បាត់ដំបងៈ តំណាងអយ្យការអមសាលាដំបូងខេត្តនៅថ្ងៃទី ៤ មករា បានចោទប្រកាន់បុរសម្នាក់ ក្នុងចំណោមបក្ខពួក ៣ នាក់ ពីបទឃាតកម្មពាក់ព័ន្ធនឹងករណីកាប់យុវជនម្នាក់ដាច់កស្លាប់នៅក្នុងមណ្ឌលធ្វើចត្តាឡីស័កក្នុងភូមិអូរល្វា ឃុំជ្រៃសីមា ស្រុកសំពៅលូនកាលពីយប់ថ្ងៃទី ១ មករា ឆ្នាំ ២០២២។
លោក ដួង សាវ៉ន អ្នកនាំពាក្យអយ្យការអមសាលាដំបូងខេត្តបាត់ដំបងឱ្យដឹងនៅថ្ងៃទី ៤ មករាថា ជនឈ្មោះ ម៉ៅ ស៊ីណា អាយុ ២៩ ឆ្នាំ ត្រូវបានតំណាងអយ្យការអមសាលាដំបូងខេត្តបាត់ដំបងចោទប្រកាន់ រួចបានបញ្ជូនទៅចៅក្រមស៊ើបសួរហើយ។
លោកបានថ្លែងថា៖ «ករណីនេះ តំណាងអយ្យការបានចោទប្រកាន់ពីបទឃាតកម្មតាមមាត្រា ១៩៩ នៃក្រមព្រហ្មទណ្ឌ។ គាត់ត្រូវបានបញ្ជូនទៅចៅក្រមស៊ើបសួរ ដើម្បីបន្តនីតិវិធី»។
ទាក់ទងនឹងករណីនេះ លោក ទឹម វិឆ័យ អធិការនគរបាលស្រុកសំពៅលូនធ្លាប់បានប្រាប់កាលពីថ្ងៃទី ២ មករាថា ក្រុមជនសង្ស័យមានគ្នា ៣ នាក់ ជាពលករមកពីប្រទេសថៃ។ រីឯជនរងគ្រោះ ឈ្មោះ ជេ ជាក់ អាយុ ២៣ ឆ្នាំ រស់នៅភូមិស្វាយខ្មៅ ឃុំពន្លៃ ស្រុកភ្នំស្រុក ខេត្តបន្ទាយមានជ័យ ក៏ជាពលករត្រឡប់មកពីប្រទេសថៃដែរ។
លោកបន្តថា ទាំងក្រុមជនសង្ស័យ និងជនរងគ្រោះត្រូវបានអាជ្ញាធរស្រុកសំពៅលូនយកទៅមណ្ឌលចត្តាឡីស័ក កាលពីថ្ងៃទី ២៥ ធ្នូ ឆ្នាំ ២០២១។ លុះដល់ម៉ោងជាង ៩ យប់ ថ្ងៃទី ១ មករា ឆ្នាំ ២០២២ ក្រុមជនសង្ស័យ និងជនរងគ្រោះបានឈ្លោះប្រកែកគ្នា ប៉ុន្តែត្រូវបានគេឃាត់បញ្ចប់ជម្លោះម្តងហើយ។ លុះប្រហែលជា ១៥ នាទី ក្រោយមកក្រុមជនសង្ស័យបានទៅយកដាវសាមូរ៉ៃកាប់ទៅលើជនរងគ្រោះបណ្តាលឱ្យដាច់កស្លាប់នៅកន្លែងកើតហេតុហើយនាំគ្នារត់គេចខ្លួន ក៏ប៉ុន្តែប៉ុន្មានម៉ោងក្រោយមកសមត្ថកិច្ចបានស្រាវជ្រាវចាប់ខ្លួនបានម្នាក់វិញ៕