.jpg)
អគារគណៈកម្មាធិការជាតិរៀបចំការបោះឆ្នោត នៅក្នុងខណ្ឌចំការមន។ ហ៊ាន រង្សី
ភ្នំពេញៈ គណបក្សប្រជាធិបតេយ្យមូលដ្ឋាន និងគណបក្សកម្ពុជានិយមស្នើឱ្យគណៈកម្មាធិការជាតិរៀបចំការបោះឆ្នោត (គ.ជ.ប) រក្សាទុកខ្លឹមសារមួយចំនួន នៃសេចក្តីព្រាងបទបញ្ជា និងនីតិវិធី សម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី ៥ ឆ្នាំ ២០២២ ឱ្យនៅដដែល។ ប៉ុន្តែអ្នកនាំពាក្យ គ.ជ.ប ថា សេចក្តីព្រាងបទបញ្ជា និងនីតិវិធីថ្មីនេះត្រូវបានភាគីច្រើនលើសលប់បានផ្តល់យោបល់ និងឯកភាពរួចហើយ ។
យោងតាមសេចក្តីថ្លែងការណ៍រួម កាលពីថ្ងៃទី ៣០ ខែធ្នូ ឆ្នាំ ២០២១ គណបក្សប្រជាធិបតេយ្យមូលដ្ឋាន និងគណបក្ស កម្ពុជានិយមបានទាមទារដោយទទូចឱ្យ គ.ជ.ប ពិចារណា រក្សាទុក ប្រការ ៥.៣.១.៥ នៃបទបញ្ជា និងនីតិវិធីសម្រាប់បោះឆ្នោតជ្រើសរើសក្រុមប្រឹក្សាឃុំសង្កាត់ ដែលចែងថា ចាត់ចែងចែកជូនកំណត់ហេតុនៃការរាប់សន្លឹកឆ្នោតជូនភ្នាក់ងារគណបក្សនយោបាយដែលមានវត្តមាន និងសុំរក្សាប្រយោគមួយចំនួនឱ្យនៅដដែល។
សេចក្តីថ្លែងការណ៍នេះសង្ឃឹមថា គ.ជ.ប នឹងទទួលយកការទាមទារនេះ ដើម្បីបង្ហាញអំពីការព្យាយាមធានាឱ្យមានការបោះឆ្នោតប្រព្រឹត្តទៅដោយសេរី ត្រឹមត្រូវ និងយុត្តិធម៌ ស្របតាមគោលការណ៍ប្រជាធិបតេយ្យសេរីពហុបក្ស ទទួលបានការទុកចិត្តពីសំណាក់គណបក្សនយោបាយ និងអ្នកបោះឆ្នោត និងបញ្ចៀសការជាប់គាំងនយោបាយ។
លោក ឡឹក សុធារ អ្នកនាំពាក្យគណបក្សប្រជាធិបតេយ្យមូលដ្ឋាន ប្រាប់ភ្នំពេញប៉ុស្តិ៍នៅថ្ងៃទី ២ ខែមករាថា គណបក្សប្រជាធិបតេយ្យមូលដ្ឋាន និង គណបក្សកម្ពុជានិយម យល់ឃើញ នៅក្នុងសេចក្តីព្រាងបទបញ្ជា និងនីតិវិធីនៃការរាប់សន្លឹកឆ្នោតរបស់ គ.ជ.ប កាលពីមុន មានចាត់ចែងចម្លងលទ្ធផលនៃការបោះឆ្នោតទៅឱ្យភ្នាក់ងារគណបក្សនយោបាយដែលជាអ្នកសង្កេតការណ៍ និងបិទផ្សាយលទ្ធផលបឋមនៃការបោះឆ្នោត នៅមុខការិយាល័យបោះឆ្នោត និងរាប់សន្លឹកឆ្នោតរហូតដល់ថ្ងៃប្រកាសលទ្ធផលបោះឆ្នោតជាផ្លូវការ។ ប៉ុន្តែសេចក្តីព្រាងបទបញ្ជា និងនីតិវិធីថ្មីដែល គ.ជ.ប កំពុងធ្វើនៅពេលនេះ គឺ គ.ជ.ប លុបចំណុចទាំង ២ នេះ ចេញដែលការលុបនេះបានធ្វើឱ្យគណបក្សនយោបាយមានក្តីកង្វល់។
