សៀមរាបៈ ក្រុមការងារជំនាញនៃអាជ្ញាធរជាតិអប្សរាបានបន្តសកម្មភាព កាត់ដើមពោធិ៍ ជ្រៃ និងរុក្ខជាតិធំៗមួយចំនួន ដែលបានដុះនៅលើថ្មប្រាសាទនានានៅតំបន់ឧទ្យានអង្គរ ដើម្បីលើកកម្ពស់សោភណភាព និងបញ្ចៀសហានិភ័យដល់ប្រាសាទដែលមានវ័យចំណាស់។
លោក ងិន ធី អ្នកទទួលបន្ទុកការសម្អាតរុក្ខជាតិតាមប្រាសាទនៃនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ បានឱ្យដឹងថា ក្នុងចំណោមរុក្ខជាតិទាំងអស់ដែលដុះនៅលើប្រាសាទមានរុក្ខជាតិប្រភេទធំៗមួយចំនួនដូចជា ដើមពោធិ៍ ជ្រៃ ស្ពង់ ដុះជាប់ជាប្រចាំមិនថា រដូវប្រាំង ឬវស្សាឡើយ។
លោកថា៖ «ហើយរុក្ខជាតិទាំងនោះងាយនឹងដុះលូតលាស់លឿនដែលធ្វើឱ្យក្រុមការងារត្រូវយកចិត្តទុកដាក់ក្នុងការកាត់សម្អាតជាប្រចាំ ពោលគឺក្នុងរយៈពេល ១ ខែកន្លះ ឬ ២ ខែត្រូវមកកាត់សម្អាតម្តងមិនដូចរុក្ខជាតិប្រភេទស្មៅឡើយ»។
លោក គូសបញ្ជាក់ថា ការធ្វើបែបនេះ ដើម្បីលើកកម្ពស់អនាម័យ សោភណភាព និងចៀសវាងធ្វើឱ្យថ្មប្រាសាទក្រៀក ឬរលុះនៅពេលរុក្ខជាតិដុះកាន់តែធំ។ បើតាមលោក ងិន ធី មូលហេតុដែលនាំឱ្យរុក្ខជាតិទាំងនោះមកដុះនៅលើប្រាសាទបាន ដោយសារកត្តា ខ្យល់បក់នាំគ្រាប់រុក្ខជាតិមកទើលើល្បាក់ថ្ម និងសត្វស្លាប តែងតែពាំគ្រាប់រុក្ខជាតិមកធ្វើជាចំណីអាហារជាប្រចាំហើយបានធ្លាក់ជ្រុះលើថ្មប្រាសាទទាំងនោះ។
ជាមួយគ្នានេះលោក ឈឿម ទ្រី ដែលជាបុគ្គលិកផ្នែកសម្អាតរុក្ខជាតិ តាមប្រាសាទបាននិយាយថា ផ្តើមចេញពីទឹកចិត្តស្រឡាញ់ ចង់ថែរក្សាប្រាសាទបុរាណ និងចង់ឱ្យប្រាសាទនៅគង់វង្សយូរអង្វែងបន្តទៀត លោកមានការតាំងចិត្ត ដើម្បីកាត់សម្អាតរុក្ខជាតិទាំងតូចធំដែលដុះនៅលើប្រាសាទទាំងអស់ក្នុងឧទ្យានអង្គរ។
លោកបន្តថា ក្នុងបទពិសោធការងាររយៈពេលប្រមាណជាង ២០ ឆ្នាំមកនេះ ទោះបីដឹងថា ត្រូវប្រឈមមុខខ្លះៗ នឹងគ្រោះថ្នាក់មួយចំនួន ដោយសារការតោងឡើងទៅលើកំពូលប្រាសាទខ្ពស់ៗ ដើម្បីកាត់សម្អាតរុក្ខជាតិក្តី ក៏រូបលោកនៅតែមានសេចក្តីពេញចិត្ត ចំពោះភារកិច្ចរបស់ខ្លួន។
ទីប្រឹក្សាសមាគមទីភ្នាក់ងារទេសចរណ៍កម្ពុជាលោក ហូ វណ្ឌី បានថ្លែងថា ការអភិរក្សបេតិកភណ្ឌជាតិ គឺមានសារៈសំខាន់ណាស់សម្រាប់ទាក់ទាញភ្ញៀវទេសចរជាតិ និងអន្តរជាតិឱ្យចូលទស្សនា។ លោកថា៖ «ក្រុមការងារជំនាញធ្វើនេះ ដើម្បីលើកកម្ពស់សោភណភាពដល់ភ្ញៀវទេសចរហើយវាជានិរន្តភាពដល់ប្រាង្គប្រាសាទទៅថ្ងៃមុខ»។
លោកបានគូសបញ្ជាក់ថា ជារួមមួយរយៈចុងក្រោយនេះ ក្រុមការងារអាជ្ញាធរជាតិអប្សរា មានភាពមមាញឹកក្នុងការថែរក្សា និងជួសជុលប្រាសាទបានល្អប្រសើរ ដែលនេះជាអ្វីដែលអ្នកធ្វើការក្នុងវិស័យទេសចរណ៍ចង់បានយូរណាស់មកហើយ។ លោកថា៖ «ពួកបងដែលធ្វើការក្នុងវិស័យឯកជនរាប់សិបឆ្នាំមកនេះ តែងតែស្នើសុំការរក្សាដើមឈើ ដាំដើមឈើការកែលម្អ ឥឡូវនេះឃើញថា មានភាពស្គុះស្គាយច្រើនណាស់បើយើងមើលចំពោះអ្នកធ្វើការពាក់ព័ន្ធករណីនេះ ឃើញមានភាពខុសប្លែកពីមុនច្រើន។ យើងឃើញថា ក្នុងតំបន់អង្គរតូចមានការរៀបចំហេដ្ឋារចនាសម្ព័ន្ធ ការដាំដើមឈើ ការកែលម្អ ការថែរក្សា ជាមួយនឹងការរៀបចំការតាំងពិព័រណ៍ផ្សេងៗក្នុងតំបន់នោះ»។
អាជ្ញាធរជាតិអប្សរា បានឱ្យដឹងថា ក្រុមការងារកាត់សម្អាតរុក្ខជាតិលើប្រាសាទ ក្នុងរមណីយដ្ឋានអង្គរ តែងតែបានកាត់សម្អាតរុក្ខជាតិតូចធំជាប្រចាំថ្ងៃទៅតាមផែនការគ្រោងទុកដែលបានរៀបចំឡើងតាមស្ថានភាពជាក់ស្តែង ដើម្បីបញ្ចៀសនូវហានិភ័យផ្សេងៗបង្កឡើងដោយរុក្ខជាតិទាំងនោះ៕