ភ្នំពេញៈ សាលាដំបូងរាជធានីភ្នំពេញបានសម្រេចឃុំខ្លួនបុរសជនជាតិវៀតណាមម្នាក់ ពាក់ព័ន្ធនឹងករណីជួញដូរគ្រឿងញៀនចំនួនជិត ២៤ គីឡូក្រាម។ នេះបើយោងតាមការប្រាប់ឱ្យដឹងពីមន្ត្រីនគរបាលនៃមន្ទីរប្រឆាំងគ្រឿងញៀនកាលពីរសៀលថ្ងៃទី ៣ ខែមករា ឆ្នាំ ២០២២។
លោក អ៊ិន សុង អ្នកនាំពាក្យមន្ទីរប្រឆាំងគ្រឿងញៀនបានប្រាប់ភ្នំពេញ-ប៉ុស្តិ៍ថា កាលពីល្ងាចថ្ងៃទី ២៨ ខែធ្នូ ឆ្នាំ ២០២១ កម្លាំងមន្ទីរប្រឆាំងគ្រឿងញៀន (ក៥) បានសហការជាមួយកម្លាំងបង្ក្រាបគ្រឿងញៀននៃស្នងការដ្ឋាននគរបាលរាជធានីភ្នំពេញចុះបង្ក្រាបចាប់បុរសជនជាតិវៀតណាមម្នាក់ ឈ្មោះ អ៊ូច លីន អាយុ ១៨ ឆ្នាំនៅចំណុចរង្វង់មូលនាងទេពមច្ឆា ក្នុងសង្កាត់ព្រែកលៀប ខណ្ឌជ្រោយចង្វារ ដោយរឹបអូសបានវត្ថុតាងគ្រឿងញៀនប្រភេទ Ice-methamphetamine ចំនួន ២៤ កញ្ចប់ធំ មានទម្ងន់សរុប ២៣ គីឡូក្រាម និង ៧៣៨ ក្រាម។
លោកបានបញ្ជាក់ថា៖ «នៅព្រឹកថ្ងៃទី ៣១ ខែធ្នូ ឆ្នាំ ២០២១ ជនសង្ស័យត្រូវបានកម្លាំងនគរបាលជំនាញការិយាល័យទី ៥ នៃមន្ទីរប្រឆាំងគ្រឿងញៀនកសាងសំណុំរឿងបញ្ជូនទៅតុលាការហើយតុលាការបានសម្រេចឱ្យនាំយកទៅឃុំខ្លួននៅពន្ធនាគារព្រៃសជាបណ្ដោះអាសន្ន ដោយចោទប្រកាន់ពីបទរក្សាទុក ដឹកជញ្ជូន និងជួញដូរសារធាតុញៀន តាមមាត្រា ៤០ នៃច្បាប់ស្ដីពីគ្រឿងញៀន»។
យោងតាមមាត្រា ៤០ នៃច្បាប់ស្ដីពីការត្រួតពិនិត្យគ្រឿងញៀនបានបញ្ជាក់ថា ក្នុងករណីការប្រព្រឹត្តបទល្មើសគ្រឿងញៀនប្រភេទ Amphetamine Methamphetamine Ecstasy មានបរិមាណសុទ្ធលើសពី ២៤០ ក្រាមឡើងទៅនឹងត្រូវផ្ដន្ទាទោសជាប់ពន្ធនាគារពី ២០ ឆ្នាំ ទៅ ៣០ ឆ្នាំ ឬអស់ ១ ជីវិត និងផ្តន្ទាទោសពិន័យជាប្រាក់ពី ៤០ លានរៀលទៅ ១០០ លានរៀល។ ដូច្នេះជនសង្ស័យអាចនឹងត្រូវប្រឈមការផ្ដន្ទាទោសក្នុងថិរវេលាដែលបានកំណត់នៃច្បាប់នេះជាធរមាន ព្រោះបរិមាណគ្រឿងញៀនប្រភេទ Ice-methamphetamine ដែលសមត្ថកិច្ចបានរកឃើញនឹងចាប់រឹបអូសពីជនសង្ស័យរូបនេះ មានចំនួនច្រើនលើសលប់រហូតដល់ជិត ២៤ គីឡូក្រាម៕