ភ្នំពេញៈ លោកនាយករដ្ឋមន្ដ្រី ហ៊ុន សែន បញ្ជាក់ថា នៅថ្ងៃបើកបវេសនកាលគ្រឹះស្ថានមត្ដេយ្យសិក្សា និងសេវាអប់រំកុមារតូចនាថ្ងៃទី ១០ មករា ឆ្នាំ ២០២២ ជាផ្លូវការនៅទូទាំងប្រទេស លោកក៏បានអនុញ្ញាតតាមសំណើរបស់លោក ហង់ជួន ណារ៉ុន រដ្ឋមន្ដ្រីក្រសួងអប់រំ យុវជន និងកីឡាឱ្យកុមារតូចមានអាយុពី ៣ ឆ្នាំទៅ ៥ ឆ្នាំចូលរៀនវិញផងដែរ។
លោកនាយករដ្ឋមន្ដ្រីថ្លែងបែបនេះ នៅថ្ងៃទី ៥ មករា ពេលលោកអញ្ជើញជាអធិបតី ក្នុងពិធីប្រគល់ប្រាក់រង្វាន់ជូនកីឡាការិនី អ៊ុក ស្រីមុំ បន្ទាប់ពីដណ្តើមបានមេដាយមាសពិភពលោកពីការប្រកួតប៉េតង់នៅទីក្រុងសាន់តាស៊ូសាណា ប្រទេសអេស្ប៉ាញ ពីខែវិច្ឆិកា ឆ្នាំ ២០២១។
លោកថ្លែងថា៖ «ខ្ញុំបានអានសារ បើកដំណើរការគ្រឹះស្ថានសិក្សា នៅថ្ងៃទី ១០ ខែមករានេះ នឹងបើកបវេសនកាលឆ្នាំសិក្សាថ្មី ២០២១-២០២២។ ក្នុងពេលជាមួយគ្នាខ្ញុំក៏បានអនុញ្ញាតតាមសំណើរបស់ឯកឧត្ដម ហង់ជួន ណារ៉ុន រដ្ឋមន្ដ្រីក្រសួងអប់រំ យុវជននិងកីឡា យើង ក៏បើកមត្ដេយ្យឡើងវិញ ដែលមានអាយុពី ៣ ឆ្នាំទៅ ៥ ឆ្នាំ»។
លោកបញ្ជាក់ថា៖ «វាសមល្មមដើម្បីយើងបើកហើយ ដោយសារវ៉ាក់សាំងបានស្រោច។ ស្ថានភាពមុនខ្ញុំថាឱ្យមានការប្រុងប្រយ័ត្នកុំទាន់លេង ប៉ុន្ដែឥឡូវយើងបាន-សង្កេតឃើញថា ការឆ្លងនៅក្នុងសហគមន៍វាថយ ដោយសារវ៉ាក់សាំងរបស់យើងស្រោចរាប់ទាំងក្មេងអាយុ ៥ ឆ្នាំដែលនៅក្នុងមត្តេយ្យនេះដែរ។ អ៊ីចឹងអា ៣ ឆ្នាំ អា ៤ ឆ្នាំ [កុមារតូច] វាទើបតែបានចាក់វ៉ាក់សាំង អាវ៉ាក់សាំងការពារជំងឺស្អីៗដូច្នេះកម្រិតនៃការឆ្លងគឺតិចតួច»។
លោកនាយករដ្ឋមន្ដ្រីថ្លែងថា ការបើកបវេសនកាលចូលរៀនវិញរបស់កុមារតូចនេះជួយសម្រាលបន្ទុកដល់មាតាបិតា អ្នកអាណាព្យាបាលដែលលំបាកក្នុងការគ្រប់គ្រងកូនចៅ ក្នុងពេលវេលាដែលគាត់ត្រូវទៅធ្វើការយកកូនចៅ ទៅដាក់នៅមត្តេយ្យ ដើម្បីឱ្យពួកគេបានរៀនផង ហើយបានទទួលនូវការថែទាំនៅកន្លែងនោះផង។
