សៀមរាបៈ អាជ្ញាធរខេត្តសៀមរាបបានបើកយុទ្ធនាការសម្អាតបរិស្ថាន ក្រោយបុណ្យឆ្លងឆ្នាំសកល ដើម្បីបង្កើនសោភណភាពទីក្រុង និងលើកកម្ពស់ការយល់ដឹងបន្ថែមដល់សាធារណជនឱ្យចូលរួមថែរក្សាអនាម័យ និងការរស់នៅស្អាត។
នៅក្នុងពិធីបើកយុទ្ធនាការសម្អាតបរិស្ថានក្រោមប្រធានបទ “ទីក្រុងស្អាត បរិស្ថានល្អ សុខភាពល្អ” ក្រោយឆ្លងឆ្នាំសកល កាលពីថ្ងៃទី ៣ ខែមករា លោក ង៉ាន់ ភិរុណ អភិបាលរងខេត្តសៀមរាប បានថ្លែងថាយុទ្ធនាការសម្អាតអនាម័យ និងបរិស្ថាននាពេលនេះមានសារៈសំខាន់ណាស់ដែលធ្វើឱ្យក្រុងសៀមរាបក្លាយជាទីក្រុងគ្របដណ្តប់ដោយបរិស្ថានស្អាត មានបរិយាកាសល្អ រុក្ខជាតិខៀវខ្ចី និងផ្កាចម្រុះពណ៌។
លោកបានបន្តថា យុទ្ធនាការនេះក៏ជាផ្នែកមួយនៃការង្កើនការយល់ដឹងបន្ថែមអំពីអនាម័យបរិស្ថានដល់សាធារណជនក្នុងគោលបំណងបង្កើនបរិស្ថានស្អាតក្នុងការរស់នៅរបស់ពលរដ្ឋប្រកបដោយអនាម័យល្អដែលនាំមកនូវសុខភាពល្អផងដែរ។
លោកថា៖ «ដូចនេះការរៀបចំយុទ្ធនាការនាពេលនេះ គឺជាកម្លាំងចលករមួយដ៏សំខាន់ដើម្បីជំរុញចលនាកម្លាំងគ្រប់ស្រទាប់វណ្ណៈឱ្យចូលរួមធ្វើអនាម័យក៏ដូចជា បំផុសចលនាចូលរួមសម្អាតអនាម័យបរិស្ថានតាមលំនៅឋានរៀងៗខ្លួននិងទីសាធារណៈដោយទុកដាក់សំរាមក្នុងធុងសំរាមឱ្យបានត្រឹមត្រូវប្រកបដោយផាសុកភាព។
ដើម្បីចូលរួមចំណែកក្នុងយុទ្ធនាការសម្អាតអនាម័យបរិស្ថានឱ្យកាន់តែមានប្រសិទ្ធភាពលោក ង៉ាន់ ភិរុណ បានជំរុញដល់ភាគីពាក់ព័ន្ធ ដៃគូអភិវឌ្ឍន៍ទាំងអស់ត្រូវចូលរួមអនុវត្តឱ្យបានផុសផុល សំដៅឆ្ពោះទៅកាន់ទីក្រុងដែលមានអនាម័យបរិស្ថានស្អាត និងភូមិឋានគ្មានសំរាម។
លោកអភិបាលរងខេត្តបានបញ្ជាក់ថា ការផ្លាស់ប្តូរឥរិយាបថ និងអាកប្បកិរិយាមនុស្ស ក្នុងការប្រើប្រាស់ផលិតផលធ្វើពីប្លាស្ទិក គឺជារឿងចាំបាច់បំផុត ព្រោះការបំពុលដោយប្លាស្ទិកនឹងធ្វើឱ្យប៉ះពាល់ដល់អាយុជីវិតមនុស្ស សត្វ ជាពិសេសសំណល់ប្លាស្ទិកទាំងនេះកំពុងគំរាមកំហែងយ៉ាងធ្ងន់ធ្ងរដល់ភពផែនដីរបស់យើង។
លោកបានថ្លែងថា៖ «យើងទាំងអស់គ្នាមានតួនាទីចូលរួមចំណែកការពារបរិស្ថាន និងរួមគ្នាចោលសំរាមឱ្យបានត្រឹមត្រូវដោយរៀបចំទុកដាក់សំរាម និងចោលសំរាមឱ្យត្រឹមត្រូវតាមការណែនាំរបស់អាជ្ញាធរមានសមត្ថកិច្ចដែលរៀបចំជូន»។
