.jpg)
សមត្ថកិច្ចបង្ក្រាបគ្រឿងញៀនជាង ៤០០ គីឡូក្រាម នៅកោះពូលូវៃកាលពីថ្ងៃទី ៦ កុម្ភៈ ឆ្នាំ ២០២១។ រូបថត ប៉ូលិស
ភ្នំពេញៈ ក្នុងឆ្នាំ ២០២១ សមត្ថកិច្ចបង្ក្រាបសារធាតុញៀនគ្រប់ប្រភេទបានជាង ៤ តោន និងឃាត់ខ្លួនមនុស្សបានជាង ១ ម៉ឺននាក់ក្នុងនោះមានជនបរទេសជាង ៣៦២ នាក់។ នេះបើយោងតាមរបាយការណ៍របស់គណៈកម្មការទី ៣ នៃយុទ្ធនាការប្រឆាំងគ្រឿងញៀនខុសច្បាប់។
លោក អ៊ិន សុង នាយករងមន្ទីរប្រឆាំងគ្រឿងញៀននៃអគ្គស្នងការដ្ឋាននគរបាលជាតិ ប្រាប់ភ្នំពេញប៉ុស្តិ៍នៅថ្ងៃទី ២ ខែមករាដោយផ្អែកតាមរបាយការណ៍ថា គិតចាប់ពីថ្ងៃទី ១ ខែមករា រហូតដល់ថ្ងៃទី ៣១ ខែធ្នូ ឆ្នាំ ២០២១ សមត្ថកិច្ចបង្ក្រាបករណីគ្រឿងញៀនបានចំនួន ៦ ២៤២ ករណី ចាប់ខ្លួនមនុស្សចំនួន ១៣ ៧៦៥ នាក់ (ស្រី ៨០២ នាក់) ក្នុងនោះមានជនបរទេសចំនួន ៣៦២ នាក់ (ស្រី ៤៥ នាក់) និងមានចំនួន ១៣ សញ្ជាតិ។ លោកបន្តថា ចំពោះគ្រឿងញៀនដកហូតបានសរុបជាង ៤ តោន និងកាំភ្លើងវែង-ខ្លីជិត ១០០ ដើម។
ក្នុងរបាយការណ៍បានបញ្ជាក់ថា ករណីជួញដូរ រក្សាទុក កែច្នៃ ចាត់ចែងមានចំនួន ៤ ៤១៥ ករណី ឃាត់ខ្លួនមនុស្ស ៨ ៥៤៩ នាក់ (ស្រី ៥៧៣ នាក់) ករណីដាំដុះចំនួន ៣៥ ករណី ឃាត់ខ្លួនមនុស្ស ៩ នាក់ (ស្រី ៥ នាក់) ករណីប្រើប្រាស់ មានចំនួន ១ ៧៩២ ករណី ឃាត់ខ្លួនមនុស្ស ៥ ២០៧ នាក់ (ស្រី ២២៤ នាក់) និងករណីអនុវត្ដដីកាមានចំនួន ៤៩០ ដីកា ឃាត់ខ្លួន ៤៤៥ នាក់ (ស្រី ១៨ នាក់)។
របាយការណ៍បន្តថា ចំពោះសារធាតុញៀនគ្រប់ប្រភេទ ដកហូតមានទម្ងន់ ៤ តោន ៤៣៥ គីឡូ និង ២២៨,៥១ ក្រាម កញ្ឆា ៥២,២១៤ ដើម កញ្ឆាស្ងួត ១៤១ គីឡូ និង ៨៣០,៦៣ ក្រាម និងសារធាតុផ្សំគីមី ១ តោន និង ១៦៣ គីឡូ និង ៦៨០ ក្រាម។ ចំណែកសម្ភារចាប់យកមាន រថយន្ដ ១២៤ គ្រឿង ម៉ូតូ ១ ៦៤៧ គ្រឿង ទូរស័ព្ទ ៥ ៨៥៣ ជញ្ជីង ៣៣៦ គ្រឿង អាវុធខ្លី ៤១ ដើម និងអាវុធវែង ៤២ ដើម (កែច្នៃ ៣២ ដើម) លុយខ្មែរ ៥៣ ៩៦១ ៤០០ រៀល លុយអាមេរិក ៣៤ ៩៨៧ ដុល្លារ លុយថៃ ១២៤ ៨១០ បាត និងលុយវៀតណាម ៨០ ០០០ ដុង។