លោកបញ្ជាក់ថា៖ «នេះជាការជូនដំណឹងមួយសម្រាប់ប្រជាពលរដ្ឋទូទៅរបស់យើង អំពីការបើកសាលារៀន។ ចៅៗទាំងឡាយដែល ត្រៀមចូលសាលា ថ្ងៃទី ១០ មករានេះ ថ្ងៃនេះថ្ងៃទី ៥មករា ហើយសល់ តែ ៥ថ្ងៃទៀតទេ គឺចាប់ផ្ដើមចូលសាលា ក្នុងនោះរាប់ទាំងចៅៗតូចៗ ដែលត្រូវចូលមត្តេយ្យផងដែរ»។
បើតាមលោកនាយករដ្ឋមន្ដ្រី ឪពុកម្ដាយមួយចំនួននៅទូទាំងប្រទេសប្រហែលជាមកដល់ពេលនេះ ដោយសារតែធ្វើសកម្មភាពរហ័សពេកមិនទាន់ដឹងថាថ្ងៃបើកបវេសនកាលនៅថ្ងៃទី ១០ មករានេះទេ។ ដូច្នេះលោកបញ្ជាក់ថា នៅថ្ងៃទី ១០ មករា គឺជាថ្ងៃបើកបវេសនកាលឆ្នាំសិក្សាថ្មី ២០២១-២០២២ ជាមួយនឹងការបើកមត្តេយ្យសិក្សាដែលមានអាយុ ៣ ទៅ ៥ ឆ្នាំ។
លោក ហ៊ុន សែន ក៏បានស្នើឱ្យមានការប្រុងប្រយ័ត្នខ្ពស់ចំពោះមេរោគកូវីដ ១៩ បំប្លែងថ្មីប្រភេទអូមីក្រុងផងដែរ។ លោកថា ជួនកាលនៅផ្ទះក្នុងគ្រួសារបានចម្លងទៅកូន ហើយកូនបានទៅមត្តេយ្យ ដែលអាចនាំមេរោគនេះជាភ្នាក់ងារ ចម្លងទៅសាលារៀនផងដែរ។
លោកថ្លែងថា៖ «ឪពុក ឬម្ដាយដែលកើតអូមីក្រុងត្រូវទៅព្យាបាលនៅពេទ្យ ដើម្បីកុំឱ្យឆ្លងទៅកូន ហើយកូនឆ្លងទៅសាលារៀន។ មិនគ្រាន់តែមត្តេយ្យទេ សាលាទូទៅក៏វាបង្កើតដែរ ព្រោះសិស្សរបស់យើងប្រមាណជាង ៣ លាននាក់ដែលត្រូវរៀន»។
មន្ទីរអប់រំរាជធានីខេត្ត គ្រឹះស្ថានមត្តេយ្យសិក្សា ព្រមទាំងអ្នកផ្តល់សេវាអប់រំកុមារតូចទាំងអស់ ត្រូវចាប់ផ្តើមបើកដំណើរការគ្រឹះស្ថានមត្ដេយ្យសិក្សា និងសេវាអប់រំកុមារតូចពីថ្ងៃទី ១០ មករា ឆ្នាំ ២០២២ ជាផ្លូវការនៅទូទាំងប្រទេស និងបញ្ចប់វិញនៅថ្ងៃទី ៣១ តុលា ឆ្នាំ ២០២២។ នេះបើតាមសេចក្ដីណែនាំពីថ្ងៃទី ២០ ខែធ្នូ ឆ្នាំ ២០២១។
តាមសេចក្ដីណែនាំរបស់ក្រសួង-អប់រំ ឆ្នាំសិក្សាថ្មី ២០២១-២០២២ នេះ ដំណើរការនៃការអប់រំកុមារតូចនៅតែផ្តោតសំខាន់លើការអភិវឌ្ឍផ្នែកទាំង ៥ គឺ សុខភាពរាងកាយ ភាសា បញ្ញា ការគិតសង្គម និងអារម្មណ៍ និងការអភិវឌ្ឍសីលធម៌ និងវប្បធម៌ដោយផ្អែកលើមុខវិជ្ជា ចិត្តចលភាព វិទ្យាសាស្ត្រ សិក្សាសង្គម បុរេគណិត និងភាសាខ្មែរ។
