.jpg)
ទិដ្ឋភាពទន្លេវ៉ៃកូនៅក្រុងស្វាយរៀង ខេត្តស្វាយរៀង។ រូបថត សហការី
ស្វាយរៀងៈ អាជ្ញាធរខេត្តស្វាយរៀង កំពុងចាក់ដីធ្វើស្ថានីយបូមទឹក នៅក្នុងអាងទន្លេវ៉ៃកូ និងតបណ្តាញទុយោទឹក ព្រមទាំងធ្វើអាងប្រព្រឹត្តិកម្មទឹកស្អាត ដើម្បីបំពេញសេចក្តីត្រូវការបន្ថែមលើការផ្គត់ផ្គង់ការប្រើប្រាស់ទឹកស្អាត នៅក្នុងក្រុងស្វាយរៀង និងតំបន់ជាយក្រុងបន្ថែមទៀត។
លោក ឡុង សុខុម ប្រធានមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ខេត្តស្វាយរៀង ថ្លែងនៅថ្ងៃទី ៣០ ធ្នូ ថា អាជ្ញាធរពាក់ព័ន្ធ និងមន្ត្រីជំនាញកំពុងចាក់ដីធ្វើស្ថានីយបូមទឹកនៅក្នុងទន្លេវ៉ៃកូ ស្ថិតនៅខាងជើងទ្វារទឹកស្ពានតាហោ សង្កាត់ពោធិ៍តាហោ ដើម្បីផ្គត់ផ្គង់ទឹកស្អាតជូនប្រជាពលរដ្ឋបន្ថែមឱ្យបានកាន់តែច្រើន។ ស្ថានីយបូមទឹកឆៅថ្មីនេះ មានទំហំ ៥ គុណ ៦ ម៉ែត្រការ៉េ បំពាក់ម៉ាស៊ីនបូមទឹក ១ គ្រឿង ដែលមានសមត្ថភាពបូមទឹកបាន ១១ ០០០ ម៉ែត្រគុប ក្នុង ១ ថ្ងៃ ហើយអាចបញ្ចេញទៅជាទឹកស្អាតសម្រាប់ប្រើប្រាស់បាន ៩ ០០០ ម៉ែត្រគុបក្នុង ១ ថ្ងៃ។
លោក ឡុង សុខុម បញ្ជាក់ទៀតថា ការចាក់ដីធ្វើស្ថានីយបូមទឹកឆៅនេះ ស្ថិតក្នុងគម្រោងផ្គត់ផ្គង់ទឹកស្អាតទីប្រជុំជនក្រោមជំនួយឥណទានរបស់ធនាគារអភិវឌ្ឍន៍អាស៊ី (ADB) បដិភាគជាមួយរាជរដ្ឋាភិបាលកម្ពុជា សម្រាប់បំពេញសេចក្តីត្រូវការផ្គត់ផ្គង់ទឹកស្អាតក្នុងតំបន់សេវាកម្មរបស់អង្គភាពរដ្ឋាករទឹកស្វាយរៀង។
គម្រោងនេះចាប់ផ្តើមពីខែមករាដើមឆ្នាំ ២០២១ គ្រោងនឹងបញ្ចប់នៅពាក់កណ្តាលឆ្នាំ ២០២២ ខណៈបច្ចុប្បន្ន គម្រោងនេះអនុវត្តបាន ៧០ ភាគរយហើយ បើរាប់ទាំងប្រព័ន្ធតបណ្តាញទុយោទឹក និងអាងប្រព្រឹត្តិកម្មទឹកស្អាត ដោយឡែកស្ថានីយបូមទឹកឆៅដំណើរការយឺតជាងគេដោយសារតែកន្លងមកមានការខ្វះដីសម្រាប់ចាក់បំពេញ។
បើតាមលោក ឡុង សុខុម បច្ចុប្បន្នមានទឹកស្អាតចំនួន ៧ ០០០ ម៉ែត្រគុបក្នុង ១ ថ្ងៃ សម្រាប់ផ្គត់ផ្គង់ទៅដល់ប្រជាពលរដ្ឋប្រមាណ ៥ ០០០ គ្រួសារប្រើប្រាស់ នៅក្នុងភូមិសាស្ត្រក្រុងស្វាយរៀង។
