.jpg)
កិច្ចប្រជុំរបស់មន្ត្រីជំនាញ កបប ដើម្បីដាក់ចេញកម្មវិធី ការពារសិទ្ធិអ្នកប្រើប្រាស់ឆ្នាំ ២០២២។ រូបថត CCF
ភ្នំពេញៈ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ហៅកាត់ថា ក.ប.ប បានដាក់ចេញកម្មវិធីចំនួន ៧ សម្រាប់អនុវត្តក្នុងឆ្នាំ ២០២២ ដើម្បីបង្កើនប្រសិទ្ធភាពក្នុងការការពារអ្នកប្រើប្រាស់ សុវត្ថិភាពម្ហូបអាហារ និងធានាការធ្វើធុរកិច្ចដោយសមធម៌។
លោក ផាន អូន ប្រតិភូរាជរដ្ឋាភិបាលទទួលបន្ទុកអគ្គនាយកនៃអគ្គនាយកដ្ឋាន ក.ប.ប ថ្លែងនៅថ្ងៃទី ២៩ ធ្នូថា កម្មវិធីទាំង ៧ នោះមានដូចជា កម្មវិធីសុវត្ថិភាពម្ហូបអាហារ កម្មវិធីកិច្ចការពារអ្នកប្រើប្រាស់ កម្មវិធីកិច្ចការប្រកួតប្រជែង កម្មវិធីកិច្ចការហាឡាល កម្មវិធីត្រួតពិនិត្យជាភាគីទី ៣ កម្មវិធីអនុវត្តច្បាប់ និងកិច្ចសហប្រតិបត្តិការ និងកម្មវិធីអភិវឌ្ឍន៍ធនធានមនុស្ស។
លោកបញ្ជាក់ថា កម្មវិធីទាំងនេះនឹងពង្រឹងប្រសិទ្ធភាពក្នុងការត្រួតពិនិត្យ ការអង្កេត និងការឆ្លើយតបសុវត្ថិភាពម្ហូបអាហារ លើកកម្ពស់កិច្ចសហការជាមួយអង្គភាពពាក់ព័ន្ធថ្នាក់ជាតិ សមាគមអ្នកប្រើប្រាស់ ស្ថាប័នអប់រំស្រាវជ្រាវ វិស័យឯកជន និងអង្គការអន្តរជាតិនានា។ ជាមួយគ្នានោះ កម្មវិធីទាំងនោះក៏នឹងជំរុញការប្រកួតប្រជែងប្រកបដោយតម្លាភាព និងបរិយាប័ន្ន លើកកម្ពស់ការយល់ដឹងច្បាប់បទដ្ឋានគតិយុត្ត ការយល់ដឹងទាក់ទងនឹងផលិតផល ពង្រឹងប្រសិទ្ធភាពការចូលរួមរបស់វិស័យឯកជន និងស្ថាប័នពាក់ព័ន្ធទាំងអស់។ កម្មវិធីដែលដាក់ចេញទាំងនេះនឹងពង្រឹងរចនាសម្ព័ន្ធ និងសមត្ថភាពបច្ចេកទេស ក្នុងការអនុវត្តច្បាប់ និងការពារផលប្រយោជន៍របស់អ្នកប្រើប្រាស់ជំរុញឱ្យមានការបង្កើតសមាគមអ្នកប្រើប្រាស់តាមវិស័យ និងលើកកម្ពស់ការយល់ដឹងអំពីសិទ្ធិ និងការទទួលខុសត្រូវរបស់អ្នកប្រើប្រាស់ជាដើមផងដែរ។
លោកថ្លែងថា៖ «យើងចាត់ថ្នាក់វាទៅជាកម្មវិធីអ៊ីចឹងទៅដើម្បីងាយស្រួលអនុវត្តប្រមូលផ្តុំថាតើក្នុងឆ្នាំ ២០២២ យើងធ្វើអីខ្លះ អ៊ីចឹងទេយើងបែងចែកក្រុមបែបនេះយើងដឹងថា ឯកសារគតិយុត្តអីដែលយើងត្រូវកសាងបន្ថែម ការទំនាក់ទំនងអ្វីដែលយើងពង្រឹងជាមួយស្ថាប័នក្រសួងពាក់ព័ន្ធ តើយើងត្រូវអនុវត្តទៅលើមុខទំនិញណាខ្លះ ដែលមិនមានសុវត្ថិភាពតាមក្រឹត្យក្រមនៃការគ្រប់គ្រងហានិភ័យ»។
បើតាមលោក ផាន អូន នៅឆ្នាំ ២០២១ កន្លងទៅ ក.ប.ប បានសម្រេចការតាក់តែងច្បាប់ស្តីពីការប្រកួតប្រជែង និងអនុក្រឹត្យមួយចំនួននៅក្រោមច្បាប់នោះ ព្រមទាំងប្រកាសរួម និងប្រកាសក្រោមច្បាប់អ្នកការពារអ្នកប្រើប្រាស់សម្រាប់បញ្ជូនទៅឱ្យមន្ត្រីស៊ើបអង្កេតនគរបាលយុត្តិធម៌បានអនុវត្តច្បាប់។
