ភ្នំពេញៈ លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងលោក Park Heung-Kyeong ឯកអគ្គរដ្ឋទូតនៃសាធារណរដ្ឋកូរ៉េប្រចាំកម្ពុជានៅថ្ងៃទី ៣ ខែមករាឆ្នាំ ២០២២ នឹងធ្វើជាអធិបតីក្នុងពិធីបើកការដ្ឋានគម្រោងលើកកម្រិតគុណភាពផ្លូវជាតិលេខ ៤៨ មានប្រវែងសរុប ១៤៨ គីឡូម៉ែត្រ ស្ថិតក្នុងខេត្តកោះកុង ក្រោមហិរញ្ញប្បទានសម្បទានពីសាធារណរដ្ឋកូរ៉េ ដែលផ្តល់ឱ្យកម្ពុជាជាង ១០០ លានដុល្លារអាមេរិក។ នេះបើតាមសេចក្ដីប្រកាសព័ត៌មានរួម។
សេចក្ដីប្រកាសព័ត៌មានបានឱ្យដឹងថា ការដ្ឋានគម្រោងលើកកម្រិតគុណភាពផ្លូវជាតិលេខ ៤៨ ចាប់ពីចំណុចប្រសព្វផ្លូវជាតិលេខ ៤ ត្រង់គីឡូម៉ែត្រលេខ ១៤១+៧៥០ (អូរជ្រៅ) ដល់ក្រុងខេមរភូមិន្ទខេត្តកោះកុងក្រោមហិរញ្ញប្បទានសម្បទានពីសាធារណរដ្ឋកូរ៉េដែលផ្តល់ឱ្យកម្ពុជា តាមរយៈមូលនិធិកិច្ចសហប្រតិបត្តិការអភិវឌ្ឍន៍សេដ្ឋកិច្ចដែលជាជំនួយអភិវឌ្ឍន៍ផ្លូវការរបស់សាធារណរដ្ឋកូរ៉េ។ គម្រោងផ្លូវនេះ មានប្រវែងសរុប ១៤៨ គីឡូម៉ែត្រ ស្ថិតក្នុងខេត្តកោះកុង ចាប់ផ្តើមពីចំណុចប្រសព្វផ្លូវជាតិលេខ ៤ (ភូមិអូរជ្រៅ) ឃុំបឹងព្រៀវ ស្រុកស្រែអំបិល ដល់ក្រុងខេមរភូមិន្ទ ខេត្តកោះកុង។ ផ្លូវនេះ ជាកំណាត់ផ្លូវអាស៊ានលេខ ១២៣ ដែលលាតសន្ធឹងពីសាធារណរដ្ឋសង្គមនិយមវៀតណាម និងបញ្ចប់នៅព្រះរាជាណាចក្រថៃឡង់ដ៍។
បើតាមសេចក្ដីប្រកាសព័ត៌មាន តម្លៃគម្រោងសរុបដែលគ្រោងទុកសម្រាប់លើកកម្រិតផ្លូវជាតិលេខ ៤៨ នេះ គឺមានចំនួន ជាង ១០០,៦៨ លានដុល្លារអាមេរិក (១០០ ៦៨៦ ០០០ ដុល្លារអាមេរិក) ជាកម្ចីរបស់មូលនិធិកិច្ចសហប្រតិបត្តិការអភិវឌ្ឍន៍សេដ្ឋកិច្ច មានទឹកប្រាក់សរុបចំនួន ៨៧ ៤៣៤ ០០០ ដុល្លារអាមេរិកនៃគម្រោងសរុប។
ធនាគារនិហរ័ណអាហរ័ណកូរ៉េ ជាអ្នកទទួលខុសត្រូវលើប្រតិបត្តិការកម្ចីរបស់មូលនិធិកិច្ចសហប្រតិបត្តិការអភិវឌ្ឍន៍សេដ្ឋកិច្ច តំណាងឱ្យរដ្ឋាភិបាលនៃសាធារណរដ្ឋកូរ៉ ហើយធនាគារនិហរ័ណអាហរ័ណកូរ៉េនឹងផ្តល់ហិរញ្ញប្បទានសម្រាប់ការសិក្សា ការត្រួតពិនិត្យគម្រោង និងសម្រាប់ការសាងសង់ ខណៈរដ្ឋាភិបាលកម្ពុជានឹងធ្វើបដិភាគថវិកាសម្រាប់ការងារដោះស្រាយផលប៉ះពាល់ ការដោះមីន និងគ្រឿងយុទ្ធភណ្ឌមិនទាន់ផ្ទុះ ការគ្រប់គ្រងគម្រោង និងពន្ធអាករ។ ឆ្លងតាមរយៈការដេញថ្លៃក្រុមហ៊ុន Korea Consultants International (KCI) and Korea Engineering Consultant Corp Joint Venture (KECC) ត្រូវបានជ្រើសរើសជាទីប្រឹក្សាបច្ចេកទេសគម្រោង និង សម្ព័ន្ធក្រុមហ៊ុន (Ilsung-Hanil Joint Venture) ត្រូវបានជ្រើសរើសជាក្រុមហ៊ុនសាងសង់។ នេះបើតាមសេចក្ដីប្រកាសព័ត៌មាន។