កាលបរិច្ឆេទនៃការបើកបវេសនកាលត្រូវបានកំណត់យកថ្ងៃទី ១០ មករា ឆ្នាំ ២០២២ ជាកាលបរិច្ឆេទសម្រាប់ប្រារព្ធពិធីបើកបវេសនកាលឆ្នាំសិក្សា ២០២១-២០២២។ ឯការប្រព្រឹត្តទៅនៃវិស្សមកាលសម្រាប់កាលបរិច្ឆេទវិស្សមកាលតូច គឺចាប់ពីថ្ងៃទី ៦ ដល់ថ្ងៃទី ១៩ មេសា ឆ្នាំ ២០២២។ កាលបរិច្ឆេទមហាវិស្សមកាល ចាប់ពីថ្ងៃទី ១ ខែវិច្ឆិកា ដល់ថ្ងៃទី ៣០ ខែវិច្ឆិកា ឆ្នាំ ២០២២។
បើតាមសេចក្ដីណែនាំ គណៈគ្រប់គ្រងគ្រប់គ្រឹះស្ថានមត្តេយ្យសិក្សាសាធារណៈ មត្តេយ្យសិក្សាសហគមន៍ និងអ្នកផ្តល់សេវាអប់រំកុមារតូចទាំងអស់ ត្រូវពិនិត្យលទ្ធភាពក្នុងការរៀបចំប្រារព្ធពិធីបើកជាទ្រង់ទ្រាយធំ មធ្យម ឬតូច តាមជាក់ស្ដែង។ កំណត់ជ្រើសរើស ទីតាំងប្រមូលផ្តុំគ្រឹះស្ថានមត្តេយ្យសិក្សាសាធារណៈ មត្តេយ្យសិក្សាសហគមន៍ និងទីកន្លែងផ្តល់សេវាអប់រំកុមារតូចទាំងអស់ ក្នុងមូលដ្ឋានឃុំសង្កាត់នីមួយៗ សម្រាប់រៀបចំប្រារព្ធពិធីបើកជានិមិត្តរូប។
ការរៀបចំប្រារព្ធពិធីគ្រប់រូបភាព ត្រូវគោរពតាមស្តង់ដាអនាម័យ និងរក្សានូវគម្លាតសង្គម ព្រមទាំងគោរពតាមគោលការណ៍ប្រតិបត្តិស្តង់ដា (SOP)។ ថ្នាក់មត្តេយ្យសិក្សារដ្ឋ និងមត្តេយ្យសិក្សាសហគមន៍ស្ថិតក្នុងបរិវេណ និងរចនាសម្ព័ន្ធគ្រប់គ្រងរបស់គ្រឹះស្ថានសិក្សាសាធារណៈណា ត្រូវចូលរួមពិធីបើកបវេសនកាលជាមួយគ្រឹះស្ថានសិក្សាសាធារណៈនោះ។
ក្រសួងណែនាំការប្រព្រឹត្តទៅនៃគ្រឹះស្ថានមត្តេយ្យសិក្សា និងកន្លែងផ្តល់សេវាអប់រំកុមារតូច ពេលដំណើរការឆ្នាំសិក្សា គណៈគ្រប់គ្រង គ្រឹះស្ថានមត្តេយ្យសិក្សា អ្នកផ្តល់សេវាអប់រំកុមារតូចគ្មានសិទ្ធិបិទគ្រឹះស្ថានសិក្សា និងកន្លែងផ្តល់សេវាអប់រំកុមារតូចដោយគ្មានការអនុញ្ញាតពីក្រសួងអប់រំនោះទេ៕
វីដេអូ៖