.jpg)
នគរបាលដើរក្បែររថយន្តពាក់ស្លាកលេខ ខេមរភូមិន្ទ និង នគរបាល។ ហេង ជីវ័ន
ភ្នំពេញៈ រាជរដ្ឋាភិបាលបានសម្រេចលើកលែងពន្ធនាំចូល ដោយពន្ធអាករជាបន្ទុករបស់រដ្ឋ ចំពោះរថយន្តពាក់ស្លាកលេខនគរបាលចំនួន ៧៥៧ គ្រឿង ដោយអ្នកនាំពាក្យក្រសួងមហាផ្ទៃ បញ្ជាក់ថា រថយន្តដែលស្នើសុំគោលការណ៍លើកលែងពន្ធនេះ គឺសុទ្ធតែជាអំណោយរបស់សប្បុរសជន ដែលបានប្រគល់ឱ្យបណ្តាអង្គភាពចំណុះឱ្យក្រសួងមហាផ្ទៃសម្រាប់ប្រើប្រាស់ដើម្បីបម្រើផលប្រយោជន៍សាធារណៈ។
ការអនុញ្ញាតនេះ បានធ្វើឡើងបន្ទាប់ពីមានចំណាររបស់លោកនាយករដ្ឋមន្ត្រី ហ៊ុន សែន លើសំណើរបស់លោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ កាលពីថ្ងៃទី ២៨ ខែធ្នូ ដែលបានស្នើសុំគោលការណ៍ឱ្យលើកលែងពន្ធនាំចូលដោយពន្ធអាករជាបន្ទុករបស់រដ្ឋ ចំពោះរថយន្តពាក់ស្លាកលេខនគរបាលចំនួន ៧៥៧ គ្រឿង។
លិខិតចុះហត្ថលេខដោយលោក កែន សត្ថា ជំនួសរដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី ចុះថ្ងៃទី ៣១ ធ្នូ ឆ្នាំ ២០២១ បានបញ្ជាក់ថា៖ «រាជរដ្ឋាភិបាល យល់ព្រមជាគោលការណ៍ ឱ្យលើកលែងពន្ធនាំចូលដោយពន្ធអាករ ជាបន្ទុករបស់រដ្ឋ ចំពោះរថយន្តពាក់ស្លាកលេខនគរបាល ចំនួន ៧៥៧ គ្រឿងរបស់ក្រសួងមហាផ្ទៃ ដែលបាននិងកំពុងប្រើប្រាស់នៅតាមបណ្តាអង្គភាពចំណុះក្រសួងមហាផ្ទៃ»។
លោក ខៀវ សុភ័គ អ្នកនាំពាក្យក្រសួងមហាផ្ទៃ ប្រាប់ ភ្នំពេញ ប៉ុស្តិ៍ នៅថ្ងៃទី ២ មករាថា រថយន្តដែលបានស្នើទាំងនេះ ជាប្រភេទរថយន្តចាស់ ដែលកំពុងប្រើប្រាស់នៅតាមអង្គភាព ចំណុះក្រសួងកន្លងមកហើយ។ ការដែលរថយន្តនេះ មិនមានពន្ធនាំចូល ក៏ព្រោះតែរថយន្តទាំងនេះ គឺទទួលបានពីសប្បុរសជន នៅក្នុងប្រទេសដែលបានធ្វើអំណោយមកកាន់ក្រសួងស្ថាប័ន សម្រាប់ប្រើប្រាស់បម្រើឱ្យសាធារណជន។
លោកបញ្ជាក់ថា៖ «រថយន្តទាំងអស់ ដែលយើងបានស្នើនេះក៏បានធ្វើស្លាកលេខនគរបាលត្រឹមត្រូវអស់ហើយដែរដែលអង្គភាពនីមួយៗយកមកប្រើប្រាស់សម្រាប់ដឹកប៉ូលិស និងដឹកអ្វីផ្សេងៗ នៅតាមស្នងការដ្ឋាននគរបាលគ្រប់ខេត្តក្រុង និងនៅអគ្គនាយកដ្ឋានផ្សេងៗ។ យើងស្នើសុំលើកលែងការបង់ពន្ធនេះគឺមានន័យថា ក្រសួងមហាផ្ទៃមិនចាំបាច់ចំណាយថវិកាដែលបានអនុម័តយកទៅបង់ពន្ធ»។
បើតាមលោក ខៀវ សុភ័គ រថយន្តទាំងជាង ៧០០ គ្រឿងនេះ គឺជារថយន្តដែលក្រសួងមហាផ្ទៃស្នើសុំលើកលែងពន្ធនាំចូលជាលើកចុងក្រោយ ខណៈក្រសួងមិនទាន់មានគោលការណ៍ថ្មី ក្នុងការការស្នើសុំការលើកលែងពន្ធនាំចូលលើរថយន្តរបស់រដ្ឋ ក្នុងនាមក្រសួងមហាផ្ទៃបន្តទៀតនោះទេ។
លោក ប៉ិច ពិសី នាយកប្រតិបត្តិអង្គការតម្លាភាពកម្ពុជា ថ្លែងថា ការលើកលែងការយកពន្ធរថយន្តរបស់រដ្ឋ គឺជារឿងធម្មតាដើម្បីកាត់បន្ថយការចំណាយរបស់រដ្ឋនៅក្នុងការបង់ពន្ធ ហើយតាមគោលការណ៍ ស្ថាប័នដែលបម្រើឱ្យវិស័យសាធារណៈ គឺមានសិទ្ធិស្នើសុំគោលការណ៍ទាំងនេះ ដើម្បីទទួលបានសិទ្ធិក្នុងការមិនជាប់កាតព្វកិច្ចបង់ពន្ធចូលរដ្ឋ។
ប៉ុន្តែលោកសង្កត់ធ្ងន់ថា ត្រូវយកចិត្តទុកដាក់ និងទាមទារឱ្យមានការត្រួតពិនិត្យឱ្យបានត្រឹមត្រូវ ព្រោះករណីខ្លះ អាចមានការលួចបន្លំ ដោយស្នើសុំគោលការណ៍ដើម្បីលើកលែងការបង់ពន្ធ សម្រាប់បម្រើឱ្យសាធារណជន ប៉ុន្តែជាក់ស្តែង រថយន្តទាំងនោះគឺជារបស់ឯកជនទៅវិញ។
លោកបញ្ជាក់ថា រថយន្តដែលស្នើសុំលើកលែងពន្ធ គឺត្រូវតែជារថយន្តរបស់រដ្ឋ ហើយក្នុងន័យថា នៅពេលរថយន្តដែលបានស្នើសុំលើកលែងពន្ធនោះឈប់ប្រើប្រាស់បម្រើផលប្រយោជន៍សាធារណៈ គឺត្រូវបង់ពន្ធជូនរដ្ឋវិញជាធម្មតា។
ការថ្លែងយ៉ាងដូច្នេះដោយសារតែលោក មើលឃើញថា កន្លងមក គឺធ្លាប់មានករណីជាច្រើន ដែលមានការស្នើសុំគោលការណ៍អនុគ្រោះជារថយន្តរបស់រដ្ឋ ប៉ុន្តែធាតុពិត រថយន្តទាំងនោះ ជារបស់ឯកជនខណៈមានករណីខ្លះទៀត ក៏មានការប្រើប្រាស់រថយន្តរបស់រដ្ឋ ទៅបម្រើឱ្យប្រយោជន៍បុគ្គលផងដែរ៕
វីដេអូ៖
