.jpg)
ម៉ាស៊ីនចល័ត សម្រាប់ឆៀកបច្ចេកទេសរថយន្ត។ រូបថត ក្រសួងសាធារណការ
ភ្នំពេញៈ ក្រសួងសាធារណការ និងដឹកជញ្ជូន ប្រកាសកាលវិភាគថ្មីក្នុងការផ្តល់សេវាត្រួតពិនិត្យលក្ខណៈបច្ចេកទេសយានជំនិះ (ឆៀក) ចល័ត តាមខេត្តសម្រាប់ឆ្នាំ ២០២២ ដោយអំពាវនាវឱ្យប្រជាពលរដ្ឋ យកយានយន្តរបស់ខ្លួនមកឆៀកនៅតាមទីតាំងដែលបានប្រកាសឱ្យបានទាន់ពេលវេលា ខណៈឆ្នាំ ២០២១ មានយានយន្តប្រមាណ ៤០ ម៉ឺនគ្រឿង បានទទួលការត្រួតពិនិត្យ។
ក្រសួងសាធារណការ និងដឹកជញ្ជូនបានប្រកាសនៅថ្ងៃទី ២ មករា ឆ្នាំ ២០២២ ថា ការចុះត្រួតពិនិត្យ លក្ខណៈបច្ចេកទេសយានជំនិះ (ឆៀក) ចល័តតាមបណ្តាខេត្ត គឺជាការបង្ខិតសេវា មកកាន់តែជិតប្រជាពលរដ្ឋ ដើម្បីចំណេញពេលវេលា ថវិកា និងចូលរួមចំណែកកាត់បន្ថយគ្រោះថ្នាក់ចរាចរណ៍។
ក្រសួងបានបន្តថា៖ «បងប្អូនម្ចាស់រថយន្តទាំងអស់អាចយកយានយន្តរបស់ខ្លួនមកត្រួតពិនិត្យលក្ខណៈបច្ចេកទេសយានជំនិះ (ឆៀក) នៅទីតាំងមន្ទីសាធារណការ និងដឹកជញ្ជូន រាជធានីខេត្ត ដែលជិតបំផុត តាមកាលវិភាគកំណត់ និងទាន់ពេលវេលា។ នេះជាការបង្ខិតសេវា មកជិតប្រជាពលរដ្ឋ ដើម្បីចំណេញពេលវេលា ថវិកា និងចូលរួមចំណែកកាត់បន្ថយគ្រោះថ្នាក់ចរាចរណ៍»។
តារាងកាលបរិច្ឆេទសម្រាប់ត្រួតពិនិត្យលក្ខណៈបច្ចេកទេសយានជំនិះ (ឆៀក) ចល័តសម្រាប់ឆ្នាំថ្មីរបស់ក្រសួងបានធ្វើការកំណត់ពេលវេលា និងទីតាំងទៅតាមខេត្តចំនួនចាប់ពីខែមករា ដល់ខែធ្នូ ដែលម្ចាស់យានយន្ត អាចយកយានយន្តរបស់ខ្លួន ទៅធ្វើការត្រួតពិនិត្យលក្ខណៈបច្ចេកទេសយានជំនិះ (ឆៀក) នៅតាមទីតាំងទាំងនោះ រៀងរាល់ម៉ោងធ្វើការ។
លោក ឈួន វ៉ន់ អគ្គនាយកនៃអគ្គនាយកដ្ឋានដឹកជញ្ជូនផ្លូវគោកក្រសួងសាធារណការ និងដឹកជញ្ជូន បានប្រាប់ភ្នំពេញប៉ុស្តិ៍នៅថ្ងៃទី ២ មករា ឆ្នាំ ២០២២ ថា ឆៀកចល័ត គឺបានដើរតួនាទីសំខាន់ណាស់ ក្នុងការផ្តល់សេវារបស់ក្រសួងនេះ ជូនដល់ប្រជាពលរដ្ឋ ខណៈខេត្តមួយចំនួន នៅមិនទាន់មានមជ្ឈមណ្ឌលត្រួតពិនិត្យលក្ខណៈបច្ចេកទេសនេះនៅតាមខេត្តនោះទេ។
លោកបញ្ជាក់ថា៖ «ឆៀកចល័តដើរតួនាទីសំខាន់ក្នុងយន្តការរបស់ឯកឧត្តមទេសរដ្ឋមន្ត្រី គឺយើងបង្ខិតសេវាឆៀកនេះ ឱ្យកាន់តែកៀកបងប្អូនប្រជាពលរដ្ឋ។ អ៊ីចឹងយើងបានឱ្យឆៀកចល័តឱ្យទៅតាមទីតាំងខេត្ត ដែលមិនមានហ្នឹង ហើយយើងមានកម្មវិធីច្បាស់លាស់ ថ្ងៃណាទៅខេត្តនេះ ថ្ងៃណាទៅខេត្តនោះ គឺយើងមានកម្មវិធីមុន ដើម្បីជម្រាបជូនបងប្អូនយើង ឱ្យលោកដឹងមុន លោកត្រៀមខ្លួន»។
យោងរបាយការណ៍ប្រចាំឆ្នាំ ២០២១ របស់ក្រសួងសាធារណការ និងដឹកជញ្ចូន ដែលភ្នំពេញប៉ុស្តិ៍ទទួលបាននៅថ្ងៃទី ២ មករា បានឱ្យដឹងថា ចាប់តាំងពីឆ្នាំ ១៩៩០ ដល់ឆ្នាំ ២០២១ មានយានយន្តចុះបញ្ជីសរុបចំនួន ៥ ៤០៦ ៧៤១ គ្រឿង ហើយក្នុងរយៈពេល ១ ឆ្នាំ សម្រាប់ឆ្នាំ ២០២១ គឺមានចំនួនសរុប ៤៣២ ២៥៥ គ្រឿង ដែលបានចុះបញ្ជីថ្មី។ របាយការណ៍ដដែលបានឱ្យដឹងទៀតថា ក្នុងរយៈពេល ៣១ ឆ្នាំកន្លងមកនេះ ប្រជាពលរដ្ឋខ្មែរសរុបចំនួន ១ ៨៦៩ ២៧៩ នាក់ បានទទួលបណ្ណបើកបរយានយន្ត ខណៈក្នុងឆ្នាំ ២០២១ ក្រសួងបានចេញបណ្ណបើកបរថ្មី ដល់អ្នកដែលទើបប្រឡងយកបណ្ណនេះទៅប្រើប្រាស់ចំនួន ៨៤ ១១៧ នាក់។
លោក គឹម បញ្ញា នាយកមូលនិធិបង្ការរបួសអាស៊ីបាននិយាយថា ករណី ឆៀកចល័តនេះ មិនមែនជារឿងអ្វីនោះទេ ព្រោះក្រសួងខំធ្វើយ៉ាងណា ដើម្បីបម្រើសេវាដល់ពលរដ្ឋ ជាពិសេសទៅកាន់តំបន់ឆ្ងាយៗ ដែលមិនទាន់មាន សេវានេះ។
លោកបញ្ជាក់ថា៖ «ខ្ញុំគាំទ្រ និងលើកទឹកចិត្តឱ្យស្ថាប័នរដ្ឋាភិបាល ជំរុញការធ្វើឆៀកចល័តនេះឱ្យបានកាន់តែញឹកញាប់ឱ្យបានកាន់តែទូលំទូលាយទូទាំង ប្រទេស»៕
វីដេអូ៖
