ភ្នំពេញៈ ក្នុងរយៈពេល ១ ឆ្នាំ គណៈកម្មាធិការប្រយុទ្ធប្រឆាំងផលិតផលក្លែងក្លាយនៃក្រសួងមហាផ្ទៃ (គ.ប.ផ.ក.) បានបង្ក្រាបផលិតផលក្លែងក្លាយ អន់គុណភាព គ្មានស្តង់ដា និងខុសច្បាប់បានជាង ៧២ តោន ខណៈអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) បានកែសម្រួលភារកិច្ចមន្ត្រីរាជការនៅតាមរាជធានី ខេត្តជាង ៥០ នាក់ ដើម្បីបង្កើនប្រសិទ្ធភាពការងារ ។
នៅថ្ងៃទី ៣ មករា ឆ្នាំនេះ គ.ប.ផ.ក. បានបង្ហាញនូវលទ្ធផលប្រតិបត្តិការបង្ក្រាបផលិតផលក្លែងក្លាយ បង្ការ និងប្រយុទ្ធប្រឆាំងជំងឺកូវីដ ១៩ ខុសច្បាប់ពាក់ព័ន្ធផលិតផលវេជ្ជសាស្ត្រ ក្លែងក្លាយ អន់គុណភាព គ្មានស្តង់ដា និងខុសច្បាប់ក្នុងដំណាក់កាលសំខាន់ក្នុងឆ្នាំ ២០២១។
ក្នុងការប្រកាសនោះ គ.ប.ផ.ក. បានឱ្យដឹងថា ក្នុងឆ្នាំ ២០២១ ស្ថាប័ននេះធ្វើប្រតិបត្តិការបង្ក្រាបផលិតផល ឧបករណ៍ និងសម្ភារបរិក្ខារពេទ្យសម្រាប់ប្រឆាំងនឹងជំងឺកូវីដ ១៩ ដែលក្លែងក្លាយ អន់គុណភាព គ្មានស្តង់ដា និងខុសច្បាប់បានចំនួន ២៧ ករណីស្មើនឹងចំនួនជាង ៧២ តោន ដោយក្នុងនោះបានរឹបអូសបំផ្លាញចោលលើកទី ១ ចំនួនជាង ៧០ តោន។
គណៈកម្មាធិការប្រយុទ្ធប្រឆាំងផលិតផលក្លែងក្លាយនេះបានបញ្ជាក់ថា៖ «ផលិតផលទាំងនោះ រួមមាន បរិក្ខារពេទ្យក្លែងក្លាយ (អាល់កុល និងម៉ាស់) ផលិតផលវេជ្ជសាស្ត្រ ស្រោមដៃក្លែងក្លាយ ឧបករណ៍តេស្ដកូវីដ ឱសថកូវីដ និងគ្រឿងបរិក្ខារពេទ្យជាច្រើនទៀត»។
ជាមួយនឹងប្រតិបត្តិការនេះ គ.ប.ផ.ក. លើកឡើងបន្តថា ក្នុងដំណាក់កាលសំខាន់នេះ គណៈកម្មាធិការប្រយុទ្ធប្រឆាំងផលិតផលក្លែងក្លាយបានអនុវត្តយ៉ាងខ្ជាប់ខ្ជួន និងម៉ឺងម៉ាត់ ព្រមទាំងសម្រេចបាននូវលទ្ធផលជាច្រើនលើការងារប្រតិបត្តិការបង្ក្រាបផលិតផលក្លែងក្លាយ បង្ការ និងប្រយុទ្ធប្រឆាំងជំងឺកូវីដ ១៩ខុសច្បាប់ពាក់ព័ន្ធផលិតផលវេជ្ជសាស្ត្រ ក្លែងក្លាយ អន់គុណភាព គ្មានស្តង់ដា និងខុសច្បាប់។
គ.ប.ផ.ក. បានបញ្ជាក់ថា «ទាំងអស់នេះ គឺជាកិច្ចខិតខំប្រឹងប្រែងព្យាយាមដ៏សំខាន់របស់ គ.ប.ផ.ក. រួមចំណែកក្នុងយុទ្ធនាការរបស់ជាតិ សម្រាប់ប្រយុទ្ធប្រឆាំងជំងឺកូវីដ ១៩។ ជាមួយគ្នានេះគណៈកម្មាធិការប្រយុទ្ធប្រឆាំងផលិតផលក្លែងក្លាយ ក៏សូមអំពាវនាវដល់ពាណិជ្ជករ អាជីវករ និងបងប្អូនទាំងអស់ សូមមេត្តាលក់ និងចែកចាយផលិតផលណាដែលមានគុណភាព និងមានចុះបញ្ជិកាត្រឹមត្រូវពីក្រសួងស្ថាប័នពាក់ព័ន្ធ»។
