.jpg)
លោក ម៉ៅ ចំរើន ដែលត្រូវផ្ទេរពីប្រធានមន្ទីររៀបចំដែនដីខេត្តមណ្ឌលគិរីមកបម្រើការនៅក្រសួង ។ រូបថត ហ្វេសប៊ុក
មណ្ឌលគិរីៈក្រសួងរៀបចំដែនដីនគរូបនីយកម្មសំណង់និងសុរិយោដីកាលពីពេលថ្មីៗនេះបានចេញលិខិត ១ ច្បាប់ជម្រាបជូនអភិបាលខេត្តមណ្ឌលគិរីស្ដីពី ការផ្ទេរភារកិច្ច លោក ម៉ៅ ចំរើន ប្រធានមន្ទីររៀបចំដែនដីនគរូបនីយកម្មសំណង់និងសុរិយោដីខេត្តមណ្ឌលគិរីឱ្យទៅបម្រើការងារនៅទីស្ដីការក្រសួងវិញ។នេះបើតាមលិខិតចុះថ្ងៃទី ២៤ ខែធ្នូ ឆ្នាំ ២០២១ ដែលភ្នំពេញប៉ុស្តិ៍ទទួលបានកាលពីថ្ងៃទី ២ ខែមករា ឆ្នាំ ២០២២។
ក្នុងលិខិតនោះ លោកជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានតែងតាំងលោក លឹម ចាន់សូភី អនុប្រធានមន្ទីរពិសោធន៍ជាតិសំណង់ និងជាអតីតប្រធានមន្ទីររៀបចំដែនដី នគរូបនីយកម្មសំណង់និងសុរិយោដីខេត្តកណ្ដាលឲ្យជំនួសតួនាទីលោក ម៉ៅ ចំរើន ដែលនឹងត្រូវផ្លាស់ចេញ។
លោក ជា សុផារ៉ា បានបញ្ជាក់ថា៖ «យោងតាមការចាំបាច់ ក្រសួងសូមស្នើឯកឧត្តមអភិបាលនៃគណៈអភិបាលខេត្តមណ្ឌលគិរីសម្រួលភារកិច្ចលោក ម៉ៅ ចំរើន ពីប្រធានមន្ទីររៀបចំដែនដីនគរូបនីយកម្មសំណង់និងសុរិយោដីខេត្តមណ្ឌលគិរីមកបម្រើការនៅទីស្ដីការក្រសួងរៀបចំដែនដីនគរូបនីយកម្មនិងសំណង់។ ជាមួយគ្នានេះខ្ញុំសូមស្នើតែងតាំង លោក លឹម ចាន់សូភី អនុប្រធានមន្ទីរពិសោធន៍ និងជាអតីតប្រធានមន្ទីររៀបចំដែនដីនគរូបនីយកម្មសំណង់ និងសុរិយោដីខេត្តកណ្ដាលជាប្រធានមន្ទីររៀបចំដែនដីនគរូបនីយកម្មសំណង់និងសុរិយោដីខេត្តមណ្ឌលគិរី ជំនួសវិញ»។
ជុំវិញការផ្លាស់ប្តូរភារកិច្ចថ្មីនេះ លោក ម៉ៅ ចំរើន មិនអាចទាក់ទងសុំការអធិប្បាយបានទេកាលពីថ្ងៃទី ២ ខែមករា ឆ្នាំ ២០២២។ ទោះជាយ៉ាងណាក្ដី លោក ជាក់ ម៉េងហ៊ាង អ្នកនាំពាក្យរដ្ឋបាលខេត្តមណ្ឌលគិរី បានប្រាប់ភ្នំពេញ-ប៉ុស្តិ៍ថា ជានីតិវិធីផ្នែករដ្ឋបាល ការផ្លាស់ប្ដូរភារកិច្ចនិងការតែងតាំងមន្ត្រីណាម្នាក់គឺជារឿងធម្មតារបស់មន្ត្រីរាជការ។ ប៉ុន្តែនៅពេលមិនទាន់មានការប្រកាសផ្ទេរភារកិច្ចនិងតែងតាំងអ្នកជំនួសថ្មីជាផ្លូវការនោះ មន្ត្រីចាស់នៅ
តែមានសិទ្ធិ ចូលបំពេញការងារទៅតាមតួនាទីនិងភារកិច្ចរបស់ខ្លួនប្រកបដោយការទទួលខុសត្រូវខ្ពស់។
លោកថ្លែងថា៖ «នៅពេលនេះខ្ញុំមិនទាន់បានឃើញលិខិតនោះនៅឡើយទេ ប៉ុន្តែវាទំនងជាត្រូវបានបញ្ជូនទៅដល់ផ្នែករដ្ឋបាលហើយ។ ទោះយ៉ាងណាសម្រាប់មន្ត្រីរាជការការផ្លាស់ប្ដូរភារកិច្ចពីកន្លែងមួយទៅកន្លែងមួយគឺជារឿងធម្មតាប៉ុណ្ណោះ»។
ស្រដៀងគ្នានេះ លោក លឹម ចាន់សូភី ដែលបច្ចុប្បន្នជាអនុប្រធានមន្ទីរពិសោធន៍ជាតិសំណងនៃក្រសួងរៀបចំ ដែនដីនគរូបនីយកម្ម និងសំណង់បានប្រាប់ភ្នំពេញប៉ុស្តិ៍ថាលោកនឹងគោរពអនុវត្តតាមការសម្រេចរបស់ថ្នាក់ដឹក
នាំក្រសួង។
លោកបានបញ្ជាក់ថា៖«រាល់ការចាត់តាំងនិងការសម្រេចរបស់ក្រសួងយើងជាមន្ត្រីរាជការចាំបាច់ត្រូវតែគោរពនិងអនុវត្តតាម។ ទោះយ៉ាងណា នៅពេលនេះ ខ្ញុំកំពុងបម្រើការងារនៅក្នុងមន្ទីរពិសោធន៍ជាតិសំណង់នៅឡើយ»។
លោក ចាន់សូភី បានថ្លែងទៀតថា ពេលនេះមន្ទីរពិសោធន៍ជាតិសំណង់កំពុងអភិវឌ្ឍទំនើបកម្មថ្មីបានប្រមាណ ៨០ ភាគរយហើយដោយបានបំពាក់ម៉ាស៊ីនស្វ័យប្រវត្តិកម្មទំនើបៗក្រោមជំនួយគាំទ្រពីប្រទេសជប៉ុន។ កិច្ចការ
ងារសំខាន់ៗរបស់លោកពេលនេះគឺពាក់ព័ន្ធការគ្រប់គ្រងនិងត្រួតពិនិត្យគុណភាពសំណង់និងគ្រឿងសម្ភារបរិក្ខារសំណង់ ទាំងការផលិតក្នុងស្រុក និងការនាំចូលពីក្រៅប្រទេស៕
