.jpg)
សមត្ថកិច្ចត្រួតពិនិត្យសាកសពបុរសត្រូវខ្សែភ្លើងឆក់។ រូបថត នគរបាល
ក្រចេះ: បុរស ២ នាក់ត្រូវខ្សែភ្លើងឆក់ស្លាប់ពេលពួកគេឆក់ត្រីក្នុងបឹង ស្ថិតក្នុងសង្កាត់រកាកណ្ដាល ក្រុងក្រចេះ បើទោះបីជាខណ្ឌរដ្ឋបាលជលផល តែងតែធ្វើការអប់រំកុំឱ្យប្រើឧបករណ៍នេសាទឆក់ត្រីខុសច្បាប់ទាំងនេះយ៉ាងណាក៏ដោយ។
លោក គាន ម៉ានិល នាយនគរបាលប៉ុស្តិ៍សង្កាត់រកាកណ្ដាល ប្រាប់ភ្នំពេញប៉ុស្តិ៍ថា ជនរងគ្រោះដែលបានស្លាប់ រួមមានឈ្មោះ ម៉ឺន សារុន អាយុ ៣៦ ឆ្នាំ និងឈ្មោះ ស៊ឹម គង់ អាយុ ២៧ ឆ្នាំ អ្នកទាំង ២ មានទីលំនៅភូមិ ២ សង្កាត់រកាកណ្តាល។ លោកបញ្ជាក់ថា៖ «សពជនរងគ្រោះទាំង ២ បានតោងស្អិតជាប់គ្នា លិចនៅក្នុងទឹកបឹងជម្រៅជាង ១ ម៉ែត្រ ដោយសពរបស់ឈ្មោះ ម៉ឺន សារុន មានកាន់ដងឆក់ដែលមានខ្សែតំណ ១ នៅក្បែរអាគុយ ៧០ វ៉ុល ដែលគាត់បានស្ពាយជាប់ខ្នង»។ ចំណែកសពឈ្មោះ ស៊ឹម គង់ បានតោងជាប់ពីក្រោយខ្នងរបស់ សារុន ដែលបង្ហាញថាគាត់បានព្យាយាមជួយ សារុន នៅពេលមានករណីឆក់ខ្សែភ្លើងពីឧបករណ៍ឆក់ត្រីនោះកើតឡើង។ លោក ម៉ានិល ឱ្យដឹងដែរថា បើតាមការអះអាងរបស់អ្នកស្រី ស៊ឹម សុធី អាយុ ៣៦ ឆ្នាំ ដែលជាបងស្រី ជនរងគ្រោះ ឈ្មោះ គង់ ជនរងគ្រោះទាំង ២ បាននាំគ្នាជិះម៉ូតូ ចេញពីផ្ទះទៅរកឆក់ត្រីនៅតាមមាត់បឹង ក្នុងតំបន់កើតហេតុខាងលើ តាំងពីយប់ថ្ងៃទី ២ ខែមករា។ លុះដល់យប់ថ្ងៃទី ៣ ខែមករា មិនឃើញពួកគេត្រឡប់មកផ្ទះវិញ ក្រុមគ្រួសារបាននាំគ្នាតាមរក ឃើញតែម៉ូតូដែលពួកគេជិះ លាក់ទុកនៅក្នុងព្រៃក៏បានទូរស័ព្ទប្ដឹងសមត្ថកិច្ចឱ្យជួយអន្តរាគមន៍តាមរក។
លោកបញ្ជាក់ថា កម្លាំងសមត្ថកិច្ច និងសាច់ញាតិជនរងគ្រោះបានតាមរក រហូតដល់ព្រឹកថ្ងៃទី ៤ ខែមករា ទើបប្រទះឃើញសពជនរងគ្រោះទាំង ២ នៅក្នុងទឹកបឹងរំលាច ដែលមានចម្ងាយប្រមាណ ១០០ ម៉ែត្រ ពីទីតាំងដែលពួកគេបានលាក់ទុកម៉ូតូ។
បើតាមលោក ម៉ានិល ក្រោយពីនគរបាលជំនាញ បានពិនិត្យសាកសព មិនឃើញមានស្លាកស្នាមអ្វីដែលគួរឱ្យសង្ស័យជាអំពើឃាតកម្មនោះទេ ហើយក៏បានប្រគល់សពជូនសាច់ញាតិនាំយកទៅធ្វើបុណ្យ។
លោក ម៉ុក ពន្លក នាយខណ្ឌជលផលខេត្តក្រចេះបានអំពាវនាវឱ្យពលរដ្ឋទាំងអស់បញ្ឈប់ជាបន្ទាន់នូវការប្រើប្រាស់ឧបករណ៍នេសាទខុសច្បាប់ជាពិសេស ឧបករណ៍ឆក់ត្រី ថ្នាំបំពុល គ្រឿងផ្ទុះ និងលូស្បៃមុង។
