ភ្នំពេញៈ ក្នុងឆ្នាំ ២០២១ កន្លងមកនេះ ជំងឺគ្រុនឈាម បានកើតឡើងជាង ១ ៤០០ ករណីក្នុងក្របខ័ណ្ឌទូទាំងប្រទេស ក្នុងនោះបានបណ្តាលឱ្យមនុស្សស្លាប់ចំនួន ៣ ករណី ដែលចំនួននេះ មន្ត្រីបញ្ជាក់ថា មានការថយចុះជិត ១០ ដងបើប្រៀបធៀបនឹងឆ្នាំ ២០២០។
លោក លាង ឫទ្ធា ប្រធានកម្មវិធីជាតិប្រយុទ្ធនឹងជំងឺគ្រុនឈាមនៃមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ប៉ារ៉ាស៊ីតសាស្ត្រ និងបាណកសាស្ត្រ បានប្រាប់ភ្នំពេញប៉ុស្តិ៍ នៅថ្ងៃទី ៤ មករាថា យោងតាមតួលេខរបស់កម្មវិធីជាតិប្រយុទ្ធនឹងជំងឺគ្រុនឈាម ក្នុងរយៈពេល ១ ឆ្នាំ នៅឆ្នាំ ២០២១ កន្លងមកនេះ ជំងឺគ្រុនឈាម បានកើតឡើងជាង ១ ៤០០ ករណី។ ជំងឺនេះ បានបណ្តាលឱ្យមនុស្សស្លាប់ចំនួន ៣ នាក់នៅក្នុងក្របខ័ណ្ឌទូទាំងប្រទេស ខណៈខេត្ត ដែលមានតួលេខឆ្លងច្រើន គឺខេត្តដែលមានអត្រាប្រជាជនច្រើន ដូចជាខេត្តកណ្តាល កំពង់ចាម សៀមរាប និងរាជធានីភ្នំពេញ។
លោក បញ្ជាក់ថា៖ «បើប្រៀបធៀបនឹងឆ្នាំ ២០២០ ចំនួនអ្នកកើតជំងឺគ្រុនឈាម មានការធ្លាក់ចុះប្រមាណជិត ១០ ដង។ ក្នុងឆ្នាំ ២០២១ ជំងឺនេះ យើងគ្រប់គ្រងបាន ដោយសារយើងចាប់ផ្តើមធ្វើការតាំងពីដើមឆ្នាំ ដូចឆ្នាំរាល់ដងអ៊ីចឹង ហើយប្រជាជនយើងមានការយល់ដឹងច្រើនដែរ។ ដល់អ៊ីចឹងទៅធ្វើឱ្យការចូលរួមរបស់ពួកគាត់ ដូចជាការសម្អាតបរិស្ថានមានការកើនឡើង។ ជាមួយគ្នានេះ នៅពេលប្រជាជនក្តៅខ្លួន គាត់ឆាប់មករកពេទ្យ»។
សម្រាប់ឆ្នាំ ២០២២ នេះវិញ លោក លាង ឫទ្ធា បានមើលឃើញថា ជំងឺគ្រុនឈាមនេះ គឺនឹងនៅតែមានការថមថយបន្ថែមទៀត ដោយលោកសំអាងលើកត្តារួមផ្សំ ព្រោះឆ្នាំ ២០២២ គឺមិនមែនជាឆ្នាំនៃការផ្ទុះជំងឺនេះនោះទេ ហើយការចូលរួមរបស់ប្រជាជន និងការដាក់ចេញវិធានការរបស់រដ្ឋាភិបាល ក៏បានទាន់ពេលផងដែរ។
លោកបញ្ជាក់ថា៖ «សម្រាប់ឆ្នាំ ២០២២ នេះយើងនៅតែធ្វើការតាមផែនការជាតិដូចតែរាល់ឆ្នាំអ៊ីចឹង ដោយមានការចុះអប់រំផ្សព្វផ្សាយនៅតាមសហគមន៍ ឱ្យគាត់មានការយល់ដឹង ឬមានការក្តៅខ្លួន ប្រញាប់យកមកមន្ទីរពេទ្យ។ យើងនឹងបន្តបណ្តុះបណ្តាលទាំងពេទ្យរដ្ឋ និងពេទ្យឯកជនចំនួន ២ ដងធំនៅក្នុងរដូវប្រាំង និងរដូវវស្សា»។
