The Phnom Penh Post Search

Search form




Logo of Phnom Penh Post newspaper Phnom Penh Post - តុលាការ​កំពូល​បើកសវនាការ​ជម្រះក្ដី​អតីត​ប៉េអឹម​ម្នាក់​បាញ់​មនុស្ស​ស្លាប់ នៅ​ហាង​ម៉ាត​ ១ រាជធានី​ភ្នំពេញ

តុលាការ​កំពូល​បើកសវនាការ​ជម្រះក្ដី​អតីត​ប៉េអឹម​ម្នាក់​បាញ់​មនុស្ស​ស្លាប់ នៅ​ហាង​ម៉ាត​ ១ រាជធានី​ភ្នំពេញ

Content image - Phnom Penh Post
តុលាការ​កំពូល​បើកសវនាការ​ជម្រះក្ដី​អតីត​ប៉េអឹម​ម្នាក់​បាញ់​មនុស្ស​ស្លាប់ នៅ​ហាង​ម៉ាត​ ១ រាជធានី​ភ្នំពេញ។ រូបថត គឹម សារុំ

តុលាការ​កំពូល​បើកសវនាការ​ជម្រះក្ដី​អតីត​ប៉េអឹម​ម្នាក់​បាញ់​មនុស្ស​ស្លាប់ នៅ​ហាង​ម៉ាត​ ១ រាជធានី​ភ្នំពេញ

ភ្នំពេញៈ តុលាការ​កំពូល​នៅ​ថ្ងៃទី ​៥ មករា បាន​បើក​សវនាការ​ជំនុំជម្រះ​អតីតមន្ត្រី​ប៉េអឹម​ខណ្ឌដូនពេញ​ម្នាក់​ករណី​បាញ់​ប្អូនប្រុស​ជីដូនមួយ​របស់​តារា​សម្តែង​នាង​ ខៀវ សុខារ៉ាវី ស្លាប់​នៅក្នុង​ហាង​ម៉ាត​មួយកន្លែង​ក្នុង​ភូមិសាស្ត្រ​ខណ្ឌដូនពេញ​កាលពី​ឆ្នាំ​ ២០១៦​។

ក្នុង​បន្ទប់​សវនាការ​នៅ​ថ្ងៃទី ​៥ មករា ដែលមាន​លោក​ចៅក្រម​ជីវ កេង ជា​ប្រធាន​ក្រុមប្រឹក្សា​ជំនុំជម្រះ​នោះ បុរស​ជាប់ចោទ​ឈ្មោះ​ ផុន ភក្តី អាយុ​ ៣២ ​ឆ្នាំ​បាន​និយាយប្រាប់​ចៅក្រម​ថា​គាត់​ជា​អតីតមន្ត្រី​កងរាជ​អាវុធហត្ថ​ខណ្ឌដូនពេញ​។ ចំពោះ​ការប្តឹង​សារទុក្ខ​មក​តុលាការ​កំពូល​នេះ​គឺ​គាត់​ចង់ឱ្យ​តុលាការ​កំពូល​បន្ថយទោស​ខ្លះ​ដល់​រូបគាត់​។ ជនជាប់ចោទ​ថា​៖ «​ខ្ញុំ​ប្តឹង​មក​តុលាការ​កំពូល​ពេល​នេះ​គ្មាន​បំណង​តវ៉ា​ពាក់ព័ន្ធ​នឹង​ដំណើររឿង​អ្វី​ទេ ប៉ុន្តែ​គ្រាន់តែ​សំណូមពរ​ដល់​តុលាការ​កំពូល​ជួយ​សម្រាលទោស​ដល់​រូបខ្ញុំ​ខ្លះ​តែប៉ុណ្ណោះ​។ ខ្ញុំ​ទទួលស្គាល់​នូវ​អំពើ​ប្រព្រឹត្ត​របស់ខ្ញុំ​ហើយ​»​។

