បាត់ដំបងៈ នគរបាលស្រុកសំពៅលូន ខេត្តបាត់ដំបង នៅថ្ងៃទី ២ មករា កំពុងស្វែងរកចាប់បក្ខពួកជនសង្ស័យ ២ នាក់ទៀត បន្ទាប់ពីចាប់ខ្លួនបានម្នាក់ពាក់ព័ន្ធករណីកាប់យុវជនម្នាក់ដាច់កស្លាប់នៅក្នុងមណ្ឌលធ្វើចត្តាឡីស័ក ក្នុងភូមិអូរល្វា ឃុំជ្រៃសីមា ស្រុកសំពៅលូន ពីយប់ថ្ងៃទី ១ មករា មកនេះ។
លោក ទឹម វិឆ័យ អធិការនគរបាល ស្រុកសំពៅលូន ប្រាប់ភ្នំពេញប៉ុស្តិ៍នៅថ្ងៃទី ២ មករាថា ជនសង្ស័យដែលចាប់ខ្លួនបានឈ្មោះ ម៉ៅ ស៊ីណា ភេទប្រុស អាយុ ២៩ ឆ្នាំ ។
ចំណែកយុវជនរងគ្រោះឈ្មោះ ជេ ជាក់ អាយុ ២៣ ឆ្នាំ រស់នៅភូមិស្វាយខ្មៅ ឃុំពន្លៃ ស្រុកភ្នំស្រុក ខេត្តបន្ទាយមានជ័យ ។
លោកបន្តថា សមត្ថកិច្ចកំពុងស្វែងរកចាប់ខ្លួនបក្ខពួក ២ នាក់ទៀត ខណៈម្នាក់ត្រូវបានចាប់ខ្លួនភ្លាមៗបន្ទាប់ពីបង្កហេតុ។
ជនរងគ្រោះ និងជនល្មើសជាពលករមកពីថៃ ហើយត្រូវធ្វើចត្តាឡីស័កនៅមណ្ឌលចត្តាឡីស័កស្ថិតក្នុងភូមិល្វា ឃុំជ្រៃសីមា ស្រុកសំពៅលូន ។
លោកថា៖ «ជនបង្កមានគ្នា ៣ នាក់តែយើងចាប់បានម្នាក់ហើយ។ ឥឡូវយើងកំពុងស្រាវជ្រាវបន្តដើម្បីចាប់ខ្លួនបក្ខពួកជនសង្ស័យ ២ នាក់ទៀតយកមកផ្តន្ទាទោសតាមច្បាប់»។
លោកអធិការបានរំឭកថា កាលពីម៉ោងជាង ៩ យប់ថ្ងៃទី ១ មករា ឆ្នាំ ២០២២ មានជម្លោះមួយកើតឡើងរវាងពលករ និងពលករដែលបានទៅធ្វើចត្តាឡីស័កក្នុងភូមិភូមិអូរល្វា ឃុំ ជ្រៃសីមា ស្រុកសំពៅលូន។ ទាំងភាគី ជនសង្ស័យ និងយុវជនរងគ្រោះបានត្រឡប់មកពីថៃដូចគ្នាហើយត្រូវបានអាជ្ញាធរ ស្រុក សំពៅលូនយកទៅធ្វើចត្តាឡីស័កក្នុងមណ្ឌលកាលពីថ្ងៃទី ២៥ ខែធ្នូឆ្នាំ ២០២១ កន្លងមក។
ជម្លោះនោះកើតនៅកន្លែងស្នាក់ក្នុងមណ្ឌលចត្តាឡីស័ក។
លោកបន្តថា ពេលនោះជនរងគ្រោះដែលមានតែម្នាក់ឯងបានធ្វើកាយវិការដែលទំនងធ្វើត្រាប់តាមក្រុមជនសង្ស័យទើបកើតជាជម្លោះ ប៉ុន្តែត្រូវបានសម្រុះសម្រួលបញ្ចប់បញ្ហាម្តងហើយ។ លុះប្រហែល ១៥ នាទីក្រោយមក ក្រុមជនសង្ស័យបានទៅយកដាវសាមូរ៉ៃមកកាប់ ជនរងគ្រោះដាច់កស្លាប់នៅកន្លែងកើតហេតុ»។
ពាក់ព័ន្ធនឹងពលករមានដាវសាមូរ៉ៃប្រើនេះ លោក អធិការវិឆ័យ បញ្ជាក់ថា ពលករដែលមកមានគ្នាច្រើនដោយម្នាក់ៗមានវ៉ាលិស និងកាបូបស្ពាយច្រើនអាចធ្វើឱ្យមន្ត្រីត្រួតពិនិត្យមានការចន្លោះប្រហោង និងម្យ៉ាងមានការលំបាកក្នុងការឆែកឆេរសម្ភាររបស់ពលករទាំងនោះ ព្រោះពួកគេប្រឈមនឹងការឆ្លងជំងឺកូវីដ ១៩។
ហេតុដូច្នេះមន្ត្រីមិនហ៊ានកាន់សម្ភាររបស់ពលករទេ ដែលអាចធ្វើឱ្យក្រុមជនសង្ស័យលាក់កាំបិតដាវទាំងនេះបាន៕