.jpg)
ក្រុមកូដកម្មនៅមុខណាហ្គាវើលដ៍ នាពេលកន្លងមក។ រូបថត រ៉ាស់ហ៊ីម
ភ្នំពេញៈ សាលាដំបូងរាជធានីភ្នំពេញ កាលពីម្សិលមិញបានសម្រេចបើកការស៊ើបសួរលើបុគ្គល ៩ នាក់ ពាក់ព័ន្ធនឹងអង្គហេតុញុះញង់បំផុសបំផុលអតីតបុគ្គលិករបស់ក្រុមហ៊ុនណាហ្គាវើលដ៍ដែលត្រូវបានបណ្ដេញចេញ ឱ្យធ្វើសកម្មភាពបង្កចលាចលដល់សណ្ដាប់ធ្នាប់របៀបរៀបរយសាធារណៈ និងអាចបង្កឱ្យមានអសន្តិសុខសង្គម។
សេចក្ដីប្រកាសព័ត៌មានរបស់អ្នកនាំពាក្យនៃអយ្យការអមសាលាដំបូងរាជធានីភ្នំពេញ ចេញផ្សាយកាលពីថ្ងៃទី ៣ ខែមករា បានឱ្យដឹងថា៖ «បន្ទាប់ពីបានធ្វើការស៊ើបអង្កេត ស្រាវជ្រាវ និងប្រមូលភ័ស្តុតាងរួចមក អំពើ (ដែលជនសង្ស័យ) បានប្រព្រឹត្តបានបំពានច្បាប់ដូចមានចែងក្នុងមាត្រា ៤៩៤ និងមាត្រា ៤៩៥ នៃក្រមព្រហ្មទណ្ឌ។ ដោយផ្អែកតាមអង្គហេតុ និងអង្គច្បាប់អយ្យការអមសាលាដំបូងរាជធានីភ្នំពេញបានសម្រេចបើកការស៊ើបសួរលើបុគ្គល (៩ នាក់) រួមទាំងបក្ខពួកពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។
បុគ្គលិកក្រុមហ៊ុនណាហ្គាវើលដ៍ ប្រមាណជាងមួយពាន់នាក់បានធ្វើកូដកម្មចាប់តាំងពីពាក់កណ្ដាលខែធ្នូ ឆ្នាំ ២០២១ ហើយកំពុងតែបន្តការតវ៉ារបស់ពួកគេ ដើម្បីទាមទារឱ្យក្រុមហ៊ុននេះទទួលយកបុគ្គលិក ៣៦៥ នាក់ឱ្យចូលធ្វើការវិញ ក្រោយពីបញ្ឈប់ពួកគេដោយមូលហេតុជំងឺឆ្លងកូវីដ ១៩។
ស្នងការដ្ឋាននគរបាលរាជធានីភ្នំពេញ បានបញ្ជូនមេដឹកនាំសហជីពក្រុមហ៊ុនណាហ្គាវើលដ៍ ៩ នាក់ទៅតុលាការកាលពីថ្ងៃទី ៣ ខែមករា ក្រោយពីបានឃាត់ខ្លួនកាលពីថ្ងៃទី ៣១ ខែធ្នូ ដោយចោទប្រកាន់ពួកគេរៀបចំបាតុកម្មនៅពីមុខទីតាំងក្រុមហ៊ុនដោយខុសច្បាប់។
លោក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញបានប្រាប់ភ្នំពេញប៉ុស្តិ៍នៅថ្ងៃទី ៣ ខែមករាថា៖ «ការដែលបញ្ជូនពួកគេ បន្តទៅតុលាការ ដោយបានរកឃើញថា ពួកគេ ពិតជាបានរៀបចំបាតុកម្មដោយខុសច្បាប់នៅមុខក្រុមហ៊ុនណាហ្គាវើលដ៍ ដែលធ្វើឱ្យប៉ះពាល់ដល់សន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម»។
ទោះជាយ៉ាងណាក៏ដោយ សមាគមសហជីពហៅកាត់ថា IUF នៃអាស៊ីប៉ាស៊ីហ្វិក បានសរសេរនៅលើបណ្ដាញសង្គមនានា ដោយទទូចឱ្យអាជ្ញាធរកម្ពុជា ធ្វើការដោះលែងពួកគេជាបន្ទាន់ ដោយសង្ឃឹមថា អាជ្ញាធរនឹងទម្លាក់ការចោទប្រកាន់លើមេដឹកនាំទាំងនោះ។
ក្រុមប្រតិភូចរចាវិវាទ (ជាមួយ) ក្រុមហ៊ុនណាហ្គាវើលដ៍ បានលើកឡើងនៅក្នុងសេចក្តីប្រកាសព័ត៌មានរបស់ខ្លួន កាលពីថ្ងៃទី ១ ខែមករាថា ការធ្វើកូដកម្មជាង ១០ ថ្ងៃកន្លងមកនេះ គឺកើតឡើងដោយភាគីក្រុមហ៊ុនព្រងើយកន្តើយមិនអនុវត្តច្បាប់ប្រទេសកម្ពុជា ហើយអាជ្ញាធរពាក់ព័ន្ធ ជាពិសេសក្រសួងការងារ មិនមានចេតនាពិតប្រាកដជំរុញឱ្យក្រុមហ៊ុនអនុវត្តច្បាប់ឱ្យបានត្រឹមត្រូវ។
