The Phnom Penh Post Search

Search form




Logo of Phnom Penh Post newspaper Phnom Penh Post - អង្គការ​ភ្លែន​អន្ដរជាតិ​កម្ពុជា​គ្រោង​បណ្ដុះ​ជំនាញ​ដល់​យុវជន​បោះបង់​ការសិក្សា​ឱ្យបាន ​២៥០ ​នាក់​នៅ​ឆ្នាំនេះ

អង្គការ​ភ្លែន​អន្ដរជាតិ​កម្ពុជា​គ្រោង​បណ្ដុះ​ជំនាញ​ដល់​យុវជន​បោះបង់​ការសិក្សា​ឱ្យបាន ​២៥០ ​នាក់​នៅ​ឆ្នាំនេះ

Content image - Phnom Penh Post
ពិធី​បិទ​វគ្គ​បណ្ដុះបណ្ដាល​នៅ​ខេត្តរតនគិរី​ពីថ្ងៃ​ទី​ ៣ មករា ឆ្នាំនេះ​។ រូបថត អង្គការ​ភ្លែន​អន្តរជាតិ

អង្គការ​ភ្លែន​អន្ដរជាតិ​កម្ពុជា​គ្រោង​បណ្ដុះ​ជំនាញ​ដល់​យុវជន​បោះបង់​ការសិក្សា​ឱ្យបាន ​២៥០ ​នាក់​នៅ​ឆ្នាំនេះ

ភ្នំពេញៈ អង្គការ​ភ្លែន​អន្តរជាតិ​កម្ពុជា​គ្រោង​បណ្ដុះបណ្តាល​ជំនាញ​វិជ្ជាជីវៈ​ដល់​យុវជន​ដែល​បោះបង់​ការងារ​សិក្សា​ឱ្យបាន​ ២៥០ ​នាក់​នៅ​​ឆ្នាំនេះ​ តាមរយៈ​កិច្ចសហការ​ជាមួយ​ក្រសួង​ការងារ និង​បណ្តុះបណ្តាល​វិជ្ជាជីវៈ និង​ស្ថាប័ន​ពាក់ព័ន្ធ បន្ទាប់ពី​ជួយ​បណ្ដុះបណ្ដាល​បាន​ ២០០ ​នាក់​ក្នុងនោះ​មាន​ស្ត្រី​ចំនួន​ ១១៣ ​នាក់ នៅ​ខេត្ដ​សៀមរាប និង​ខេត្ដ​រតនគិរី កាលពី​ឆ្នាំមុន​។

លោក​ យី គីមថាន នាយករង​ប្រចាំ​ប្រទេស​ផ្នែក​កម្មវិធី​នៃ​អង្គការ​ភ្លែន​អន្តរជាតិ​កម្ពុជា​ថ្លែងប្រាប់​ភ្នំពេញ​ប៉ុស្ដិ៍ នៅ​ថ្ងៃទី​ ៤ មករា ឆ្នាំនេះ​ថា កាលពី​ឆ្នាំ​ ២០២១ អង្គការ​ភ្លែន​អន្តរជាតិ​កម្ពុជា បាន​បណ្តុះបណ្តាល​យុវជន​ដែល​បោះបង់​ការសិក្សា​ (​អាយុ​ពី​ ១៥ ដល់ ២៤ ​ឆ្នាំ​) ​ចំនួន ២០០ ​នាក់ ក្នុងនោះ​ស្ត្រី​ចំនួន​ ១១៣ ​នាក់ (​សៀមរាប ១០០ ​នាក់ រតនគិរី ១០០​ នាក់​)​។

