.jpg)
បារីក្លែងក្លាយ ដែលសមត្ថកិច្ចនគរបាលបង្រ្កាបបាននៅខណ្ឌទួលគោក រាជធានីភ្នំពេញ នៅថ្ងៃទី៦ មករា។ រូបថត AECPD
ភ្នំពេញៈ កម្លាំងការិយាល័យប្រឆាំងបទល្មើសកម្មសិទ្ធិបញ្ញានៃនាយកដ្ឋាននគរបាលប្រឆាំងបទល្មើសសេដ្ឋកិច្ចចាប់ឃាត់ខ្លួនមនុស្ស២នាក់ និងរឹបអូសជាបណ្ដោះអាសន្ននូវសម្ភារវត្ថុតាងជាច្រើន ដែលមានការពាក់ព័ន្ធនឹងការផលិត វេចខ្ចប់ ចែកចាយបារីម៉ាក JET និង 555 ក្លែងក្លាយ មួយចំនួនធំ ក្នុងឃ្លាំងនៃរោងចក្រផលិតបារីរបស់ក្រុមហ៊ុន Hong International Co.; Ltd មានទីតាំងនៅភូមិទ្រុងមាន់ សង្កាត់អូរបែកក្អម ខណ្ឌសែនសុខ រាជធានីភ្នំពេញ។
លោក ឡុង ស្រេង អនុប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ច ប្រាប់ភ្នំពេញប៉ុស្តិ៍ នាថ្ងៃទី៦ មករា ថា ប្រតិបត្តិការនេះបានធ្វើឡើងក្នុងរយៈពេល២ថ្ងៃជាប់គ្នា [ថ្ងៃទី៣-៤ មករា ឆ្នាំ២០២២] ក្រោមការសម្របសម្រួលនីតិវិធីផ្នែកច្បាប់ពីតំណាងអយ្យការ អមសាលាដំបូង រាជធានីភ្នំពេញ។ ជនសង្ស័យ ដែលត្រូវបានឃាត់ខ្លួន មាន ឈ្មោះ នៀ ណារិន អាយុ ៣៨ឆ្នាំ ជាអ្នកបើកបររថយន្ត និងស្ត្រីឈ្មោះង៉ូវ ម៉ុក ជាម្ចាស់ទីតាំងរោងចក្រផលិតបារីនៃក្រុមហ៊ុន ហុង អន្តរជាតិ។
លោកបញ្ជាក់ថា៖«បច្ចុប្បន្ន ជនសង្ស័យទាំង២កំពុងត្រូវបានក្រុមមន្ត្រីនគរបាលជំនាញយើងសាកសួរ ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញ ធ្វើចំណាត់ការបន្តតាមនីតិវិធីច្បាប់»។
បើតាមលោកឡុង ស្រេង កាលពីថ្ងៃទី២១ ខែកញ្ញា ឆ្នាំ២០២០ នាយកដ្ឋានប្រឆាំងបទល្មើសសេដ្ឋកិច្ច បានទទួលសេចក្ដីរាយការណ៍មួយពីភ្នាក់ងារសម្ងាត់ម្នាក់ថា មានការចរាចរផលិតផលបារីក្លែងក្លាយជាច្រើនប្រភេទនៅកម្ពុជា។ ក្រោយពីទទួលបានដំណឹងនេះ កម្លាំងសមត្ថកិច្ចនគរបាលជំនាញ បានធ្វើការស្រាវជ្រាវតាមអង្កេតតាមដានលើករណីនេះ។ រហូតដល់ថ្ងៃទី៣ មករា ឆ្នាំ២០២២ នៅវេលាម៉ោង២:៤៥នាទីរសៀល កម្លាំងជំនាញការិយាល័យប្រឆាំងបទល្មើសកម្មសិទ្ធិបញ្ញានៃនាយដ្ឋាននគរបាលប្រឆាំងបទល្មើសសេដ្ឋកិច្ច បានប្រទះឃើញរថយន្ត HYUNDAI ពណ៌ស ពាក់ស្លាកលេខ ភ្នំពេញ 2J-5930 ១គ្រឿងមានផ្ទុកផលិតផលបារីម៉ាក JET ជាច្រើនប៊ិច កំពុងចតក្នុងចំណតរថយន្តដឹកទំនិញ១កន្លែង ក្នុងសង្កាត់បឹងសាឡាងខណ្ឌទួលគោក រាជធានីភ្នំពេញ។
