.jpg)
បុរសញៀនស្រាដែលកាប់ប្រពន្ធ និងឪពុកមាស្លាប់ និងអ្នកភូមិ ៣ នាក់ទៀតរងរបួស។ រូបថត នគរបាល
កំពង់ធំៈ បុរសញៀនស្រាម្នាក់ត្រូវបានសមត្ថកិច្ចចាប់ខ្លួនភ្លាមៗ បន្ទាប់ពីប្រើពូថៅកាប់ប្រពន្ធនិងឪពុកមាបង្កើតស្លាប់ ហើយកាប់អ្នកភូមិ ៣ នាក់ទៀតឱ្យរងរបួស កាលពីវេលាម៉ោងជាង ៧ យប់ថ្ងៃទី ១ មករា ឆ្នាំ ២០២២ នៅភូមិពន្លៃ ឃុំចើងដើង ស្រុកបារាយណ៍។
លោក ទិត្យ សំណាង ស្នងការរងទទួលបន្ទុកផែនការងារនគរបាលព្រហ្មទណ្ឌ នៃស្នងការដ្ឋាននគរបាល ខេត្តកំពង់ធំប្រាប់នៅថ្ងៃទី ២ មករា ថា ជនសង្ស័យឈ្មោះ ប៉ុស ឡា អាយុ ៣៣ ឆ្នាំ និងប្រពន្ធឈ្មោះ យន អឿន អាយុ ៣០ ឆ្នាំ មានកូនស្រី ២ នាក់ ដែលកូនច្បងអាយុ ១២ ឆ្នាំ។ ក្រុមគ្រួសារនេះ រស់នៅភូមិ ពន្លៃ ឃុំ ចើងដើង ស្រុកបារាយណ៍។
លោកឱ្យដឹងថា៖ «រឿងនេះគាត់កាប់មនុស្សស្លាប់ដល់ទៅ ២ នាក់ និងបង្ករបួស ៣ នាក់ទៀត។ ជនសង្ស័យញៀនស្រាខ្លាំង។ នៅថ្ងៃនេះ (ទី ២ មករា) យើងកំពុងបន្តនីតិវិធី សាកសួរគាត់ ដើម្បីរៀបចំកសាងសំណុំរឿងបញ្ជូនទៅតុលាការ»។
លោកបានឱ្យដឹងតាមសាក្សីនៅកន្លែងកើតហេតុថា ជនសង្ស័យជាមនុស្សញៀនស្រា និងតែងតែបង្កទំនាស់នៅក្នុងគ្រួសារ។ មុនកើតហេតុ ១ ថ្ងៃ ស្ត្រីរងគ្រោះ បានដើរប្រាប់អ្នករស់នៅក្បែរផ្ទះរបស់ខ្លួនថា ប្តីរបស់គាត់បានគំរាមសម្លាប់គាត់ចោល ហើយគាត់ក៏មានការព្រួយបារម្ភពីបញ្ហានេះដែរ។ លុះចូលដល់វេលាម៉ោងជាង ៧ យប់ថ្ងៃទី ១ ខែមករា ជនសង្ស័យ បានផឹកស្រាស្រវឹង ហើយបានកាប់ប្រពន្ធចំកដួលស្លាប់នៅនឹងផ្ទះរបស់ខ្លួន។
ក្រោយពីសម្លាប់ប្រពន្ធរួចហើយ ជនសង្ស័យបានចុះពីលើផ្ទះ ហើយរត់ទៅកាប់ឪពុកមា អាយុ ៥៦ ឆ្នាំដែលរំលងពីផ្ទះរបស់ជនសង្ស័យតែ ២ ទៅ ៣ ផ្ទះ បណ្តាលឱ្យស្លាប់ម្នាក់ទៀត ហើយបន្តទៅកាប់អ្នករស់នៅក្បែរផ្ទះដែលរត់ទៅចោមរោមមើលបណ្តាលឱ្យរងរបួស ៣ នាក់ទៀត (ស្រី ២ នាក់)។
បើតាមលោក សំណាង ថា៖ «រឿងនេះសមត្ថកិច្ចយើងបានសន្និដ្ឋានថា ជនសង្ស័យជាមនុស្សញៀនស្រាដែលគាត់អាចបាត់បង់សតិស្មារតី។ ប៉ុន្តែខ្ញុំពិនិត្យមើលទឹកនោមគាត់ ឃើញមានសារធាតុញៀននៅក្នុងខ្លួនគាត់ដែរ»។
លោក សួង ថេន អធិការនគរបាលស្រុកបារាយណ៍ឱ្យដឹងនៅថ្ងៃទី ២ មករា ថា ក្រោយបង្កហេតុជនសង្ស័យបានរត់ឡើងលើផ្ទះរបស់ខ្លួនវិញហើយចាក់គន្លឹះសោពីខាងក្នុង ដើម្បីកុំឱ្យសមត្ថកិច្ចចាប់ខ្លួន។ ប៉ុន្តែក្រោយមកក៏ត្រូវបានសមត្ថកិច្ចចាប់ខ្លួន។ ចំពោះស្ត្រី និងបុរសពេញវ័យ ២ នាក់ និង យាយចាស់ម្នាក់ អាយុ ៧៦ ឆ្នាំដែលរងរបួស ដោយសារជនសង្ស័យកាប់នោះ ក៏បានធូរស្រាលពីរបួសច្រើនហើយដែរ នៅថ្ងៃទី ២ មករា។
លោកថា៖ «នៅថ្ងៃនេះ (ថ្ងៃទី ២ មករា) ខ្ញុំរួមនឹងលោកអភិបាលស្រុកបានចុះទៅចូលរួមរំលែកទុក្ខដល់អ្នកស្លាប់ និងបានសួរសុខទុក្ខអ្នករបួស ៣ នាក់នោះដែរ។ បើតាមខ្ញុំស្តាប់ទៅ អ្នកភូមិថា ជនសង្ស័យញៀនស្រាខ្លាំងដល់ថ្នាក់ថា បើគាត់អត់បានផឹកស្រា គឺញ័រដៃធ្វើអីអត់កើតទេ»។
លោកបាននិយាយតាមសម្តីសាច់ញាតិរបស់ជនសង្ស័យថា កន្លងមកជនសង្ស័យ ធ្លាប់ប្រើប្រាស់គ្រឿងញៀនដែរតែក្រោយៗមក មិនសូវឃើញជក់គ្រឿងញៀនទេ។ ចំពោះរឿងហេតុនៃការសម្លាប់មនុស្សនេះសមត្ថកិច្ច សន្និដ្ឋានជាបឋមថា ជនសង្ស័យអាចផឹកស្រាច្រើនទើបក្លាយជាមនុស្សសរសៃប្រសាទ៕