លោក​បានឱ្យដឹងថា អង្គការ​ភ្លែន​អន្តរជាតិ​កម្ពុជា​បាន និង​កំពុង​សហការ​ជាមួយ​ក្រសួង​ការងារ និង​បណ្តុះបណ្តាល​វិជ្ជាជីវៈ តាមរយៈ​អគ្គនាយកដ្ឋាន​អប់រំ និង​បណ្តុះបណ្តាល​បច្ចេក​ទេស និង​វិជ្ជាជីវៈ អភិវឌ្ឍន៍ និង​កែលម្អ​កញ្ចប់​ស្តង់ដា​បណ្តុះ​បណ្តាល វគ្គ​ខ្លី​សម្រាប់​មុខរបរ​ចំនួន​ ៥ ​គឺ អ៊ុតសក់ និង​សម្អាងការ កាត់ដេរ កាត់សក់​បុរស ធ្វើ​នំ និង​ជួសជុល​ម៉ាស៊ីន​ខ្នាតតូច និង អភិវឌ្ឍ​កញ្ចប់​មេរៀន​ឌីជីថល សម្រាប់​ជំនាញ​សហគ្រិនភាព និង​ជំនាញ​ទន់​ផងដែរ​។

លោក​ថ្លែងថា​៖ «​សិក្ខាកាម​ដែល​ចូលរួម​វគ្គ​បណ្តុះបណ្តាល​ជំនាញ​កាត់ដេរ​សម្លៀកបំពាក់​ចំនួន​ ១៩ ​នាក់​ (​ស្រី​) ​និង​អ៊ុតសក់ សម្អាងការ​មាន​ចំនួន ៧៤ ​នាក់​ (​ស្ត្រី​)»​។

លោក យី គីមថាន បានឱ្យដឹងថា នៅ​ឆ្នាំ​ ២០២២ នេះ អង្គការ​ភ្លែន​អន្តរជាតិ​កម្ពុជា​នឹង​បង្កើន​ចំនួន​យុវជន​ចូលរួម​វគ្គ​បណ្តុះបណ្តាល​ចំនួន​ ២៥០ ​នាក់​បន្ថែមទៀត ក្នុងនោះ​មាន​ស្ដ្រី​ចំនួន​ ១៣០​ នាក់ ​(​នៅ​ខេត្ដ​សៀមរាប​ ១២០ និង​នៅ​ខេត្ដ​រតនគិរី ចំនួន​ ១៣០ ​នាក់ )​។

លោក​ថ្លែងថា​៖ «​យើង​នឹង​បង្កើត​គម្រោង​បណ្តុះបណ្តាល​វិជ្ជាជីវៈ​ថ្មី​មួយទៀត​នៅ​ខេត្តស្ទឹងត្រែង និង​បន្ត​ការសហការ​ជាមួយ​ក្រសួង​ការងារ និង​បណ្តុះបណ្តាល​វិជ្ជាជីវៈ​ ដើម្បី​បង្កើត​ប្រព័ន្ធគ្រប់គ្រង​ទិន្នន័យ​សេវាកម្ម​បណ្តុះបណ្តាល​ដោយ​ប្រើ​ប្រព័ន្ធ​ឌីជីថល​»​។

កាលពី​ថ្ងៃទី​ ៣ ខែមករា ឆ្នាំនេះ មន្ទីរ​កិច្ចការនារី​ខេត្តរតនគិរី​បានរៀបចំ​ពិធី​បិទ​វគ្គ​បណ្ដុះបណ្ដាល​ជំនាញ​វិជ្ជាជីវៈ «​កាត់ដេរ​សម្លៀកបំពាក់ និង​អ៊ុតសក់ សម្អាងការ ឆ្នាំ​ ២០២១» ដោយមាន​ការឧបត្ថម្ភ​គាំទ្រ​ពី​រាជរដ្ឋាភិបាល និង​អង្គការ​ភ្លែន​ប្រចាំខេត្ត​នេះ​ដែល​ប្រព្រឹត្ត​ទៅ​នៅ​មជ្ឈមណ្ឌល​ស្ត្រី​ក្នុង​កិច្ចអភិវឌ្ឍន៍​។​ អង្គការ​ភ្លែន​បានឱ្យដឹងថា​តាមរយៈ​ការបណ្តុះបណ្តាល​នេះ អ្នក​ចូលរួម​ទទួលបាន​ចំណេះដឹង និង​ជំនាញ​ដើម្បី​បង្កើន​ចំណូល​គ្រួសារ​។

