.jpg)
ភ្ញៀវទេសចរ លេងកម្សាន្តតាមឆ្នេរសមុទ្រក្នុងខេត្តព្រះសីហនុ នៅថ្ងៃឆ្លងឆ្នាំសកលឆ្នាំ ២០២១ ឆ្លងចូលឆ្នាំ ២០២២។ រូបថត រដ្ឋបាលខេត្តព្រះសីហនុ
ភ្នំពេញៈ នាឱកាសឆ្លងឆ្នាំសកល ២០២១ ឆ្លងចូល ២០២២ កម្ពុជាមានភ្ញៀវទេសចរ ដើរលេងក្នុងស្រុកសរុបជាង ១ លាន ១ សែននាក់ កើនឡើង ៦៣ ភាគរយ បើប្រៀបធៀបឆ្នាំមុន ក្នុងនោះរាជធានីភ្នំពេញ និងខេត្តសៀមរាបមានអ្នកចូលទស្សនាច្រើនជាងគេ។ នេះបើយោងតាមតារាងស្ថិតិភ្ញៀវទេសចរផ្ទៃក្នុងរបស់មន្ទីរទេសចរណ៍រាជធានី ខេត្ត។
ក្នុងរបាយការណ៍បានបញ្ជាក់ថា នាឱកាសបុណ្យឆ្លងឆ្នាំសកលនៅទូទាំងប្រទេសកម្ពុជា ទទួលបានភ្ញៀវទេសចរសរុបមានចំនួន ១ ១៤៥ ១៤១ នាក់ ក្នុងនោះភ្ញៀវជាតិមានចំនួន ១ ១៣៩ ៣៨៧ នាក់ និងភ្ញៀវបរទេសផ្ទៃក្នុងមានចំនួន ៥ ៧៥៤ នាក់ ហើយរាជធានីភ្នំពេញ និងខេត្តសៀមរាប មានអ្នកចូលទស្សនាច្រើនជាងគេ។
របាយការណ៍ដដែលនេះបានឱ្យដឹងបន្តថា គោលដៅទេសចរណ៍សំខាន់ៗមួយចំនួន រួមមានរាជធានីភ្នំពេញអ្នកចូលភ្ញៀវទេសចរណ៍ចំនួន ៣៦៥ ៦៥៣ នាក់ ខេត្តសៀមរាប ១៨៩ ៤៣៦ នាក់ ខេត្តព្រះសីហនុ ៥៥ ៧១៧ នាក់ ខេត្តកំពត ៩៦ ១៣៨ នាក់ ខេត្តកំពង់ស្ពឺ ៨០ ១០០ នាក់ ខេត្តកំពង់ឆ្នាំង ៧១ ៨៦៩ នាក់ និងខេត្តកែបមានចំនួន ៦៦ ១៣៥ នាក់។
រដ្ឋមន្ត្រីក្រសួងទេសចរណ៍លោក ថោង ខុន បានឱ្យដឹងថា យោងតាមតួលេខខាងលើឃើញថាមានការកើនឡើងដល់ទៅ ៦៣,៦៥% ធៀបនឹងឱកាសឆ្លងឆ្នាំសកល ២០២០ ឆ្លងចូល ២០២១។ លោកបន្តថា ជាមួយការបិទបញ្ចប់ព្រឹត្តិការណ៍សហគមន៍ ២០ កុម្ភៈនាពេលកន្លងមក រដ្ឋបាលរាជធានី-ខេត្ត រដ្ឋបាលក្រុង-ស្រុកមួយចំនួនបានរៀបចំជាពិធីអបអរសាទរ និងទទួលអំណរឆ្នាំថ្មី ការប្រគំតន្ត្រី ការតុបតែងលម្អទីក្រុង និងដាក់ភ្លើងបំភ្លឺជាដើម ដើម្បីទាក់ទាញភ្ញៀវទេសចរ។
លោកបានគូសបញ្ជាក់ថា៖ «គោលដៅទេសចរណ៍នានានៅទូទាំងប្រទេសសុទ្ធតែទទួលបានចំនួនភ្ញៀវទេសចរយ៉ាងផុសផុល រីឯបន្ទប់សណ្ឋាគារផ្ទះសំណាក់ រីស៊ត និងបឹងហ្គាឡូ ត្រូវបានភ្ញៀវកក់ស្ទើរពេញ ១០០% ខណៈដែលមូលដ្ឋានអាជីវកម្មទេសចរណ៍ផ្សេងៗក៏បានបើកដំណើរការទទួលភ្ញៀវទេសចរឡើងវិញកាន់តែច្រើនឡើង»។
អ្នកទេសចរក្នុងតំបន់អង្គរវត្ត នៅថ្ងៃឆ្លងឆ្នាំសកល។ហុង មិនា