ប៉ុន្តែនៅពេលស្ថាននីយទឹកស្អាតថ្មីនេះដំណើរការនឹងជួយបន្ថែមទៅដល់ប្រជាពលរដ្ឋក្នុងស្រុកស្វាយជ្រំ ២ ដែលមាន ២ ឃុំទៀត គឺឃុំស្វាយជ្រំ និងឃុំតាសួសបានប្រមាណជាង ២ ០០០ គ្រួសារទៀត នឹងទទួលបានទឹកស្អាតប្រើប្រាស់។
លោកថ្លែងថា៖ «ឥឡូវនេះយើងមានជាក់ស្តែង ៧ ០០០ ម៉ែត្រគុប ហើយគម្រោង ADB នេះ ៩ ០០០ ម៉ែត្រគុបទៀតយើងនឹងបានប្រហែលជា ៦០ ភាគរយជាងនៃតម្រូវការហើយនៅក្នុងឆ្នាំ ២០២២ ហ្នឹងដែរ អំឡុងខែ ៣ អាចនឹងដំណើរការគម្រោងមួយទៀត ដែលជាជំនួយឥតសំណងរបស់អង្គការ JICA មានសមត្ថភាព ៦ ៨០០ ម៉ែត្រគុបក្នុង ១ ថ្ងៃទៀត»។
លោក ឡុង សុខុម បានឱ្យដឹងថា ដើមឡើយចំណាប់អារម្មណ៍នៃការប្រើប្រាស់ទឹកស្អាតរបស់ប្រជាពលរដ្ឋគឺនៅមានកម្រិត ដោយសារសម្បូរប្រភពទឹកក្រោមដី។ នៅស្ទើរតែគ្រប់ផ្ទះរបស់ប្រជាពលរដ្ឋមានអណ្តូងទឹកប្រើប្រាស់ ដែលមានទាំងប្រាំង និងវស្សា ប៉ុន្តែដោយមានការវិវឌ្ឍផ្នែកសេដ្ឋកិច្ចធ្វើឱ្យជីវភាពពលរដ្ឋប្រែប្រួលហេតុនេះពួកគាត់ក៏ចាប់អារម្មណ៍មកលើសុខភាព និងឈានទៅប្រើប្រាស់ទឹកស្អាតវិញ ព្រោះទឹកអណ្តូងមិនសូវមានសុវត្ថិភាពដូចទឹកស្អាតនោះទេ។
លោកបានថ្លែងថា៖ «បើគាត់បូម (ទឹកអណ្តូង ឬទឹកស្រះ) មកភ្លាមប្រើភ្លាមវាអាចថាទឹកហ្នឹងមានមេរោគ មានសារធាតុរ៉ែអីមួយចំនួន ដែលធ្វើឱ្យប៉ះពាល់ដល់សុខភាពគាត់ ម្ល៉ោះហើយគាត់បានផ្លាស់ប្តូរគំនិតចង់បានទឹកស្អាតប្រើប្រាស់។ យើងសង្កេតឃើញថា នៅពេលចុងទុយោយើងទៅដល់ណា អ្នកនៅខាងចុងទុយោនោះគាត់តែងចង់បានទឹក»។
លោក រស់ ផារិទ្ធ អភិបាលរង និងជាអ្នកនាំពាក្យរដ្ឋបាលខេត្តស្វាយរៀងថ្លែងថ្ងៃទី ៣០ ខែធ្នូ ថា បច្ចុប្បន្ន អាងទន្លេវ៉ៃកូអាចស្តុកទឹកបានប្រមាណ ៣៥ លានម៉ែត្រគុប ហើយលោកអភិបាលខេត្តលើកឡើងថា អាចនឹងពង្រីកបរិមាណទឹករហូតដល់ ៤០ លានម៉ែត្រគុប នៅពេលខាងមុខ ដើម្បីឆ្លើយតបតម្រូវការនៃការផ្គត់ផ្គង់ទឹកស្អាត ជូនប្រជាពលរដ្ឋ ជំនួសឱ្យការប្រើប្រាស់ទឹកក្រោមដីដែលប្រជាពលរដ្ឋធ្លាប់ប្រើ។
លោកបានថ្លែងថា៖ «តាមការសិក្សាពីអ្នកជំនាញខាងបច្ចេកទេស គឺថា ទឹកទន្លេវ៉ៃកូនេះ យើងយកទៅឆ្លងកាត់ខាងប្រព័ន្ធប្រព្រឹត្តិកម្មអីបានត្រឹមត្រូវ តាមបច្ចេកទេសគឺមានលក្ខណៈល្អប្រសើរជាងដែលយើងយកទឹកពីក្រោមដី ហើយក៏មិនសូវមានផលប៉ះពាល់អ្វីធ្ងន់ធ្ងរដែរ»៕
