ភ្នំពេញៈ រហូតមកទល់ពេលនេះ ក្រសួងមហាផ្ទៃមិនទាន់មានចំណាត់ការណាមួយ ទៅលើគណបក្សខ្មែរក្រោកនៅឡើយទេ បន្ទាប់ពីលោក សុខ សុវណ្ណវឌ្ឍនា សាប៊ុង ហៅ វិល្លាម គ័ង ដែលជាប្រធានគណបក្ស ត្រូវបានចាប់ឃុំខ្លួន ដែលប្រឈមនឹងទោសជាប់ពន្ធនាគារពី ៥ ទៅ ១០ ឆ្នាំ ពាក់ព័ន្ធការប្លន់ផ្ទះអ្នកលក់ឡេ តាមអនឡាញអ្នកស្រី អ៊ាន សៀវម៉ី។
លោក ឈឹម កាន ប្រធាននាយកដ្ឋានសមាគម និងគណបក្សនយោបាយនៃក្រសួងមហាផ្ទៃ ប្រាប់ភ្នំពេញប៉ុស្តិ៍នៅថ្ងៃទី ៣ ខែមករា ឆ្នាំ ២០២២ ថា ការមិនទាន់មានចំណាត់ការនេះ គឺក្រសួងបាននិងកំពុងរង់ចាំសេចក្តីសម្រេចជាផ្លូវការពីអយ្យការអមសាលាដំបូងរាជធានីភ្នំពេញ។ ម្យ៉ាងទៀត លោក សុខ សុវណ្ណវឌ្ឍនា សាប៊ុង ក៏កំពុងស្ថិតនៅក្នុងវិធានការផ្លូវច្បាប់នៅឡើយដែរ។
លោកថ្លែងថា៖ «នៅពេលដែលក្រសួងទទួលបាន យើងធ្វើទៅតាមនីតិវិធី ដោយពិនិត្យទៅលើផ្លូវច្បាប់ ថាត្រូវដោះស្រាយយ៉ាងដូចម្តេច? មកដល់ពេលនេះ គណបក្សរបស់គាត់ មិនមានអ្វីប្រែប្រួលនោះទេ គឺកំពុងតែដំណើរការធម្មតា។ យើងមិនទាន់ហាមគេ មិនឱ្យធ្វើសកម្មភាពនយោបាយទេ ដោយរង់ចាំសេចក្តីសម្រេចរបស់តុលាការសិន»។
មន្ត្រីគណបក្សខ្មែរក្រោក ស្នើសុំមិនបញ្ចេញឈ្មោះប្រាប់ភ្នំពេញប៉ុស្តិ៍នៅថ្ងៃទី ៣ ខែមករា ឆ្នាំ ២០២២ ថា ក្រោយពីលោក សុខ សុវណ្ណវឌ្ឍនា សាប៊ុង ត្រូវបានចាប់ខ្លួន និងចោទប្រកាន់ពីតុលាការ គណបក្សខ្មែរក្រោកនៅតែដំណើរការធម្មតា និងមិនមានអ្វីប្រែប្រួលនោះទេ។
លោកបន្តថា បច្ចុប្បន្ននេះគណបក្សក៏កំពុងតែរៀបចំតែងតាំងប្រធានថ្មី ដើម្បីដឹកនាំគណបក្ស សម្រាប់ចូលរួមបោះឆ្នោតនៅពេលខាងមុខៗទៀត។
លោក សោម សូរីដា អ្នកនាំពាក្យ គ.ជ.ប ប្រាប់ភ្នំពេញប៉ុស្តិ៍នៅថ្ងៃទី ៣ ខែធ្នូ ឆ្នាំ ២០២២ ថា គណបក្សដែលបានចុះបញ្ជីត្រឹមត្រូវស្របតាមច្បាប់ស្តីពីគណបក្សនយោបាយនៅក្រសួងមហាផ្ទៃ គឺមានសិទ្ធិចុះបញ្ជីគណបក្សនយោបាយ និងបេក្ខជនឈរឈ្មោះបោះឆ្នោតដើម្បីចូលរួមប្រកួតប្រជែងនៅ គ.ជ.ប បាន។ ដូច្នេះ តាមច្បាប់ គឺមិនសំដៅទៅលើប្រធានគណបក្សនោះទេ។
លោកថ្លែងថា៖ «ទោះបីប្រធានគណបក្ស គាត់ត្រូវបានតុលាការចោទប្រកាន់យ៉ាងណាក្តី ប៉ុន្តែគណបក្សរបស់គាត់នៅតែមានឈ្មោះនៅក្នុងបញ្ជីគណបក្សនយោបាយនៅក្រសួងមហាផ្ទៃដដែល។ មានន័យថា ក្រសួងមហាផ្ទៃមិនទាន់លុបឈ្មោះ គណបក្សនោះចេញពីបញ្ជីគណបក្សនយោបាយ ដែលត្រូវបានចុះបញ្ជីនៅក្នុងក្រសួងមហាផ្ទៃនោះទេ»។
ប្រធានគណបក្សខ្មែរក្រោក លោក សុខ សុវណ្ណវឌ្ឍនា សាប៊ុង អាយុ ៤៤ ឆ្នាំ ត្រូវបានតំណាងអយ្យការអមសាលាដំបូងរាជធានីភ្នំពេញចោទប្រកាន់ចំនួន ៣ បទល្មើស ដែលប្រឈមនឹងទោសជាប់ពន្ធនាគារពី ៥ ទៅ ១០ ឆ្នាំ ពាក់ព័ន្ធនឹងការប្លន់ផ្ទះអ្នកលក់ឡេ តាមអនឡាញអ្នកស្រី អ៊ាន សៀវម៉ី។
លោក ប្លង់ សុផល ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងរាជធានីភ្នំពេញ បានឱ្យដឹងថា លោក សុខ សុវណ្ណវឌ្ឍនា សាប៊ុង អាយុ ៤៤ ឆ្នាំ ត្រូវបានតំណាងអយ្យការ អមសាលាដំបូងរាជធានីភ្នំពេញចោទប្រកាន់ចំនួន ៣ បទល្មើស ក្នុងនោះរួមមាន ទី ១- បទលួចមានស្ថានទម្ងន់ទោស ទី ២- បទកាន់កាប់អាវុធដោយគ្មានការអនុញ្ញាត និងទី ៣-បទក្លែងឯកសារសាធារណៈ។
លោកបន្តថា ដូច្នេះមេបក្សខ្មែរក្រោក ដែលជាមេចោរប្លន់ប្រដាប់អាវុធ ប្លន់អ្នកលក់ឡេតាមអនឡាញនៅថ្ងៃទី ១៩ ខែធ្នូ ឆ្នាំ ២០២១ អាចជាប់គុកពី ៥ ទៅ ១០ ឆ្នាំ។ នេះបើយោងលើបទល្មើស តាមមាត្រាដែលតំណាងអយ្យការបានធ្វើការចោទប្រកាន់ជាផ្លូវការ៕