុន PNT Co., Ltd ដើម្បីបំប្លែងជាឈើស្របច្បាប់ ដើម្បីដឹកចេញយកទៅលក់បន្តនៅតាមដេប៉ូឈើនានានៅទូទាំងប្រទេស»។
ជាមួយគ្នានេះ លោក ស្រី ថី បានដាក់ការសង្ស័យថា ករណីកាប់បំផ្លាញព្រៃឈើក្នុងតំបន់ស្នូលនៃដែនជម្រកសត្វព្រៃ ព្រៃឡង់ ដោយក្រុមជនប្រព្រឹត្តបទល្មើសទាំងនេះ ទំនងជាមានការឃុបឃិតពីមន្ត្រីពាក់ព័ន្ធមួយចំនួន ជាពិសេសមន្ត្រីបរិស្ថានដែលមានកាតព្វកិច្ចសំខាន់ជាងគេ ក្នុងការការពារ និងអភិរក្សព្រៃឡង់នេះតែម្តង។
លោក មាស ញឹម អនុប្រធានមន្ទីរបរិស្ថានខេត្តព្រះវិហារបានទទួលស្គាល់ថា ពិតជាមានបទល្មើសកាប់បំផ្លាញព្រៃឈើថ្មីនៅក្នុងតំបន់ដែនជម្រកសត្វព្រៃ ព្រៃឡង់ប្រាកដមែន ដោយកាលពីពេលថ្មីៗនេះ លោកបានដឹកនាំក្រុមឧទ្យានុរក្ស ចុះល្បាតដោយសម្ងាត់ ហើយរកឃើញមានគល់ឈើកាប់ថ្មីចំនួន ៦ គល់។ ប៉ុន្តែករណីនេះ មិនមានច្រើនដូចការអះអាងរបស់ក្រុមបណ្ដាញសហគមន៍ព្រៃឡង់នោះទេ។
លោកបានថ្លែងថា៖ «យើងទទួលស្គាល់ថា មានករណីលួចកាប់ឈើនៅក្នុងតំបន់ដែនជម្រកសត្វព្រៃព្រៃឡង់ ប៉ុន្តែមិនមានច្រើនដូចការអះអាងរបស់សហគមន៍នោះទេ»។
លោក ញឹម បានបន្តថា នៅពេលនេះក្រុមការងាររបស់លោកបានរកឃើញតម្រុយខ្លះៗ ដែលបង្ហាញថា ករណីកាប់ឈើក្នុងតំបន់ដែនជម្រកសត្វព្រៃព្រៃឡង់នេះគឺមានជាប់ពាក់ព័ន្ធក្រុមហ៊ុនមួយចំនួន ដែលទទួលបានសិទ្ធិប្រមូលផល និងអនុផលព្រៃឈើពីក្រុមហ៊ុនសម្បទានមួយនៅក្នុងតំបន់នោះ។
ករណីនេះ ក្រុមការងាររបស់លោកកំពុងដំណើរការនីតិវិធី ដើម្បីស្រាវជ្រាវស្វែងរកការពិត ឈានទៅដល់ការចាប់ជនប្រព្រឹត្តបទល្មើសមកតុលាការចាត់វិធានការបន្តទៅតាមផ្លូវច្បាប់។
លោក ចាប សារ៉ន អនុប្រធានការិយាល័យបំភាន់អក្ខរៈនៃកងរាជអាវុធហត្ថលើផ្ទៃប្រទេសមិនអាចទាក់ទងស្នើសុំអធិប្បាយជុំវិញការចោទប្រកាន់ពីតំណាងបណ្ដាញសហគមន៍ព្រៃឡង់ខេត្តព្រះវិហារនោះបានទេនៅថ្ងៃទី ៣០ ធ្នូ។
ទោះយ៉ាងណាក៏ដោយ នាយកក្រុមហ៊ុន MACLE LOGISTICS (CAMBODIA) CO.; LTD លោក សយ សុផល ធ្លាប់បានចេញសេចក្ដីជូនដំណឹងមួយកាលពីថ្ងៃទី ២៥ ខែវិច្ឆិកា ឆ្នាំ ២០២១ ដោយបានបដិសេធថា អ្នកដែលកាប់ឈើទាំងនោះមិនមែនជាបុគ្គលិក ឬជាមេការនៅរោងម៉ាស៊ីនកែច្នៃឈើរបស់ក្រុមហ៊ុន MACLE LOGISTICS (CAMBODIA) CO.; LTD ដែលមានទីតាំងក្នុងឃុំរៀបរយ ខេត្តព្រះវិហារនោះឡើយ។
ចំណែកលោក ឡេង ឫទ្ធី នាយកក្រុមហ៊ុន PNT Co.,ltd មិនអាចទាក់ទងស្នើសុំអត្ថាធិប្បាយជុំវិញបញ្ហានេះបានទេនៅថ្ងៃទី ៣០ ធ្នូ។ ក្រុមហ៊ុននេះទទួលបានសិទ្ធិវិនិយោគពីរដ្ឋាភិបាលលើផ្ទៃដីសម្បទានទំហំ ៧ ៩០០ ហិកតានៅក្នុងឃុំរៀបរយ ស្រុករវៀង ហើយក្រុមហ៊ុនមួយនេះបានផ្តល់សិទ្ធិឱ្យក្រុមហ៊ុន MACLE LOGISTICS (CAMBODIA) CO.; LTD សហការប្រមូលផលអនុផលព្រៃឈើ ក្នុងបរិវេណគម្រោងដីសម្បទានសេដ្ឋកិច្ចក្រុមហ៊ុនរបស់ខ្លួន ដើម្បីយកមកបង់សួយសារ និងបុព្វលាភជូនរដ្ឋ៕