បើតាមលោក លាង ឫទ្ធា ក្នុងឆ្នាំ ២០២២នេះ កម្មវិធីជាតិប្រយុទ្ធនឹងជំងឺគ្រុនឈាម បានត្រៀមថ្នាំអាល់ប៊ែតជាង ២០០ តោន និងថ្នាំបាញ់សម្លាប់មូស ប្រមាណ ៧ ០០០ លីត្រ និងសម្ភារផ្សេងៗមួយចំនួន ដើម្បីចែកចាយនៅតាមគោលដៅទូទាំងប្រទេស។
លោក គួយ ប៊ុនធឿន ប្រធានមន្ទីរសុខាភិបាលខេត្តកណ្តាល បានប្រាប់ភ្នំពេញប៉ុស្តិ៍ថា ដោយសារតែឆ្នាំនេះ មិនមែនជាឆ្នាំដែលផ្ទុះនូវជំងឺគ្រុនឈាម ដូច្នេះការឆ្លងក៏មានតួលេខតិចទៅតាមហ្នឹងដែរ តែគ្រាន់តែខេត្តកណ្តាល ជាខេត្តដែលមានប្រជាជនច្រើន ដែលជាហេតុធ្វើឱ្យតួលេខមើលទៅដូចជាច្រើនជាងបណ្តាខេត្តផ្សេងៗ។
យ៉ាងណាក្តី លោកលើកឡើងថា ក្នុងឆ្នាំ ២០២១ ចំនួននៃអ្នកកើតជំងឺគ្រុនឈាមមាន ២១៥ ករណី ហើយមានការធ្លាក់ចុះដល់ ៦ ដង បើប្រៀបធៀបទៅនឹងឆ្នាំ ២០២០ ព្រោះពលរដ្ឋមានការយល់ដឹងកាន់តែខ្ពស់ ចំពោះការការពារខ្លួនពីជំងឺគ្រុនឈាមនេះ។
លោកបញ្ជាក់ថា៖ «ឆ្នាំនេះ គឺតិចជាងឆ្នាំទៅយើងអាចគ្រប់គ្រងស្ថានការណ៍បានក្នុងពេលនេះ តាមរយៈការចុះអប់រំផ្សព្វផ្សាយ និងការចែកចាយថ្នាំអាល់ប៊ែតជូនប្រជាពលរដ្ឋ។ យើងបន្តធ្វើបន្តទៅទៀត ទោះជាតួលេខអ្នកឈឺមានចំនួនតិចក៏ដោយ»។
លោក គួយ ប៊ុនធឿន រំពឹងថា តាមរយៈវិធានការទាំងថ្នាក់ជាតិ និងថ្នាក់ក្រោមជាតិ អត្រាអ្នកឆ្លងជំងឺគ្រុនឈាម ក្នុងឆ្នាំ ២០២២ នេះ គឺកាន់តែធ្លាក់ចុះ ប៉ុន្តែការធ្លាក់ចុះក៏ទាមទារឱ្យពលរដ្ឋ មានការប្រុងប្រយ័ត្ន ការពារខ្លួនពីជំងឺនេះ ដោយកុំមានធ្វេសប្រហែសឱ្យសោះ ជាពិសេសនៅក្នុងរដូវវស្សា។
សូមជម្រាបថា កាលពីឆ្នាំ ២០១៩ កម្ពុជាមានអ្នកស្លាប់ ដោយសារជំងឺគ្រុនឈាមដល់ទៅជិត ៥០ នាក់ ក្នុងចំណោមអ្នកជំងឺគ្រុនឈាមចំនួន ជិត ៧ ម៉ឺនករណី ដែលលោក លាង ឫទ្ធា បានបញ្ជាក់ថា ការកើនឡើងនៃជំងឺគ្រុនឈាមនៅក្នុងឆ្នាំ ២០១៩ នេះ ក៏ជាការកើនឡើងនៅក្នុងរយៈពេល ៥ ឆ្នាំម្តងនៃជំងឺគ្រុនឈាម ដែលតែងតែមានការផ្ទុះនៃជំងឺនេះខ្លាំង ដែលទាមទារឱ្យមានការប្រុងប្រយ័ត្នខ្ពស់៕