លោកថ្លែងថា៖ «គណបក្សនយោបាយទាមទារ មិនឱ្យ គ.ជ.ប លុបប្រការទាំងប៉ុន្មានហ្នឹងចេញទេ ត្រូវតែរក្សាដដែល ប៉ុន្តែ បើ គ.ជ.ប មិនព្រមរក្សាទុកទេគណបក្សនឹងបន្តទាមទារ និងអាចធ្វើនៅក្នុងរូបភាព ធំជាងនេះទៀតក្នុងនោះអាចនឹងកៀរគរគណបក្សនយោបាយផ្សេងទៀត ដែលមានក្តីបារម្ភដូចគណបក្សរបស់យើងដែរ និងអាចមានអង្គការសង្គមស៊ីវិលមួយចំនួន និងស្ថានទូតមួយចំនួនទៀត ដែលធ្លាប់ជួយលើកិច្ចការបោះឆ្នោតនេះ»។
លោក សោម សូរីដា អ្នកនាំពាក្យ គ.ជ.ប ប្រាប់ភ្នំពេញប៉ុស្តិ៍នៅថ្ងៃទី ២ ខែមករាថា គណបក្សទាំង ២ នេះ គ្រាន់តែបារម្ភពីការមិនទទួលបានលទ្ធផលនៃការបោះឆ្នោតនៅតាមការិយាល័យបោះឆ្នោត និងរាប់សន្លឹកឆ្នោតតែប៉ុណ្ណោះ ប៉ុន្តែ បើផ្អែកទៅលើលក្ខខណ្ឌបច្ចេកទេសភ្នាក់ងារគណបក្សនយោបាយ ដែលចូលរួមសង្កេតការណ៍ការបោះឆ្នោត និងរាប់សន្លឹកឆ្នោត ពួកគាត់នឹងទទួលបានលទ្ធផលនៃការបោះឆ្នោតតាមកំណត់ហេតុនៃការរាប់សន្លឹកឆ្នោតតាមទម្រង់បែបបទ ១១០២។
ទម្រង់ ១១០២ ផ្អែកតាមច្បាប់បោះឆ្នោតជ្រើសតាំងតំណាងរាស្ត្រ តម្រូវឱ្យការិយាល័យបោះឆ្នោត បំពេញចំនួន ៣ ច្បាប់ ទី ១ ត្រូវដាក់បញ្ចូលទៅក្នុងកញ្ចប់ «ក» រួចបញ្ជូនមក គជប។ ច្បាប់ទី ២ បិទនៅការិយាល័យបោះឆ្នោត និងរាប់សន្លឹកឆ្នោត និងច្បាប់ទី ៣ នឹងត្រូវបញ្ជូនទៅគណៈកម្មការ ឃុំ សង្កាត់រៀបចំការបោះឆ្នោត។
លោកថ្លែងថា៖ «ដូច្នេះលទ្ធផលក៏ត្រូវបិទផ្សាយនៅការិយាល័យបោះឆ្នោត និងរាប់សន្លឹកឆ្នោត។ ភ្នាក់ងារគណបក្សនយោបាយអាចថតបញ្ចូលទៅក្នុងទូរស័ព្ទស្មាតហ្វូនរបស់ខ្លួន។ មួយទៀត ភ្នាក់ងារគណបក្សនយោបាយក៏អាចទទួលបាននៅឃុំសង្កាត់ រៀបចំការបោះឆ្នោត បានដែរ»។
បើតាម លោក សោម សូរីដា ចំពោះការកៀរគរឱ្យប្រទេសអ្នកផ្តល់ជំនួយដាក់គំនាបដល់ គ.ជ.ប រក្សាទុកខ្លឹមសារដើម ដូចឆ្នាំ ២០១៧ វាមិនពាក់ព័ន្ធនឹងបច្ចេកទេសទេ។
បទបញ្ជា និងនីតិវិធីសម្រាប់បោះឆ្នោតជ្រើសរើសក្រុមប្រឹក្សា-ឃុំសង្កាត់នេះ មុននឹងសម្រេចចុងក្រោយ គ.ជ.ប បានដាក់សេចក្តីព្រាងនេះ ទៅឱ្យគ្រប់ភាគីពាក់ព័ន្ធពិនិត្យ និងផ្តល់យោបល់ ហើយការស្នើសុំឱ្យរក្សាទុកដូចខ្លឹមសារដើមមានតែគណបក្ស ២ នេះទេ ក្រៅពីនោះ ភាគច្រើនលើសលប់បានផ្តល់យោបល់ និងឯកភាពទាំងអស់៕
វីដេអូ៖
