ភ្នំពេញៈ ប្រធានរដ្ឋសភា លោក ហេង សំរិន បានជំរុញដល់ឯកអគ្គរាជទូតកម្ពុជាដែលត្រូវបំពេញបេសកកម្មការទូតនៅក្រៅប្រទេស ត្រូវតម្កល់ប្រយោជន៍ជាតិជាធំ ទោះក្នុងកាលៈទេសៈណាក៏ដោយ ជាពិសេសត្រូវរក្សាការពារ និងលើកតម្លៃជាតិជានិច្ច។
ការជំរុញរបស់លោកបែបនេះបានធ្វើឡើងកាលពីថ្ងៃទី ៤ ខែមករា ក្នុងឱកាសទទួលជួបឯកអគ្គរាជទូតកម្ពុជាចំនួន ៣ រូបដែលត្រូវបានរាជរដ្ឋាភិបាលតែងតាំងឱ្យបំពេញបេសកកម្មការទូតនៅតាមប្រទេសមួយចំនួន ដើម្បីសម្តែងការគួរសមនិងជម្រាបលា ព្រមទាំងទទួលអនុសាសន៍មុនពេលចាកចេញពីមាតុប្រទេសទៅបំពេញបេសកកម្មនៅតាមប្រទេសជាមិត្ត។
ឯកអគ្គរាជទូត ៣ រូប ដែលចូលសម្តែងការគួរសម រួមមានលោក ទុយ រី ឯកអគ្គរាជទូតកម្ពុជា ប្រចាំប្រទេសជប៉ុន លោក កែវ ឈា ឯកអគ្គរាជទូតកម្ពុជាប្រចាំសហរដ្ឋអាមេរិក និងម៉ិកស៊ិក ដែលមាននិវេសនដ្ឋាននៅទីក្រុងវ៉ាស៊ីនតោនសហរដ្ឋអាមេរិក និងលោក ផន ពៅ ឯកអគ្គរាជទូតកម្ពុជាប្រចាំសាធារណរដ្ឋហ្វីលីពីន។
នាឱកាសនោះ លោក ហេង សំរិន បានលើកឡើងថា ក្នុងនាមជាឯកអគ្គរាជទូតត្រូវបង្ហាញ និងប្រកាន់ខ្ជាប់នូវអត្តសញ្ញាណជាតិ និងសេចក្តីថ្លៃថ្នូរដោយត្រូវបន្តលើកកម្ពស់ផ្សព្វផ្សាយឱ្យបរទេសស្គាល់កម្ពុជាបានច្បាស់ ទាំងផ្នែកសិល្បៈ វប្បធម៌ និងប្រពៃណីខ្មែរ ដែលជាប្រជាជាតិមួយមានវប្បធម៌រុងរឿង តាំងពីសម័យអង្គរមក។
បន្ថែមពីនេះ លោកបានផ្តល់អនុសាសន៍ដល់ឯកអគ្គរាជទូតទាំងអស់ ត្រូវយកចិត្តទុកដាក់ជួយសម្របសម្រួល និងដោះស្រាយបញ្ហានានារបស់ពលរដ្ឋខ្មែរនៅតាមប្រទេសដែលបំពេញការងារឱ្យមានប្រសិទ្ធភាព និងទាន់ពេលវេលា។
លោកបានបញ្ជាក់ថា៖ «ត្រូវចុះស្វែងយល់សុខទុក្ខ និងក្តាប់ព័ត៌មានឱ្យបានច្បាស់លាស់ជាក់ស្តែងអំពីប្រជាពលរដ្ឋសិស្សនិស្សិត និងពលករខ្មែរ ដែលកំពុងរស់នៅក្រៅប្រទេសហើយបង្កលក្ខណៈងាយស្រួលលើសេវាកម្មនានា របស់ស្ថានទូត លើកកម្ពស់ សុខុមាលភាព និងការពារផលប្រយោជន៍របស់ពួកគាត់»។
ក្រៅពីនេះលោក ហេង សំរិន បានជំរុញដល់ឯកអគ្គរាជទូតទាំងអស់ត្រូវបង្កើនកិច្ចសហប្រតិបត្តិការល្អជាមួយឯកអគ្គរដ្ឋទូតរាជទូត នៃបណ្តាប្រទេសដទៃទៀតឱ្យបានល្អបំផុត ដើម្បីកៀរគរផលប្រយោជន៍នានាជូនប្រទេសជាតិដូចជាការទាក់ទាញអ្នកទេសចរ និងអ្នកវិនិយោគមកកាន់កម្ពុជាជាដើម។