លោក គិត ទ្រី អភិបាលរង​ខេត្ដ​រតនគីរី លើកឡើងថា អង្គការ​ភ្លែន​អន្តរជាតិ​កម្ពុជា​បាន​លើក​ទិសដៅ​រយៈពេល ៥ ​ឆ្នាំ​បន្ត ​(២០២១-២០២៦) ​ដើម្បី​ឆ្លើយតប​នឹង​តម្រូវការ​របស់​កុមារា កុមារី យុវជន យុវតី និង​គ្រួសារ​ដែល​ងាយ​រងគ្រោះ​ក្នុងស្រុក​គោលដៅ​ឱ្យ​​មានការ​ផ្លាស់ប្ដូរ ប្រែជា​វិជ្ជមាន​។

លោក​បាន​បន្តថា ការ​អនុវត្ដ​ទិសដៅ​បន្ត​នេះ គឺ​តាមរយៈ​ការទទួល​នូវ​សេវា​អប់រំ​តាំងពី​ថ្នាក់​មត្តេយ្យ​ដល់​វិទ្យាល័យ ការទទួលបាន​សេវា​សុខភាព អាហារូបត្ថម្ភ ទទួលបាន​ទឹកស្អាត និង​អនាម័យ​របស់​ប្រជាពលរដ្ឋ និង​កុមារ​ដែល​ងាយ​រងគ្រោះ និង​ការផ្តល់​ជំនាញ​វិជ្ជាជីវៈ​ដល់​យុវជន​ដែល​បោះបង់​ការសិក្សា​ ដើម្បី​ទទួលបាន​ការងារ​សម​រម្យ​ជាដើម​។ ​លោក​ថា​៖ «​សកម្មភាព​ទាំងនេះ​វា​ឆ្លើយតប​ទាំងស្រុង​ទៅនឹង​គោលនយោបាយ​អភិវឌ្ឍន៍​របស់​រាជរដ្ឋាភិបាល​កម្ពុជា​»​។

លោក យង់ សុវឌ្ឍនា អភិបាលរង​ខេត្តស្ទឹងត្រែង​បាន​ថ្លែងអំណរគុណ​អង្គការ​ភ្លែន​អន្តរជាតិ​កម្ពុជា ដែល​តែង​សហការ​ល្អជា​មួយ​រដ្ឋបាល​ខេត្ត និង​មន្ទីរ​នានា​ក្នុង​ខេត្ដ ​ដើម្បី​លើកស្ទួយ​ជីវភាព​របស់​ប្រជាពលរដ្ឋ​។

លោក​ថ្លែងថា​៖ «​អង្គការ​ភ្លែន​អន្តរជាតិ​កម្ពុជា​លើកស្ទួយ​ជីវភាព​របស់​ប្រជាពលរដ្ឋ​យើង​ឱ្យមាន​លក្ខណៈ​ប្រសើរ​ឡើង​តាមរយៈ​ការផ្តល់​សេវាកម្ម​នានា​ដែល​ប្រជាពលរដ្ឋ​កំពុង​ជួប​ប្រទះ​។​ អង្គការ​ភ្លែ​ន​តែងតែ​ជួយ​ដោះស្រាយ​នូវ​បញ្ហា​នានា​ដូចជា​ការឆ្លើយតប​គ្រោះទឹកជំនន់ បញ្ហា​អនាម័យ ការអប់រំ និង​សុខភាព​ស្រី និង​កុមារ​នៅតាម​តំបន់​ដាច់ស្រយាល​»៕

អត្ថបទគួរចាប់អារម្មណ៍