.jpg)
មន្ត្រីសិទ្ធិមនុស្សកម្ពុជាពេលស៊ើបករណីផ្ដន្ទាទោសអនីតិជន។ រូបថត Chin Malin Page
ភ្នំពេញៈ គណៈកម្មាធិការសិទ្ធិមនុស្សកម្ពុជាតាមរយៈក្រុមការងាររបស់ខ្លួន បាននិងកំពុងស៊ើបអង្កេតករណីសាលាដំបូងខេត្តត្បូងឃ្មុំបានផ្តន្ទាទោសក្មេងប្រុសជាអនីតិជនអាយុ ១៤ ឆ្នាំម្នាក់ ដាក់ពន្ធនាគារពីបទប៉ុនប៉ងឃាតកម្មលើបុរសម្នាក់ ដោយការដាក់ថ្នាំបំពុល ក៏ប៉ុន្តែម្ដាយកុមារារូបនេះថា ពុំមានភ័ស្ដុតាង។
ការចុះស្រាវជ្រាវក្នុងសំណុំរឿងនេះ បន្ទាប់ពីម្តាយអនីតិជនបានស្នើលោកនាយករដ្ឋមន្ត្រី ហ៊ុន សែន ជួយអន្តរាគមន៍ដោយចាត់ទុកថា ការចោទប្រកាន់របស់តុលាការគ្មានភ័ស្តុតាងច្បាស់លាស់ និងជារឿងអយុត្តិធម៌ចំពោះកូនប្រុសរបស់ខ្លួន។
ក្នុងលិខិតអំពាវនាវសរសេរដោយដៃ និងបានបង្ហោះជាសាធារណៈរបស់ម្តាយអនីតិជនគឺអ្នកស្រី សូរ ស្រីខួច បានស្នើសុំលោកនាយករដ្ឋមន្ត្រី ហ៊ុន សែន ជួយអន្តរាគមន៍ក្នុងសំណុំរឿងនេះ។
ក្នុងលិខិតអំពាវនាវបានលើកឡើងថា៖ «សម្តេចពុកសែនជួយដល់កូនចៅផង...មានរឿងអយុត្តិធម៌ត្រូវថៅកែចិត្តខ្មៅចោទប្រកាន់កូនប្រុសឈ្មោះ ធន់ ឌីណា អាយុ ១៤ ឆ្នាំ ថាបានដាក់ថ្នាំបំពុលសម្លាប់គាត់ដោយគ្មានភ័ស្តុតាងច្បាស់លាស់ ហើយត្រូវតុលាការចាប់ដាក់គុកចំនួន [៥ ឆ្នាំ] ដោយអយុត្តិធម៌បំផុត»។
ឆ្លើយតបទៅនឹងការអំពាវនាវនេះ ប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី បានចាត់តាំងក្រុមការងារចុះធ្វើការស្រាវជ្រាវក្នុងករណីនេះ។ លោកបានបង្ហោះសារនៅហ្វេសប៊ុកថា៖ «ក្នុងនាមគណ:កម្មាធិការសិទ្ធិមនុស្សកម្ពុជាដែលជាសេនាធិការឱ្យរាជរដ្ឋាភិបាលខ្ញុំក៏បានចាត់ក្រុមការងារចុះស៊ើបអង្កេតហើយក៏ជួបក្មេងម្នាក់ទៀតដែលមានអាយុ ១៤ ឆ្នាំដូចគ្នា ពួកយើងនឹងតស៊ូតាមផ្លូវច្បាប់ ដើម្បីជួយក្មេងទាំង ២ នាក់នេះ»។
ជាមួយគ្នានេះដែរ អនុប្រធានគណៈកម្មាធិការសិទ្ធិមនុស្សកម្ពុជា និងជារដ្ឋលេខាធិការក្រសួងយុត្តិធម៌លោក ជិន ម៉ាលីន បានប្រាប់ភ្នំពេញប៉ុស្តិ៍បន្ថែមនៅថ្ងៃទី ៣ ខែមករាថា គណៈកម្មាធិការសិទ្ធិមនុស្សកម្ពុជាបានចុះអង្កេតផ្ទាល់លើសំណុំរឿងនេះ និងបានផ្តល់មេធាវីការពារក្តីដោយឥតគិតថ្លៃព្រមទាំងបានធ្វើបណ្តឹងឧទ្ធរណ៍រួចរាល់ហើយផងដែរ តាមនីតិវិធីច្បាប់ជាធរមាន។
លោកថា៖ «ជានីតិវិធីក្រុមការងារនឹងធ្វើការការពារក្តីជូនអនីតិជនដោយឥតគិតថ្លៃនៅសាលាឧទ្ធរណ៍ ហើយក្រុមការងារក៏បានដាក់ពាក្យបណ្តឹងរួចអស់ហើយ ហើយការសម្រេចយ៉ាងម៉េចនោះអាស្រ័យទៅលើតុលាការជាអ្នកសម្រេច»។
