ព្រះសីហនុៈ បុរស ២ នាក់រងរបួសធ្ងន់ និងស្រាល និងមនុស្ស ១០ នាក់ត្រូវបានសង្គ្រោះផុតពីគ្រោះថ្នាក់ ក្នុងករណីគ្រោះថ្នាក់ ២ ផ្សេងគ្នា ក្នុងលម្ហសមុទ្រក្រុងកោះរ៉ុង ខេត្តព្រះសីហនុ។ នេះបើតាមមន្ត្រីនគរបាលមូលដ្ឋាន។
លោក វិត សុភ័ក្តិ នាយនគរបាលសង្កាត់កោះរ៉ុងសន្លឹម បានប្រាប់ ភ្នំពេញ ប៉ុស្តិ៍ នៅថ្ងៃទី ៤ ខែមករា ឆ្នាំ ២០២២ ថា កាលពីព្រឹកថ្ងៃទី ៣ ខែមករា ឆ្នាំ ២០២២ មានករណីគ្រោះថ្នាក់ក្នុងលម្ហសមុទ្រចំនួន ២ ផ្សេងគ្នា រួមមានករណីផ្ទុះឆេះម៉ូតូទឹក ១ គ្រឿង និងករណីលិចទូកដឹកអ្នកដំណើរ ១ គ្រឿង បណ្ដាលឱ្យបុរស ២ នាក់រងរបួស។ យុវជន ២ នាក់ដែលរងរបួសនោះ រួមមានឈ្មោះ សុខ លីហួ អាយុ ១៩ ឆ្នាំ និង ម្នាក់ទៀត ឈ្មោះ ហ៊ុត វណ្ណៈ អាយុ ២៥ ឆ្នាំ ពួកគេទាំង ២ ជាអ្នកធ្វើដំណើរតាមម៉ូតូទឹកពីក្រុងព្រះសីហនុ ទៅកោះរ៉ុងសន្លឹម។
យោងតាមរបាយការណ៍របស់ស្នងការដ្ឋាននគរបាលខេត្តព្រះសីហនុ ករណីផ្ទុះឆេះម៉ូតូទឹក ដែលបង្កឱ្យមានជនរងគ្រោះទាំង ២ នេះ គឺបណ្ដាលមកពីការផ្ទុះឆ្លងចរន្តភ្លើង នៅក្នុងប្រអប់ម៉ាស៊ីន។ បច្ចុប្បន្ន យុវជនរងគ្រោះទាំង ២ កំពុងសម្រាកព្យាបាលនៅគ្លីនិកឯកទេសមង្គល ក្នុងក្រុងព្រះសីហនុ បន្ទាប់ពីពួកគេត្រូវបានជួយសង្គ្រោះ ដោយក្រុមនាវិកនៃក្រុមហ៊ុន GVTC របស់លោកឧកញ៉ា ទៀ វិចិត្រ។
លោក សុភ័ក្តិ ថ្លែងថា ក្រោយពីមានករណីផ្ទុះឆេះម៉ូតូទឹក មិនបានប៉ុន្មាននាទីផង ក៏មានការទូរស័ព្ទស្នើសុំការជួយអន្តរាគមន៍បន្ទាន់ ពីក្រុមនាវិកដឹកអ្នកដំណើរ ១ គ្រឿង ពីកោះរ៉ុងសន្លឹម ទៅក្រុងព្រះសីហនុ ដោយប្រាប់ថា នាវារបស់ពួកគេ កំពុងរងការធ្លុះធ្លាយ ដោយរលកសមុទ្រធំៗ បោកផ្ទប់នៅក្បែរប្រជុំកោះដែកគោល ហើយនៅលើនាវារបស់ពួកគេមានអ្នកដំណើរចំនួន ១០ នាក់ រួមទាំងក្មេងចំនួន ៣ នាក់ផងដែរ។ អ្នកដំណើរទាំងអស់មានសុវត្ថិភាព៕