លោកថ្លែងថា៖ «ការប្រើប្រាស់ឧបករណ៍ទាំងនេះមិនគ្រាន់តែប្រឈមមុខនឹងការផ្ដន្ទាទោសជាប់ពន្ធនាគារប៉ុណ្ណោះទេ ថែមទាំងបង្កគ្រោះថ្នាក់ដល់អាយុជីវិតខ្លួនឯង និងអ្នកដទៃ ព្រមទាំងធ្វើឱ្យធនធានត្រីធម្មជាតិត្រូវរងគ្រោះបាត់បង់ពូជផងដែរ»។
លោកលើកឡើងថា ដើម្បីធានាដល់និរន្តរភាពធនធានមច្ឆជាតិ សម្រាប់មនុស្សជំនាន់ក្រោយលោកបានចុះត្រួតពិនិត្យនិ ងផ្សព្វផ្សាយអប់រំដល់អាជីវករ នៅតាមទីផ្សារទូទាំងខេត្តក្រចេះ រៀងរាល់ ២ ខែម្ដង អំពីច្បាប់ស្ដីពីជលផល និងអំពាវនាវឱ្យក្រុមអាជីករចូលរួមទាំងអស់គ្នាលុបបំបាត់ ការលក់ដូរឧបករណ៍នេសាទ ដែលច្បាប់បានហាមឃាត់ ដូចជាបញ្ឈប់ការលក់គ្រឿងផ្គុំអគ្គិសនីកែច្នៃសម្រាប់ឆក់ត្រី លបកន្ទុយ១០០ លូស្បៃ-មុង និងបរណរាវ។ បើតាមលោក ពន្លក ក្នុងរយៈពេលពេញ ១ ឆ្នាំ ២០២១ កន្លងទៅនេះ ក្រុមមន្ត្រីខណ្ឌរដ្ឋបាលជលផល ខេត្តក្រចេះ បានរួមសហការជាមួយកម្លាំងបញ្ជាការឯកភាពខេត្ត និង ប្រជាសហគមន៍នេសាទ ស្រុក-ក្រុងនៅទូទាំងខេត្ត ចុះល្បាតស្រាវជ្រាវ និងបង្ក្រាប បទល្មើសនៅតាមបឹង ស្ទឹង ព្រែក ដែលជាដៃទន្លេមេគង្គបានចំនួន ២៤៩ ករណី ដោយបានដកហូត និងបំផ្លាញចោលនូវវត្ថុតាងមួយចំនួនរួមមាន ឧបករណ៍របាំងស្បៃមុង និងសាច់អួនក្រឡាញឹកចំនួន ៤៩១ ខ្សែមានប្រវែងសរុបចំនួន ៤២ ២៦០ ម៉ែត្រ លូស្បៃមុង និងអួនក្រឡាញឹកចំនួន ៣០៨ មាត់ [គ្រឿង] លបកន្ទុយកណ្តុរ ឬលបប្រើស ១០០ ចំនួន ៩៩ ខ្សែ មានប្រវេងសរុប ៥ ២៧០ ម៉ែត្រ បង្គោលឫស្សីឃ្លៃ ចំនួន ៤ ១១៦ ដើម និងដោះលែងកូនត្រី ចំនួន ៣១៥ គីឡូក្រាម។ ក្រៅពីនេះ បានដកហូតវត្ថុតាងនូវទូក និងកាណូតសុប ២ គ្រឿង ទុកជាសម្បត្តិរដ្ឋ និងបានកសាងសំណុំរឿងបញ្ជូនជនសង្ស័យ ១ ករណីទៅតុលាការ។
ដោយឡែក ការល្បាតបង្ក្រាបបទល្មើសក្នុងតំបន់ដែនអភិរក្សមេត្រីពូជ និងអន្លង់ផ្សោត បានចំនួន ៤៥៤ ករណី រឹបអូសវត្ថុតាង មងក្រឡា ៩-១៦ សង់ទីម៉ែត្រ ចំនួន ៧៩២ ត្បូង មានប្រវែងសរុប ចំនួន ៧០ ៤៧៦ ម៉ែត្រ អាគុយ ១០ គ្រឿង អាំងឌុចទ័រ ៩ គ្រឿង និងដងឆក់ដែលភ្ជាប់ខ្សែឆក់ចំនួន ៧ គូ ព្រមទាំងឃាត់ខ្លួនធ្វើការអប់រំណែនាំឱ្យបញ្ឈប់ការនេសាទក្នុងតំបន់ហាមឃាត់សរុប ៩៨ នាក់ ក្នុងនោះ ១៨ នាក់ ត្រូវបានផាកពិន័យអន្តរកាល និង ២ នាក់ទៀត ដែលបានប្រើឧបករណ៍ឆក់ក្នុងដែនជម្រកត្រីមេពូជ ត្រូវបានកសាងសំណុំរឿងបញ្ជូនទៅសាលាដំបូងខេត្ត៕
