ភ្នំពេញៈ លោកនាយករដ្ឋមន្រ្ដី ហ៊ុន សែន បញ្ជាក់ថា ការបើកបវេសនកាលសម្រាប់គ្រឹះស្ថានមត្ដេយ្យសិក្សា និងសេវាអប់រំកុមារតូច នឹងបើកដំណើរការ នៅថ្ងៃទី ១០ មករា ជាផ្លូវការនៅទូទាំងប្រទេស ហើយលោកក៏បានអនុញ្ញាតតាមសំណើរបស់លោក ហង់ជួន ណារ៉ុន រដ្ឋមន្រ្ដីក្រសួងអប់រំ យុវជន និងកីឡា ឱ្យកុមារតូចមានអាយុពី៣ឆ្នាំទៅ៥ឆ្នាំចូលរៀនវិញផងដែរ។
លោកនាយករដ្ឋមន្ដ្រីថ្លែងនៅថ្ងៃទី ៥ ខែ មករា ឆ្នាំ ២០២២ ពេលលោកអញ្ជើញជាអធិបតី ក្នុងពិធីប្រគល់ប្រាក់រង្វាន់ជូនកីឡាការិនី អ៊ុក ស្រីមុំ បន្ទាប់ពីដណ្តើមបានមេដាយមាសពិភពលោក ពីការប្រកួតប៉េតង់ នៅទីក្រុងសាន់តាស៊ូសាណា ប្រទេសអេស្ប៉ាញ កាលពីខែវិច្ឆិកា ឆ្នាំ ២០២១។
លោកបានថ្លែងថា៖ «ខ្ញុំបានអានសារបើកដំណើរការគ្រឹះស្ថានសិក្សា នៅថ្ងៃទី ១០ ខែមករានេះ នឹងបើកបវេសនកាលឆ្នាំសិក្សាថ្មី ២០២១-២០២២។ ក្នុងពេលជាមួយគ្នា ខ្ញុំក៏បានអនុញ្ញាត តាមសំណើ របស់ឯកឧត្ដម ហង់ជួន ណារ៉ុន រដ្ឋមន្រ្ដី ក្រសួងអប់រំ យុវជន និងកីឡា យើងក៏បើកមត្ដេយ្យឡើងវិញ ដែលមានអាយុពី ៣ ឆ្នាំ ទៅ ៥ ឆ្នាំ»។
លោកបញ្ជាក់ថា៖ «វាសមល្មមដើម្បីយើងបើកហើយ ដោយសារវ៉ាក់សាំងបានស្រោច។ ស្ថានភាពមុនខ្ញុំថាឱ្យមានការប្រុងប្រយ័ត្ន កុំទាន់លេង ប៉ុន្ដែឥឡូវយើងបានសង្កេតឃើញថា ការឆ្លងនៅក្នុងសហគមន៍វាថយ ដោយសារវ៉ាក់សាំងរបស់យើងស្រោចរាប់ទាំងក្មេងអាយុ ៥ ឆ្នាំ ដែលនៅក្នុងមត្តេយ្យនេះដែរ។ អ៊ីចឹង អា ៣ ឆ្នាំ អា ៤ ឆ្នាំ វាទើបតែបានចាក់វ៉ាក់សាំង អាវ៉ាក់សាំងការពារជំងឺស្អីៗ ដូច្នេះកម្រិតនៃការឆ្លងគឺវាតិចតួច»៕