អ្នកនាំពាក្យសាលាខេត្តសៀមរាបលោក លីវ សុខុន ប្រាប់ភ្នំពេញប៉ុស្តិ៍បន្ថែមថា យុទ្ធនាការនេះ ដើម្បីបំផុសស្មារតីបន្ថែមដល់សាធារណជនឱ្យមានការចូលរួមទុកដាក់សំរាមត្រឹមត្រូវ។
លោកថា៖ «បន្ទាប់ពីឆ្លងឆ្នាំសកលកាកសំរាមផ្សេងៗតែងតែនៅសល់ច្រើន ហើយខេត្តតែងតែរៀបចំសម្អាតអានាម័យជានិច្ច ក្រោយពីព្រឹត្តិការណ៍បុណ្យធំៗ តាមពិតមានក្រុមហ៊ុនគេធ្វើអនាម័យហើយ ប៉ុន្តែយើងធ្វើនេះគឺជាការពង្រឹងចលនាស្មារតីឱ្យប្រជាពលរដ្ឋបានឃើញ និងចូលរួមយកចិត្តទុកដាក់ទៅលើបរិស្ថាន ព្រោះសៀមរាប គឺជាខេត្តមួយដែលជាទីក្រុងវប្បធម៌ និងទេសចរណ៍»។
លោក ហួ ឆៃងន់ ស្ថាបនិកក្រៀលកម្ពុជាដែលធ្វើការពាក់ព័ន្ធបរិស្ថានបានគាំទ្រចំពោះយុទ្ធនាការនេះ ហើយបានចាត់ទុកថា ជាគំរូមួយសម្រាប់ថ្នាក់ខេត្តផ្សេងៗយកចិត្តទុកដាក់លើបរិស្ថាន។ ជាមួយគ្នានេះដែរលោកជំរុញថ្នាក់ខេត្តសៀមរាបបង្កើនការយល់ដឹងបន្ថែមទៀតក្នុងការទុកដាក់សំរាម មុនពេលព្រឹត្តិការណ៍ធំៗមកដល់ ដើម្បីបញ្ចៀសការទុកដាក់សំរាមគ្មានសណ្តាប់ធ្នាប់។
លោកថា៖ «ជារួមឱ្យតែធ្វើការងារលើបរិស្ថានយើងខ្ញុំគាំទ្រទាំងអស់ហើយរឿងធំជាងគេក្នុងការដោះស្រាយបរិស្ថានគឺចេញពីការអប់រំពលរដ្ឋ និងការរៀបចំសេនារីយោក្នុងការគ្រប់គ្រងសំរាមមុនពេលមានកម្មវិធីធំៗមកដល់»។
ជាមួយគ្នានេះដែរ សម្រាប់ក្រុមការងាររបស់លោកនឹងបន្តសកម្មភាពអប់រំប្រជាពលរដ្ឋពាក់ព័ន្ធនឹងបរិស្ថាននៅឆ្នាំ ២០២២ ជាពិសេសយុវជនដែលជាទំពាំងស្នងឫស្សី។
លោកថា៖ «នៅថ្ងៃទី ១៤ កុម្ភៈខាងមុខនេះយើងនឹងរៀបចំកម្មវិធីសម្អាតបរិស្ថានដោយកៀរគរយុវជនមកចូលរួមដែលក្នុងនោះយើងត្រៀមមនុស្សចូលរួមសម្អាតប្រមាណជា ២០០ ទៅ ៥០០ នាក់ ដើម្បីសម្អាតសំរាមចំនួន ៥ ទីតាំងនៅរាជធានីភ្នំពេញ»។
យោងតាមរបាយការណ៍មន្ទីរទេសចរណ៍ខេត្តសៀមរាបបានឱ្យដឹងថា ស្ថានភាពភ្ញៀវទេសចរជាតិ និងអន្តរជាតិមកទស្សនាកម្សាន្តនៅក្នុងរមណីយដ្ឋាននានា ក្នុងខេត្តសៀមរាបនាឱកាសថ្ងៃបុណ្យឆ្លងឆ្នាំសកល ២០២១ ឈានចូលឆ្នាំ ២០២២ មានចំនួនប្រមាណ ១៨៩ ៤៣៦ នាក់។ ក្នុងនោះ ភ្ញៀវទេសចរជាតិមានចំនួនប្រមាណ ១៨៩ ០០០ នាក់ និងភ្ញៀវទេសចរបរទេសផ្ទៃក្នុងមានចំនួន ៤៣៦ នាក់៕