ក្រៅពីនេះក៏បានឃាត់ទុកទ្រព្យសម្បត្តិអចលនទ្រព្យ ១៦ កន្លែង រួមមាននៅតាកែវ ១ កន្លែង បន្ទាយមានជ័យ ១ កន្លែង កោះកុង ១ កន្លែង ប៉ោយប៉ែត ២ កន្លែង សៀមរាប ២ កន្លែង និងភ្នំពេញ ៣ កន្លែង និងខុនដូ ៦ បន្ទប់ នៅភ្នំពេញ។ ចំណែកគណនីធនាគារចំនួន ៩ គណនី និងសាច់ប្រាក់ ចំនួន ១៦ ០៤៧,១៧ ដុល្លារ ត្រូវបានបង្កកផងដែរ។
នាយករងអង្គការពារសិទ្ធិមនុស្ស លីកាដូ លោក អំ សំអាត មើលឃើញថា តួលេខគ្រឿងញៀនដែលបង្ក្រាបបាននេះ ជាចំនួនមួយគួរឱ្យព្រួយបារម្ភដែលទាមទារឱ្យរាជរដ្ឋាភិបាលត្រូវយកចិត្តទុកបន្ថែមទៀតក្នុងការទប់ស្កាត់ការប្រើប្រាស់ និងការជួញដូរ។ លោកបញ្ជាក់ថា៖ «ព្រោះគ្រឿងញៀនបំផ្លាញនូវធនធានមនុស្ស អ៊ីចឹងកិច្ចការទាំងអស់នេះ ទាល់តែរាជរដ្ឋាភិបាលបន្ថែមការបង្ក្រាប និងទប់ស្កាត់រំហូរចូលពីខាងក្រៅការផលិត និងការចែកចាយ នៅក្នុងប្រទេសឱ្យបានតឹងរ៉ឹងបន្ថែមទៀត ធ្វើយ៉ាងណាលុបបំបាត់នូវការចរាចរគ្រឿងញៀន»។
ប្រធានសមាគមសង្គ្រោះជនរងគ្រោះដោយគ្រឿងញៀនកម្ពុជា លោក មាស សុវណ្ណ ធ្លាប់បានថ្លែងកោតសរសើរ ចំពោះសមត្ថកិច្ចពាក់ព័ន្ធកន្លងមកដែលបានបង្ក្រាបជនល្មើស និងដកហូតសារធាតុញៀនធ្វើជាវត្ថុតាង និងដុតកម្ទេចចោល។ ទន្ទឹមនឹងនេះដែរ លោកក៏បានជំរុញសមត្ថកិច្ចអនុត្តឱ្យបានម៉ឺងម៉ាត់ទៅលើជនល្មើស និងស្រាវជ្រាវរកមេឧក្រិដ្ឋជនគ្រឿងញៀន ដែលជាមុខសញ្ញាធំដែលជាដើមចមនៃបញ្ហា។
លោកថា៖ «សារធាតុញៀនយើងចាប់បានហើយទុកជាភ័ស្តុតាង សំខាន់គឺមនុស្សមានន័យថា មនុស្សដែលចាប់បាននោះចំទិសដៅអត់ ម្នាក់នោះជាឧក្រិដ្ឋជនគ្រឿងញៀនមែនដែរឬអត់ ព្រោះចាប់ភាគច្រើន បានតែអ្នកបម្រើឱ្យគេជាដៃជើងគេ តែបើយើងចាប់បានអ្នកនៅពីក្រោយតែម្តង គឺជាការល្អកាន់តែខ្លាំង»។
កាលពីថ្ងៃទី ២០ ខែធ្នូ ឆ្នាំ ២០២១ រដ្ឋមន្ត្រីក្រសួងមហាផ្ទៃ លោក ស ខេង បានជំរុញជាថ្មីដល់គណៈបញ្ជាការឯកភាពរាជធានី ខេត្ត ត្រូវចូលរួមដោះស្រាយ និងទប់ស្កាត់ បញ្ហាគ្រឿងញៀន កុំឱ្យក្លាយជាប្រទេសនាំចេញគ្រឿងញៀនដែលនាំឱ្យប៉ះពាល់ដល់កិត្តិយសកម្ពុជា និងជះឥទ្ធិពលអាក្រក់ដល់សង្គមជាតិទាំងមូល។ លោក ស ខេង បានបង្ហើបឱ្យដឹងថា អ្នកជាប់ឃុំនៅទូទាំងកម្ពុជាទាំងអស់មានចំនួន ៣៨ ០០០ នាក់ក្នុងនោះ ៥១ ភាគរយ គឺជាអ្នកទោសគ្រឿងញៀន៕