ជាមួយគ្នានេះដែរ លោកបានថ្លែងអំណរគុណដល់ក្រុមការងារដែលបានធ្វើការងារនេះទាំងថ្ងៃឈប់សម្រាក និងអរគុណផងដែរ ដល់សាលាដំបូងខេត្តត្បូងឃ្មុំ និងសមត្ថកិច្ចពាក់ព័ន្ធផ្សេងៗទៀតដែលបានផ្តល់កិច្ចសហការតាមការស្នើសុំ។
នាយករងទទួលបន្ទុកផ្នែកឃ្លាំមើល និងការពារសិទ្ធិមនុស្សនៃអង្គការលីកាដូលោក អំ សំអាត បានថ្លែងថា ការបង្កើតក្រុមការងារស្រាវជ្រាវនេះគឺជាតួនាទីដ៏សំខាន់សម្រាប់គណៈកម្មាធិការសិទ្ធិមនុស្ស ដែលត្រូវស៊ើបអង្កេតករណីនេះ។
លោកថា៖ «ពីព្រោះបើករណីនេះពិតដូចជាក្រុមគ្រួសារបានប្តឹងមែនប្រសិនបើកុមារនោះមិនមានការប្រព្រឹត្តដូចការចោទប្រកាន់ ហើយមិនមានភ័ស្តុតាងគ្រប់គ្រាន់ទេ ហើយត្រូវបានតុលាការធ្វើការផ្តន្ទាទោសជារឿងមួយដែលអយុត្តិធម៌ និងប៉ះពាល់ធ្ងន់ធ្ងរសម្រាប់សិទ្ធិកុមារដែលគួរតែមានការស៊ើបអង្កេត»។
បន្ថែមពីនេះលោកថា ក្នុងករណីក្រុមការងារស្រាវជ្រាវរកមិនឃើញបទល្មើសដូចការចោទប្រកាន់របស់តុលាការមែន ក្រសួងយុត្តិធម៌ គួរតែពិនិត្យទៅលើការសម្រេចនោះ។
លោកថា៖ «ប្រសិនបើការស្រាវជ្រាវរកឃើញថា ការសម្រេចនេះ អយុត្តិធម៌ ហើយមិនត្រឹមត្រូវ និងមិនមានភ័ស្តុតាងគ្រប់គ្រាន់ទេ គឺជាសមត្ថកិច្ចរបស់ក្រសួងយុត្តិធម៌ និងឧត្តមក្រុមប្រឹក្សានៃអង្គចៅក្រមក្នុងការពិនិត្យទៅលើការសម្រេចរបស់ចៅក្រមថា តើត្រឹមត្រូវទៅតាមនីតិវិធីដែរឬទេ»។
យ៉ាងណាក្ដី កាលពីថ្ងៃទី ៣០ ខែធ្នូ ឆ្នាំ ២០២១ សាលាដំបូងខេត្តត្បូងឃ្មុំបានចេញសេចក្តីថ្លែងការណ៍ថា ក្រោយចប់កិច្ចពិភាក្សាដេញដោល និងក្រោយពីបានពិនិត្យភ័ស្តុតាងក្នុងសំណុំរឿងត្រឹមត្រូវតាមច្បាប់ ក្រុមប្រឹក្សាជំនុំជម្រះបានរកឃើញថា កាលពីថ្ងៃទី ២៩ ខែកក្កដា ឆ្នាំ ២០២១ ជនជាប់ចោទឈ្មោះ រ៉ាំ ហូវ អាយុ ២៥ ឆ្នាំ បានប្រើជនជាប់ចោទឈ្មោះ ធន់ ឌីណា អាយុ ១៤ ឆ្នាំឱ្យយកថ្នាំពុលដាក់ក្នុងបាយ និងដបទឹកផឹករបស់ជនរងគ្រោះ។
សេចក្តីថ្លែងការណ៍នោះបានបញ្ជាក់ថា៖ «អង្គហេតុដែលបានរកឃើញនេះបានបង្ហាញពីពិរុទ្ធភាព របស់ជនជាប់ចោទទាំង ២ ហើយតាមរយៈនេះក្រុមប្រឹក្សាជំនុំជំម្រះសម្រេចផ្តន្ទាទោសឈ្មោះ ធន់ ឌីណា ដាក់ពន្ធនាគារ ៤ ឆ្នាំ ដោយផ្តល់ស្ថានសម្រាលទោសព្រមទាំងផ្តន្ទាទោសឈ្មោះ រ៉ាំ ហូវ ដាក់ពន្ធនាគារ ៥ ឆ្នាំ ដោយស្ថានសម្រាលទោសដូចគ្នា»៕
