.jpg)
ភ្នំពេញៈ រាជរដ្ឋាភិបាលដាក់ចេញសារាចរណែនាំទៅគ្រប់ក្រសួង ស្ថាប័ន រដ្ឋបាលរាជធានីខេត្ត ក្រុង ស្រុក ខណ្ឌ ត្រូវអនុវត្តឱ្យមានប្រសិទ្ធភាពនិងដោយស្មារតីខុសត្រូវខ្ពស់ ចំពោះការដំឡើងឋានន្តរស័ក្តិ និងថ្នាក់ ដល់មន្ត្រីរាជការស៊ីវិលមន្ត្រីនគរបាលជាតិ មន្ត្រីពន្ធនានាគារនៃក្រសួងមហាផ្ទៃ និងយោធិននៃកងយោធពលខេមរភូមិន្ទ។
សារាចរណែនាំរបស់រាជរដ្ឋាភិបាលចុះថ្ងៃទី ៣១ ខែធ្នូ ឆ្នាំ ២០២១ បានឱ្យដឹងថា រាជរដ្ឋាភិបាលបានដាក់ចេញនូវការណែនាំ ការអនុវត្តការដំឡើង ឋានន្តរស័ក្តិ និងថ្នាក់សម្រាប់ឆ្នាំ ២០២១ និងឆ្នាំ ២០២២ ចំនួន២ចំណុចដូចខាងក្រោម។
ទី ១ការដំឡើងឋានន្តរស័ក្តិ និងថ្នាក់ មន្ត្រីពន្ធនាគារ នៃក្រសួងមហាផ្ទៃ និងយោធិននៃកងយោធពលខេមរភូមិន្ទ សម្រាប់ឆ្នាំ ២០២១ និងឆ្នាំ ២០២២ ត្រូវអនុវត្តជាធម្មតាអនុលោមតាមលិខិតបទដ្ឋានគតិយុត្តជាធរមាន។
និងទី ២ ការប្រែប្រួលស្ថានភាពថវិកានៅក្នុងតារាងទូទាត់បៀវត្សសម្រាប់មន្ត្រីរាជការស៊ីវិល នៃក្រុមនីតិប្បញ្ញត្តិ នីតិប្រតិបត្តិ តុលាការ មន្ត្រីរាជការស៊ីវិលផ្សេងទៀត មន្ត្រីនគរបាលជាតិ មន្ត្រីពន្ធនាគារ នៃក្រសួងមហាផ្ទៃ និងយោធិននៃកងយោធពលខេមរភូមិន្ទ ដែលត្រូវបានដំឡើងឋានន្តរស័ក្តិ និងថ្នាក់នៅឆ្នាំ ២០២១ និងឆ្នាំ ២០២២ ត្រូវអនុវត្តចាប់ពីខែឧសភា ឆ្នាំ ២០២២ ដោយមិនមានការអនុវត្តប្រតិសកម្មឡើយ។
ការចេញសារាចរនេះធ្វើឡើងដោយ យោងតាមការសម្រេចរបស់រាជរដ្ឋាភិបាលចុះថ្ងៃទី ៦ ខែតុលា ឆ្នាំ ២០២០ លើលិខិតលេខ ៨៣៥៨ សហវ.អថ ចុះថ្ងៃទី ៥ ខែតុលា ឆ្នាំ ២០២០ របស់ក្រសួងសេដ្ឋកិច្ចនិងហិរញ្ញវត្ថុ និងការសម្រេចរបស់រាជរដ្ឋាភិបាលចុះថ្ងៃទី ២ ខែតុលា ឆ្នាំ ២០២១ លើលិខិតលេខ ៨២១៩ សហវ ចុះថ្ងៃទី១ ខែតុលា ឆ្នាំ ២០២១ របស់ក្រសួងសេដ្ឋកិច្ចនិងហិរញ្ញវត្ថុ ព្រមទាំងសំណើរបស់ រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និងរដ្ឋមន្ត្រីក្រសួងមុខងារសាធារណៈ៕