ក្រុមប្រតិភូចរចាវិវាទនេះបន្តថា៖ «ក្រសួងការងារមិនបានដើរតួជាស្ថាប័នជំនាញក្នុងការដោះស្រាយ ក្រៅពីកោះហៅភាគីពាក់ព័ន្ធឱ្យទៅបកស្រាយឱ្យស្តាប់ រួចធ្វើកំណត់ហេតុមិនសះជា បន្ទាប់មកចេញសេចក្ដីថ្លែងការណ៍ថា ខ្លួនបានខិតខំប្រឹងប្រែងដែរ ខណៈសកម្មភាពរបស់មន្ត្រីជំនាញបានធ្វើឱ្យប្រព័ន្ធច្បាប់ការងារ ត្រូវបានរំលោភជាបន្តបន្ទាប់ពីនិយោជក»។
ក្រុមប្រតិភូចរចាវិវាទនេះ បានបញ្ជាក់ថា ការដែលស្នងការដ្ឋាននគរបាលរាជធានី-ភ្នំពេញថា ការប្រមូលផ្តុំរបស់កម្មករធ្វើឱ្យប៉ះពាល់ដល់សណ្តាប់ធ្នាប់សាធារណៈ សន្តិសុខ និងធ្វើឱ្យប៉ះពាល់ដល់អាជីវកម្មរបស់ក្រុមហ៊ុន មិនបានឆ្លុះបញ្ចាំងពីតថភាពពិតនោះទេ។ ផ្ទុយទៅវិញអាជ្ញាធរកំពុងតែលើកទឹកចិត្តដល់និយោជកបន្តរំលោភច្បាប់ ដែលធ្វើឱ្យប៉ះពាល់ដល់មុខមាត់រាជរដ្ឋាភិបាលទាំងនៅក្នុងតំបន់ និងអន្តរជាតិថែមទៀតផង។
លោក ហេង សួរ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ កាលពីម្សិលមិញបានបញ្ជាក់ថា៖ «ចំពោះមុខក្រសួងនៅតែជូនដំណឹងដល់ភាគីទាំង ២ ឱ្យគិតពីប្រយោជន៍រួមជាធំ និងត្រូវអនុវត្តឱ្យបានត្រឹមត្រូវតាមវិធាននៃការដោះស្រាយវិវាទ ការងាររួម»។
លោកថ្លែងបន្តថា៖ «ខ្ញុំសូមបញ្ជាក់ម្តងទៀតថាយោងតាមច្បាប់នៅពេលដែលភាគីវិវាទការងារជ្រើសរើសការផ្សះផ្សានៅក្រុមប្រឹក្សាអាជ្ញាកណ្តាល ដោយមិនជាប់កាតព្វកិច្ច ជំហានចុងក្រោយគឺត្រូវតែទៅតុលាការដើម្បីបញ្ចប់វិវាទនោះ។ ការធ្វើកូដកម្មគឺជាសិទ្ធិរបស់បងប្អូនកម្មករ ប៉ុន្តែការបន្តកូដកម្ម ឬបញ្ឈប់កូដកម្ម គឺបងប្អូនត្រូវពិនិត្យទៅលើដីការបស់តុលាការ»។ លោកបញ្ជាក់ថា ការបញ្ឈប់ខុសច្បាប់ ឬត្រូវច្បាប់ក៏ជាចំណុចដែលអាចប្តឹងទៅតុលាការផងដែរប្រសិនជាភាគីដែលត្រូវបញ្ឈប់មិនសុខចិត្តនឹងសេចក្តីបង្គាប់របស់ក្រុមប្រឹក្សាអាជ្ញាកណ្តាល ឬមិនអាចទទួលយកការផ្សះផ្សា ឬមិនអាចទទួលយកគោលជំហររបស់និយោជក។
កាលពីថ្ងៃទី ២ មករា ក្រសួងការងារ និងបណ្តុះបណ្តាលវិជ្ជាជីវៈ បានប្រកាសឱ្យអតីតបុគ្គលិកក្រុមហ៊ុនណាហ្គាវើលដ៍ ទៅផ្ដល់ព័ត៌មាននានា ទាក់ទងករណីនិយោជក មិនបានទូទាត់ប្រាក់បំណាច់បញ្ចប់កិច្ចសន្យាការងារដល់ខ្លួនត្រឹមត្រូវ ដើម្បីឱ្យក្រសួង ធ្វើការផ្ទៀងផ្ទាត់ឡើងវិញ និងផ្តល់ជូនកម្មករបន្ថែម។
លោក មឿន តុលា នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្សបានថ្លែងថា អាជ្ញាធរ មិនគួរណាមានវិធានការធ្ងន់ធ្ងរ និងមិនសមរម្យទៅកាន់កម្មករ ដែលបានប្រមូលផ្តុំធ្វើកូដកម្មដោយស្របច្បាប់នោះទេ គួរណាស់តែព្យាយាមដោះស្រាយវិវាទនេះដោយសន្តិវិធី៕
