.jpg)
គ្រោះថ្នាក់ចរចារណ៍ រថយន្តបុករថយន្ត នៅក្នុងស្រុកសំរោងទង ខេត្តកំពង់ស្ពឺ កាលពីយប់ថ្ងៃទី៥មករា។ រូបថត នគរបាល
កំពង់ស្ពឺៈ បុរសវ័យចំណាស់ម្នាក់ បានស្លាប់ រីឯប្រពន្ធរងរបួសស្រាល ដោយសាររបូតកង់រថយន្តប៉ើងទៅត្រូវ ពេលរថយន្តកំពុងបើកបរ តាមបណ្តោយផ្លូវជាតិលេខ៤៤ ខណៈជនរងគ្រោះ កំពុងអង្គុយនៅមុខផ្ទះ ស្ថិតក្នុងភូមិ ផ្លោច ឃុំ ត្រពាំងជោ ស្រុកឱរ៉ាល់ នៅវេលាម៉ោងជាង ១១ ថ្ងៃត្រង់ ថ្ងៃទី ៥ មករា ហើយនៅយប់ថ្ងៃដដែលនោះ ក៏មានរថយន្ត៥ គ្រឿងបានបុកបន្តគ្នា បណ្តាលឱ្យរបួសធ្ងន់ម្នាក់ ក្នុងស្រុកសំរោងទង។
លោក តាប់ លន ស្នងការរងទទួលផែននគរបាលចរាចរណ៍ ខេត្ត កំពង់ស្ពឺ ប្រាប់ភ្នំពេញប៉ុស្តិ៍ នៅថ្ងៃទី៦ មករា ថា បុរសរងគ្រោះដែលស្លាប់ឈ្មោះ សុខ សឿន អាយុ ៧៩ឆ្នាំ និងប្រពន្ធឈ្មោះ អិន អឿន អាយុ ៦៥ឆ្នាំ រងរបួសស្រាល រស់នៅក្នុងភូមិ ផ្លោច ឃុំ ត្រពាំងជោ ស្រុកឱរ៉ាល់ ។
លោកបន្តថា៖«រឿងនេះជនបង្កដែលបើករថយន្តរបូតកង់ បានបើករថយន្តរត់ពីកន្លែងកើតហេតុ ហើយចតរថយន្តទុកចោល និងគេចខ្លួនបាត់។ ឥឡូវយើងបានយករថយន្តមករក្សាទុក ដើម្បីចាត់ការតាមនីតិវិធី»។
លោករំឭកតាមសម្តីសាក្សីថា កាលពីវេលាម៉ោងជាង១១ថ្ងៃត្រង់ទី៥ មករា ឆ្នាំ ២០២២ មានគ្រោះថ្នាក់ចរាចរណ៍មួយបង្កឡើងដោយរថយន្តធុនធំ១គ្រឿង ម៉ាកហ៊ីណូ ពាក់ស្លាកលេខភ្នំពេញ 3B-1259 ដឹកដើមអំពៅ។
ពេលកំពុងបើកបរនោះ ស្រាប់តែរបូតកង់ក្រោយ១គូ ហើយកង់រថយន្តនោះ បានប៉ើងទៅបុកបុរសរងគ្រោះឈ្មោះសុខ សឿន បណ្តាលឱ្យស្លាប់ភ្លាមៗ នៅកន្លែងកើតហេតុ និងប្រពន្ធរបស់គាត់ រងរបួសស្រាលខណៈពួកគេកំពុងអង្គុយលេងនៅមុខផ្ទះ។
លោកបន្តទៀតថា ពេលកើតហេតុភ្លាមៗ គេឃើញរថយន្តបង្កបានបន្ថែមល្បឿន ហើយបន្ទាប់ពីរថយន្តរបូតកង់បណ្តាលឱ្យប៉ើងទៅត្រូវចំមនុស្សស្លាប់ អ្នកបើកបរបានចតរថយន្តចោលគេចខ្លួនបាត់។
ក្រោយកើតហេតុមន្ត្រីជំនាញនគរបាលចរាចរណ៍ស្រុកឱរ៉ាល់ បានចុះពិនិត្យដល់កន្លែងកើតហេតុ ដើម្បីកសាងសំណុំរឿង បញ្ជូនទៅសាលាដំបូងខេត្តកំពង់ស្ពឺចាត់ការតាមផ្លូវច្បាប់។
ដោយឡែក កាលពីវេលាម៉ោងជាង១០យប់ថ្ងៃទី៥ មករា ក៏មានគ្រោះថ្នាក់ចរាចណ៍មួយករណីទៀតដែរ ដែលបង្កឡើងដោយរថយន្តស៊ាំយ៉ុង១គ្រឿង បុកជាមួយរថយន្តហាយឡែនឌឺ បណ្តាលឱ្យអ្នកបើករថយន្តហាយឡែនឌឺរងរបួសធ្ងន់ ដោយរថយន្តទាំង២នេះ បើកបញ្ច្រាសទិសគ្នា ដែលស្ថិតនៅភូមិ ចំបក់ ឃុំវល្លិសរ ស្រុក សំរោងទង ខេត្តកំពង់ស្ពឺ។
ភ្លាមៗនោះ ក៏មានរថយន្ត៣គ្រឿងទៀត បានទៅបុកបន្តកន្ទុយគ្នាបន្ថែមទៀត ប៉ុន្តែគ្មានមនុស្សរបួសទេ។
លោក ស្នងការរង តាប់ លនបញ្ជាក់ថា៖«ករណីនេះ ខាងភាគីរថយន្តស៊ាំយ៉ុង រត់គេចខ្លួនបាត់ ហើយសមត្ថកិច្ចយើងកំពុងស្រាវជ្រាវ ដើម្បីស្វែងរកចាប់ខ្លួន។ ទន្ទឹមនឹងនេះដែរ យើងក៏រងចាំភាគីរងគ្រោះ ដើម្បីមកដោះស្រាយដែរ»៕