គម្រោងលើកកម្រិតគុណភាពផ្លូវជាតិលេខ ៤៨ គ្រោងចំណាយពេលសាងសង់ចំនួន ៣២ ខែ គិតចាប់ផ្តើមពីថ្ងៃទី ១ ខែវិច្ឆិកា ឆ្នាំ ២០២១ រហូតដល់ថ្ងៃទី ៣០ ខែមិថុនា ឆ្នាំ ២០២៤។ បន្ទាប់ពីបញ្ចប់ការសាងសង់រួច ផ្លូវជាតិលេខ ៤៨ នេះនឹងមានមុខងារសំខាន់ៗដូចជា សរសៃឈាមសេដ្ឋកិច្ចដ៏មានសក្ដានុពលក្នុងការតភ្ជាប់ទំនាក់ទំនងគមនាគមន៍ និងការធ្វើសមាហរណកម្មផ្ទៃក្នុង និងក្នុងតំបន់ ជំរុញការដោះដូរ ពាណិជ្ជកម្មជាមួយប្រទេសជិតខាងជាប់ព្រំប្រទល់ លើកកម្ពស់សក្តានុពលវិស័យទេសចរណ៍តាមរបៀងឆ្នេរសមុទ្រ និងធ្វើឱ្យប្រសើរឡើងសុវត្ថិភាពចរាចរណ៍របស់ប្រជាពលរដ្ឋ។
«គម្រោងនេះនឹងជំរុញការអភិវឌ្ឍសេដ្ឋកិច្ចក្នុងតំបន់ កាត់បន្ថយពេលវេលា និងតម្លៃដឹកជញ្ជូន និងរួមចំណែកដល់ការតភ្ជាប់បណ្តាញដឹកជញ្ជូនជាតិ»។ នេះបើតាមសេចក្ដីប្រកាសព័ត៌មានបញ្ជាក់។
យោងតាមការិយាល័យធនាគារនិហរ័ណអាហរ័ណកូរ៉េប្រចាំទីក្រុងភ្នំពេញដែលទទួលបន្ទុកប្រតិបត្តិការមូលនិធិកិច្ចសហប្រតិបត្តិការអភិវឌ្ឍន៍សេដ្ឋកិច្ច (EDCF) គម្រោងលើកកម្រិតគុណភាពផ្លូវជាតិលេខ ៤៨ គឺជាគម្រោងមួយក្នុងចំណោមគម្រោងមូលនិធិកិច្ចសហប្រតិបត្តិការអភិវឌ្ឍន៍ សេដ្ឋកិច្ច (EDCF) ទាំង ១២ ដែលនៅក្រោមក្រសួងសាធារណការ និងដឹកជញ្ចូន។
គិតចាប់ពីឆ្នាំ ២០០១ រហូតមកដល់ដំណាច់ឆ្នាំ ២០២១ សាធារណរដ្ឋកូរ៉េបានផ្តល់ហិរញ្ញប្បទានសម្បទានដល់កម្ពុជាតាមរយៈមូលនិធិកិច្ចសហប្រតិបត្តិការអភិវឌ្ឍន៍សេដ្ឋកិច្ច (EDCF) ចំនួន ៣០ គម្រោងគិតជាទឹកប្រាក់សរុបចំនួន ១,២ ពាន់លានដុល្លារអាមេរិក សម្រាប់ការអភិវឌ្ឍវិស័យសំខាន់ៗ មានដូចជា វិស័យដឹកជញ្ចូន វិស័យធនធានទឹក វិស័យគ្រប់គ្រងទឹកកខ្វក់ វិស័យសុខាភិបាល វិស័យអប់រំ វិស័យអភិបាលកិច្ច និងការឆ្លើយតបបន្ទាន់ទៅនឹងជំងឺឆ្លងកាចសាហាវកូវីដ ១៩។
បើតាមសេចក្ដីប្រកាសព័ត៌មាន សាធារណរដ្ឋកូរ៉េនឹងបន្តកិច្ចសហប្រតិបត្តិការជាមួយនឹងរាជរដ្ឋាភិបាលកម្ពុជាបន្ថែមទៀត ហើយនឹងពង្រីកជំនួយទៅលើវិស័យដទៃទៀតមានដូចជា វិស័យថាមពល វិស័យកសិកម្ម និងវិស័យទូរគមនាគមន៍ និងគម្រោងជាច្រើនទៀត។
លោក សុខ សុទ្ធី មន្ដ្រីនាំពាក្យរដ្ឋបាលខេត្ដកោះកុងប្រាប់ភ្នំពេញប៉ុស្ដិ៍នៅថ្ងៃទី ២ មករា ឆ្នាំ ២០២២ ថា លោក កំពុងរវល់ខ្លាំង មិនទាន់អាចផ្ដល់ព័ត៌មានលម្អិតទាក់ទងនឹងដំណើរការបើកការដ្ឋានសាងសង់នេះទេ៕
វីដេអូ៖