លោក កែវ ឈា ឯកអគ្គរាជទូតកម្ពុជា ប្រចាំសហរដ្ឋអាមេរិក និងម៉ិកស៊ិក ដែលតំណាងឱ្យឯកអគ្គរាជទូត ២ រូបផ្សេងទៀត បានថ្លែងនៅក្នុងសន្និសីទក្រោយបញ្ចប់កិច្ចប្រជុំបិទទ្វារដោយបានប្តេជ្ញា អនុវត្តនូវភារកិច្ចរបស់ខ្លួនក្នុងការបង្កើនទំនាក់ទំនងជាមួយប្រទេសម្ចាស់ផ្ទះ និងផ្សព្វផ្សាយពីកម្ពុជា។
លោកថា៖ «យើងនឹងអនុវត្តភារកិច្ចរបស់យើងខ្ញុំឱ្យបានសមស្រប និងលើកស្ទួយនូវការពង្រឹងពង្រីកនយោបាយការបរទេសរបស់យើងជាមួយប្រទេសជាមិត្ត ជាពិសេសប្រទេសម្ចាស់ផ្ទះ ហើយជាមួយប្រទេសដទៃទៀតដែលយើងមានទំនាក់ទំនង»។
ក្នុងនាមលោកជាឯកអគ្គរាជទូតកម្ពុជាប្រចាំសហរដ្ឋអាមេរិក លោកនឹងខិតខំលើកយកទឡ្ហីករណ៍ដើម្បីពន្យល់ច្បាស់លាស់ទៅកាន់សហរដ្ឋអាមេរិក ដែលតែងតែចោទកម្ពុជាថា ផ្តល់ទីតាំងយោធាដល់ប្រទេសចិន។
លោកបានថ្លែងថា៖ «ប៉ុន្តែបើហាមគេឱ្យឈប់ចោទយើងវាទៅអត់រួចទេ ពីព្រោះការចោទប្រកាន់នៅតែមាន ព្រោះវាលទ្ធផលនៃភូមិសាស្ត្រនយោបាយ វាជាការប្រទាញប្រទង់គ្នារវាងមហាអំណាច ២ ដូច្នេះគេតែងតែចោទយើងជារឿងធម្មតា ប៉ុន្តែអ្វីដែលយើងធ្វើ គឺត្រូវតែធ្វើ និងពន្យល់គេបន្ថែមទៀត»។
បន្ថែមពីនេះដោយសារក្នុងឆ្នាំ ២០២២ កម្ពុជាទទួលធ្វើជាប្រធានអាស៊ានផងនោះ លោកក៏នឹងជួយផ្សព្វផ្សាយពីសមិទ្ធផលរបស់អាស៊ានដែលបានសម្រេចកន្លងមក និងទិសដៅបន្ត។
លោកបានបញ្ជាក់ថា៖ «ក្នុងភារកិច្ចជាប្រធានអាស៊ានគឺប្រកាន់ភ្ជាប់នូវគោលជំហរពង្រឹងនូវការអភិវឌ្ឍសេដ្ឋកិច្ចរបស់សហគមន៍អាស៊ានទាំងមូល ហើយក្នុងនាមយើងជាឯកអគ្គរាជទូតទៅកាន់ប្រទេសផ្សេងៗជំហានដំបូងយើងត្រូវពង្រីកកម្មវិធីរបស់យើងដែលយើងមានក្នុងរយៈពេលដឹកនាំអាស៊ាន ហើយយើងនឹងខំប្រឹងផ្សព្វផ្សាយសមិទ្ធផលដែលយើងធ្វើបាន ក៏ដូចជាអ្វីដែលយើងនឹងធ្វើទៅមុខទៀត ដើម្បីពង្រឹង និងពង្រីកសេដ្ឋកិច្ចរបស់យើង»។
ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជាលោក គិន ភា បានថ្លែងថា សម្រាប់តំណាងទូតកម្ពុជាប្រចាំនៅបរទេស បានដើរតួនាទីយ៉ាងសំខាន់ក្នុងការបង្កើនទំនាក់ទំនង ផ្សព្វផ្សាយវប្បធម៌ ជាពិសេសកៀរគរអ្នកវិនិយោគផងដែរ។ លោកមើលឃើញថា បេសកកម្មរបស់តំណាងទូតកម្ពុជានៅបរទេសនាពេលបច្ចុប្បន្នមានការវិវឌ្ឍជាវិជ្ជមានគួរឱ្យកត់សម្គាល់។
លោកថា៖ «ជារួមមានការវិវឌ្ឍជាវិជ្ជមានច្រើន…ពួកគាត់ម្នាក់ៗ មានការខិតខំប្រឹងប្រែងស្វែងរកការវិនិយោគ និងលើកកម្ពស់កិត្យានុភាពជាតិលើឆាកអន្តរជាតិ អ៊ីចឹងមុខងារគាត់កាន់តែសំខាន់ មិនមែនជាមុខងារការទូតបែបប្រពៃណីដូចមុនទេ គឺមុខងារសម្រាប់នាំមកនូវពាណិជ្ជកម្ម និងទេសចរណ៍ផងដែរ»៕