លោកបន្តថា ចំពោះរាជធានីភ្នំពេញ តាមការវាយតម្លៃបឋមរបស់អាជ្ញាធរមានប្រជាពលរដ្ឋជាង ៣៦ ម៉ឺននាក់បានដើរកម្សាន្តនៅគោលដៅសំខាន់ៗ ដូចជា នៅតំបន់កោះពេជ្រ មាត់ទន្លេមុខព្រះបរមរាជវាំង តំបន់កម្សាន្តជ្រោយចង្វា វិមានឈ្នះ-ឈ្នះ និងពហុកីឡដ្ឋានជាតិមរតកតេជោជាដើម។ ដោយឡែក ប្រជាពលរដ្ឋមួយចំនួនបានជ្រើសរើសយកការជួបជុំនៅតាមគេហដ្ឋាន ដោយមានការទទួលទានអាហារភេសជ្ជៈ ច្រៀងកម្សាន្តជាលក្ខណៈគ្រួសារ-មិត្តភក្តិ ខ្លះទៀតក៏បានចេញទៅដើរកម្សាន្ត និងជួបជុំឆ្លងឆ្នាំនៅតាមភោជនីយដ្ឋានផាប់ (Pub) និង Sky Bar នានា។
លោករដ្ឋមន្ត្រីបានបញ្ជាក់ដែរថា គ្រប់គោលដៅទេសចរណ៍ និងមូលដ្ឋានអាជីវកម្មទេសចរណ៍បានខិតខំអនុវត្តវិធានសុវត្ថិភាពទេសចរណ៍ និងនីតិវិធីប្រតិបត្តិស្តង់ដាអប្បបរមា (SOP) ក្រោមការចុះពិនិត្យ អប់រំ និងណែនាំពីរដ្ឋបាលរាជធានី-ខេត្ត មន្ទីរទេសចរណ៍ទាំង ២៥ រាជធានី-ខេត្ត។
ពាក់ព័ន្ធការគ្រប់គ្រងសន្តិសុខ សណ្ដាប់ធ្នាប់ និងចរាចរណ៍វិញ លោក ថោង ខុន ថ្លែងថា មានភាពល្អប្រសើរ មិនមានបញ្ហា ឬ ការរំខានណាមួយកើតឡើងគួរកត់សម្គាល់នៅយប់ឆ្លងឆ្នាំទេ ដោយគណៈបញ្ជាការឯកភាពរាជធានី-ខេត្តបានរៀបចំកម្លាំងប្រចាំការនៅតាមទីតាំងសំខាន់ៗក្នុងមូលដ្ឋានរបស់ខ្លួន។
ជាការកត់សម្គាល់ខេត្តដែលនៅជាប់ឆ្នេរសមុទ្រវិញដូចជាខេត្តព្រះសីហនុ កំពត កែប និងខេត្តកោះកុង មានភ្ញៀវទេសចរជាច្រើន បាននាំគ្នាបោះតង់ និងក្រាលកន្ទេល នៅតាមបណ្តោយឆ្នេរ រង់ចាំឆ្លងឆ្នាំសកល ២០២១-២០២២។ រីឯ នៅខេត្តសៀមរាបវិញ ភ្ញៀវទេសចរបានដើរលេងនៅតាមប្រាសាទជាច្រើននៅពេលថ្ងៃ ខណៈពេលយប់នាំគ្នាទៅលេងនៅ Pub Street ដែលជាកន្លែងដ៏ពេញនិយមប្រចាំខេត្ត។
ទីប្រឹក្សាសមាគមទីភ្នាក់ងារទេសចរណ៍កម្ពុជាលោក ហូ វណ្ឌី ថ្លែងថា កំណើនភ្ញៀវទេសចរក្នុងស្រុកនេះ បង្ហាញពីសញ្ញាវិជ្ជមានច្រើន គឺភាពជោគជ័យរបស់ប្រមុខរាជរដ្ឋាភិបាលផង និងថ្នាក់ដឹកនាំក្រសួងទេសចរណ៍ផង។ លោកបន្តថា សញ្ញាល្អនេះនឹងទាក់ទាញទេសចរណ៍នៅក្នុងសហគមន៍អាស៊ានឱ្យមកទស្សនានៅកម្ពុជា។
លោកថា៖ «សហគមន៍អាស៊ាននឹងសម្លឹងមើលកម្ពុជាក្រសែភ្នែកវិជ្ជមាន មានន័យថា គេនឹងត្រៀមលក្ខណៈដើម្បីមកលេងកម្ពុជា ហើយនៅថ្ងៃខាងមុខនេះយើងនឹងមានការរៀបចំទេសចរណ៍អាស៊ាន ហើយយើងនឹងផ្តល់នូវទិដ្ឋភាពទាំងឡាយនៃថ្ងៃបុណ្យឆ្លងឆ្នាំ»។ លោកបានកត់សម្គាល់ថា កំណើនភ្ញៀវទេសចរនេះ ក៏បានរួមចំណែកលើកកម្ពស់ដល់អ្នករកស៊ីទទួលទានក្នុងវិស័យទេសចរណ៍ទាំងអ្នកផ្គត់ផ្គង់នៅកន្លែង អ្នកផ្តល់សេវាកម្ម ការដឹកជញ្ជូន និងម្ហូបអាហារជាដើម៕
វីដេអូ៖