លោកថា កន្លងមកថ្មីៗនេះ មន្ត្រី ក.ប.ប ក៏មានសកម្មភាពទៅលើធុរកិច្ចមិនសុចរិតចំពោះផលិតផល ឬក៏ម្ចាស់ស្ថានីយ ឬធុរជនលើវិស័យប្រេងឥន្ធនៈ និងបានបង្ក្រាបករណីនាំចរាចរផលិតផលអេទីលអាល់កុល ដែលឈ្មួញបានយកមេតាណុលទៅក្លែងជាអេទីលអាល់កុលបានប្រហែលជិត ២០០ តោន។ ក្រៅពីនោះ សមិទ្ធផលនៃការប្រយុទ្ធប្រឆាំងជាមួយការក្លែងម៉ាក ជាពិសេសករណីកម្មសិទ្ធិបញ្ញា និងសុវត្ថិភាពម្ហូបអាហារ ក.ប.ប បានរឹបអូសកម្ទេចចោលប្រហែល ៤០ តោន ក្នុងឆ្នាំ ២០២១។
លោកថ្លែងថា៖ «ជាពិសេសមន្ត្រី ក.ប.ប ដែលមាននីតិសម្បទាជានគរបាលយុត្តិធម៌គឺយើងខិតខំបណ្តុះបណ្តាលគាត់លើទិដ្ឋភាពច្បាប់ ស្តីពីការការពារអ្នកប្រើប្រាស់ និងច្បាប់ស្តីពីការប្រកួតប្រជែង និងឯកសារគតិយុត្តផ្សេងៗទៀត ក្រៅពីនោះយើងមានការផ្សព្វផ្សាយថ្នាក់ជាតិ និងក្រុមអ្នកពាក់ព័ន្ធផ្សេងៗ វិស័យឯកជន ក្រសួងស្ថាប័នដែលជាអញ្ញាតករមានសមត្ថកិច្ច»។
លោក ប៉ិច ពិសី នាយកប្រតិបត្តិអង្គការតម្លាភាពកម្ពុជាថ្លែងនៅថ្ងៃទី ២៩ ខែធ្នូថា បើសិនជាបញ្ហានៃការកេងបន្លំផ្សេងៗតាមរយៈការផ្តល់ផលិតផលជូនសាធារណជន នៅតែបន្តមានបញ្ហាមានន័យថា ប្រសិទ្ធភាពរបស់ស្ថាប័នមួយនេះត្រូវតែមានការកែសម្រួលបន្ថែម និងជំរុញការអនុវត្តច្បាប់ឱ្យស្មើភាពគ្នា។ លោកថា៖ «យើងឃើញមានយុទ្ធនាការច្រើនក្នុងការចុះត្រួតពិនិត្យ ប៉ុន្តែបញ្ហាវាអត់ថមថយនៃការកេងបន្លំចំនួនសាំងចំនួនលីត្រ ការចាក់សាំងលាយខូចគុណភាពអីជាដើម នៅតែបន្តមានតាមហ្គារ៉ាសសាំងផ្សេងៗ ដែលប៉ះពាល់ដល់ប្រយោជន៍សាធារណៈ»។
លោក ប៉ិច ពិសី បានលើកឡើងថា ប្រជាពលរដ្ឋជាអ្នកប្រើប្រាស់គួរតែចូលរួមសហការខ្វល់ខ្វាយពីការប្រើប្រាស់របស់ខ្លួនប្រសើរជាងអង្គុយចាំតែស្តីបន្ទោស។ ក្នុងកិច្ចការងារនេះអាជ្ញាធរមិនអាចធ្វើការតែម្នាក់ឯងហើយបានជោគជ័យនោះទេ ព្រោះអាជ្ញាធរក៏ត្រូវការចាំបាច់នូវការចូលរួមរបស់ប្រជាពលរដ្ឋ ដើម្បីផ្តល់ព័ត៌មាន ឬឯកសារភ័ស្តុតាងដើម្បីជំរុញការអនុវត្តច្បាប់ផងដែរ។ លោកថ្លែងថា៖ «បើពលរដ្ឋដឹងខ្លួនថា គាត់ត្រូវបានទិញអីវ៉ាន់មួយដែលអត់គ្រប់ទំហំចំនួនដែលគាត់ត្រូវទិញ ហើយគុណភាពអន់អីជាដើម មានការភូតកុហកគុណភាពអាហ្នឹងទាល់តែគាត់ចូលរួមជួយទាមទារឱ្យមានការគោរពនូវសុចរិតភាពនៃការទិញដូរអីវ៉ាន់ផ្សេងៗហ្នឹង ពីសំណាក់អ្នករកស៊ីក្តី ប្រជាពលរដ្ឋក្តី គឺជំរុញទាំងអស់គ្នាបានយើងអាចបង្កើនប្រសិទ្ធភាពនៃការធ្វើអាជីវកម្មស្អាតស្អំហ្នឹងបាន»៕