លោកបានបន្តថា៖«ដោយមានការសង្ស័យថា ជាផលិតផលបារីក្លែងក្លាយ កម្លាំងសមត្ថកិច្ចយើង បានធ្វើការត្រួតពិនិត្យ ផលិតផលបារីម៉ាក JET នោះ ហើយក៏ដឹងថា ពិតជាផលិតផលបារីក្លែងក្លាយប្រាកដមែន ទើបសម្រេចស្នើសុំគោលការណ៍ពីអយ្យការអមសាលាដំបូងរាជធានីភ្នំពេញ ធ្វើការឃាត់ខ្លួនបុរសជាអ្នកបើកបររថយន្តនោះ ឈ្មោះនៀ ណារិន ដើម្បីឱ្យចូលរួមសហការជាមួយកម្លាំងសមត្ថកិច្ចយើង ក្នុងការបង្ហាញទីតាំងរោងចក្រផលិតបារីក្លែងក្លាយនេះ»។
លោកឡុង ស្រេង ឱ្យដឹងទៀតថា លុះដល់ព្រឹកថ្ងៃទី៤ ខែមករា តាមរយៈអ្នកបើកបរនោះ កម្លាំងសមត្ថកិច្ចជំនាញ ក្រោមការសម្របសម្រួលផ្នែកច្បាប់ ពីតំណាងអយ្យការ អមសាលាដំបូងរាជធានីភ្នំពេញ បានឈានដល់ការឃាត់ខ្លួនស្ត្រីជាម្ចាស់ទីតាំងរោងចក្រផលិតបារី នៃក្រុមហ៊ុន ហុង អន្តរជាតិម្នាក់ឈ្មោះង៉ូវ ម៉ុក។ ចំណែកបុរសឈ្មោះង៉ូវ ស្រ៊ុន ដែលជានាយកក្រុមហ៊ុនរោងចក្របារី ហុងអន្តរជាតិបានរត់គេចខ្លួន។
នៅក្នុងទីតាំងនេះ សមត្ថកិច្ចបានរកឃើញនិងចាប់រឹបអូសវត្ថុតាង ជាសម្ភារសម្រាប់បម្រើឱ្យការផលិត វេចខ្ចប់ ចែកចាយបារីម៉ាក JET និង 555 ក្លែងក្លាយ រួមមានថង់រុំបារី ក្រដាស់រុំកន្ទុយបារី កន្ទុយស្នោបារី សម្បកកញ្ចប់បារី សម្បកសុងបារី សម្បកអាលុយមីញ៉ូម និងបារីមូររួចមិនទាន់វិចខ្ចប់សរុបចំនួន១០៨ ០៥៣គីឡូក្រាម។ ផលិតផលបារីម៉ាក JET ដែលបានវេចខ្ចប់រួចមានចំនួន២៣ ៦៤០កញ្ចប់ តែមប្រិ៍ BAT និង VN DUTY NOT PAID សរុបចំនួន ៤ ៨៦៦សន្លឹក ម៉ាស៊ីនវេចខ្ចប់បារីចំនួន៧គ្រឿង ម៉ាស៊ីនមូរកន្ទុយបារីចំនួន២គ្រឿង និងរថយន្ត១គ្រឿង ម៉ាកHYUNDAI ពណ៌ស ស្លាកលេខ ភ្នំពេញ 2J-5938 ។
ក្រោយពីធ្វើការត្រួតពិនិត្យរួច តំណាងអយ្យការ អមសាលាដំបូងរាជធានីភ្នំពេញ បានសម្រេចឱ្យសមត្ថកិច្ចចម្រុះធ្វើការដកហូតសម្ភារខាងលើយកទៅរក្សាទុក ជាបណ្ដោះអាសន្ននៅនាយដ្ឋាននគរបាលប្រឆាំងបទល្មើសសេដ្ឋកិច្ច និងបិទប្លុំបេទ្វារឃ្លាំង និងច្រកចេញចូល នៃទីតាំងរោងចក្រ ខាងលើ ជាបណ្ដោះអាសន្ន៕