តាម​អង្គហេតុ​របស់​តុលាការ​កំពូល​បង្ហាញថា កាលពី​វេលា​ម៉ោង​ប្រមាណ​ជាង​ ៩​ យប់​ថ្ងៃទី​ ១៣ សីហា ឆ្នាំ​ ២០១៦ ជន​ជាប់ចោទ​បាន​ឈ្លោះ​គ្នា​ជាមួយ​ក្រុម​ជនរងគ្រោះ​ដែលមាន​គ្នា​ពី​ ៥ ​ទៅ​ ៦​ នាក់​ក្នុង​ហាង​ម៉ាត​មួយកន្លែង​នៅក្បែរ​ផ្សារ​រាត្រី ក្នុង​ភូមិសាស្ត្រ​ខណ្ឌ​ដូនពេញ​។ ជនសង្ស័យ​បាន​បាញ់​ជនរងគ្រោះ​ឈ្មោះ ​សឺន ចាន់ដារ័ត្ន ភេទ ប្រុស អាយុ ២៨ ​ឆ្នាំ ដែល​ត្រូវជា​ប្អូនប្រុស​ជីដូនមួយ​របស់​អតីត​តារាសម្តែង​នាង ខៀវ សុខារ៉ាវី ស្លាប់​។ សំណុំ​រឿងនេះ​ត្រូវបាន​សាលាដំបូង​រាជធានី​ភ្នំពេញ​បើកសវនាការ និង​ប្រកាស​សាលក្រម​នៅ​ថ្ងៃទី ​២៩ ឧសភា ឆ្នាំ ​២០១៧ ផ្តន្ទាទោស​ជនជាប់ចោទ​ដាក់ពន្ធនាគារ​ ៧ ​ឆ្នាំ ប៉ុន្តែ​ជនជាប់ចោទ​មិន​សុខ​ចិត្តនឹង​ទណ្ឌកម្ម​ទោស​បាន​ប្តឹង​ទាស់​ទៅ​សាលាឧទ្ធរណ៍​ភ្នំពេញ​ហើយ​ឧទ្ធរណ៍​បាន​បើកសវនាការ និង​ប្រកាស​សាលដីកា​នៅ​ថ្ងៃទី​ ១៦ មីនា ឆ្នាំ​ ២០២១ តម្កល់​ទោស​ ៧ ​ឆ្នាំ​ដដែល​។ ដោយ​មិន​សុខ​ចិត្តនឹង​ទណ្ឌកម្ម​ទណ្ឌ​នេះ​ជនជាប់ចោទ​បាន​ប្តឹង​សារទុក្ខ​មក​តុលាការ​កំពូល​បន្តទៀត​។

លោក​ អ៊ុក គឹមសិទ្ធិ តំណាង​មហាអយ្យការ​បានធ្វើ​សេចក្តី​សន្និដ្ឋានថា ជនជាប់ចោទ​បាន​ឆ្លើយ​សារភាព​ទទួលខុស​តាំងពី​នៅ​តុលាការ​ថ្នាក់ក្រោម​។ ​ចំពោះ​លោក​មេធាវី​ការពារ​សិទ្ធិ​ឱ្យ​ជនជាប់ចោទ​វិញ​ថា កូនក្តី​របស់លោក​បាញ់​ជនរងគ្រោះ​ស្លាប់​ដោយ​អចេតនា ប៉ុន្តែ​ជនជាប់ចោទ​ក៏​មិនត្រូវ​ប្រើប្រាស់​កាំភ្លើង​ក្នុង​ហ្វូងមនុស្ស​ដែរ​។

ក្រោយ​ប្រើពេល​ជំនុំជម្រះ​ជិត​ ១ ​ម៉ោង​មក​លោក​ ជីវ កេង ប្រធាន​ក្រុមប្រឹក្សា​ជំនុំជម្រះ​បាន​ថ្លែង​ក្នុង​អង្គ​សវនាការ​ថា សាលដីកា​រឿងនេះ​ប្រកាស​នៅ​ថ្ងៃទី ​១២ មករា​។

លោក​ លី ឆេង ជា​មេធាវី ការពារ​សិទ្ធិ​ឱ្យ​ជនជាប់ចោទ​បានស្នើ​ដល់​ក្រុមប្រឹក្សា​ជំនុំជម្រះ​មេត្តា​ពិចារណា​បន្ថយទោស​ដល់​កូនក្តី​លោក​ផង​៕

អត្ថបទគួរចាប់អារម្មណ៍