ទន្ទឹមនឹងនេះដែរ អគ្គនាយកដ្ឋាន ក.ប.ប. ក៏បានកែសម្រួលភារកិច្ចមន្ត្រីរាជការនៅតាមបណ្ដាសាខា ក.ប.ប. រាជធានីខេត្ត ចំនួន ៥៤ នាក់ ដើម្បីប្រសិទ្ធភាពការងារក្នុងកិច្ចការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ។
ការកែសម្រួលភារកិច្ចមន្ត្រីរាជការទាំងនេះបានធ្វើឡើងពីថ្ងៃទី ៣ មករា ដោយយោងលើប្រកាសចុះថ្ងៃទី ១០ ខែធ្នូ ឆ្នាំមុន ស្ដីពីការតែងតាំង ប្រគល់ភារកិច្ច និងសម្រួលភារកិច្ចមន្ត្រីរាជការស៊ីវិលរបស់អគ្គនាយកដ្ឋាន ក.ប.ប. នៅតាមរាជធានី-ខេត្ត។
លោក ផាន អូន ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋាន ក.ប.ប. បានប្រាប់ភ្នំពេញប៉ុស្តិ៍នៅថ្ងៃទី ៣ មករាថា ការផ្លាស់ប្តូរ ការកែសម្រួល ក៏ដូចជាតែងតាំងមន្ត្រីតាមបណ្តាសាខារាជធានីខេត្តនេះ គឺឈរលើមន្ត្រីខ្លះបានអនុវត្តការងារយូរឆ្នាំមកហើយ ដោយមន្ត្រីទាំងនោះចង់ផ្លាស់ប្តូរពិសោធន៍ពីខេត្តមួយទៅខេត្តមួយ។ លោកបានបន្តថា ចំណែកមន្ត្រីខ្លះទៀត ដោយសារតែមានសមធម៌ គុណវឌ្ឍិក៏ត្រូវបានតែងតាំងនៅតាមការិយាល័យដែលមានការខ្វះចន្លោះ ដែលនេះគឺជាការលើកទឹកចិត្តដល់មន្ត្រីរបស់ ក.ប.ប.។
លោកបានបញ្ជាក់ថា៖ «ការផ្លាស់ប្តូរ កែសម្រួលទាំងនេះ គឺដើម្បីបង្កើនប្រសិទ្ធភាពការងារ ដោយឈរលើវិស័យចំនួន ៣ គឺវិស័យសុវត្ថិភាពម្ហូបអាហារវិស័យនៃកិច្ចការពារអ្នកប្រើប្រាស់ និងវិស័យនៃកិច្ចការប្រកួតប្រជែង។ អ៊ីចឹងយើងត្រៀមលក្ខណៈក្នុងការអនុវត្តកម្មវិធីរបស់យើងដែលបានដាក់ចេញ»។
បើតាម លោក ផាន អូន បច្ចុប្បន្ន អគ្គនាយកដ្ឋាន ក.ប.ប. មានមន្ត្រីកំពុងបំពេញការងារទូទាំងប្រទេសសរុបមន្ត្រី ៦៣២ នាក់ ហើយក្នុងរយៈពេលពេញ ១ ឆ្នាំ ២០២១ កន្លងមក ទំនិញមិនមានភាពអនុលោមតាមច្បាប់ និងមានសារធាតុគីមីជិត ៥០ តោន និងអាល់កុល ជែលលាងដៃគ្រប់ប្រភេទ ដែលមានផ្ទុកសារធាតុមេតាណុល និងសារធាតុបាញ់លើរុក្ខជាតិគ្មានស្លាកសញ្ញាត្រឹមត្រូវសរុបជិត ២ ម៉ឺនលីត្រ ត្រូវបានបង្ក្រាបបាន៕